From Wikipedia, the free encyclopedia
街坊工友服務處簡稱「街工」，係香港一個已經摺埋服務社區同勞工嘅壓力團體，旗下有再培訓教育中心、荃灣教育中心、荃灣豪輝綜合服務中心、勞工（工會）事務組同社區事務組。同時佢哋亦曾經係香港泛民主派入面，其中一個參政團體，而家喺香港立法會同埋區議會議席清零。執行委員會末代主席係盧藝賢。總部響新界葵涌葵芳邨葵仁樓地下，係少數將核心設喺公共屋邨嘅香港政治團體。2022年3月15號，街工畀職工會登記局取消登記。
七十年代中末期，香港嘅基層工友普遍缺乏基礎教育，難以出頭；適逢當時學界關心社會之風熾熱，故此不少熱心而受過高等教育嘅後生仔女，就投身工人教育行列，開辦工人夜校。
1975年，喺香港大學畢業嘅民運份子劉山青，有見新界荃灣地區基層勞工眾多，而哩啲基層工友普遍只有小學程度教育，甚至唔識字，所以就響哩區成立咗「新青學社」。除咗教導青年勞工讀書之外，同時更教授佢哋關心社會、關心社區嘅社會意識課程，從而令工人運動萌芽。當時響新青學社任教嘅人，除咗劉山青，重有前任立法會議員梁耀忠，以及後來成為電影導演嘅岑建勳等等。
後來劉山青響八十年代初，因為到廣東廣州援助被捕國內民運份子王希哲等，而被中共方面判處反革命罪，而工人學校亦因為港府此時大力提倡官辦而結束。新青學社導師梁耀忠等人，就提倡工人社區化等口號，咁啱葵芳邨葵興邨廉租屋大廈爆發「26座問題公屋醜聞」事件，梁耀忠就率領兩邨居民投入抗爭運動，隨後更加喺1985年香港區議會選舉中，贏得葵涌及青衣區議會葵芳及葵興選區議席，並將學社改組為街坊工友服務處。
由於繼承著新青學社工人夜校，故此街坊工友服務處繼續設立教育課程畀區內嘅工友同基層市民。
現時街工共設有三所教育服務中心，包括荃灣教育中心、荃灣再培訓中心、荃灣綜合服務中心，提供再培訓課程、學生託管等畀區內人士。
現時街工勞工服務組提供協助組織工會、勞工法例求助等保障工友權益活動；而街工旗下共有十四個工會：
街工同時為葵青區區內居民，提供社區事務諮詢及投訴申訴等服務。由於街工定位基層，故此社區服務組多以照顧葵青區內公共房屋區居民為主。同時亦曾參與要求公屋減租、阻止政府賤賣公屋商場等運動。
由不同方面公屋居民及獨立社會福利人士成立嘅捍衛基層住屋權益聯盟，街工亦有派代表參與。
街坊工友服務處早喺1985年香港區議會選舉中，就派人參與區議會選舉，不過直至2003年香港區議會選舉前，只係派人響葵青區參選。
響2003年香港區議會選舉中，街工共派出五名候選人參選，其中響葵青區出選嘅梁耀忠、梁永權、尹兆堅同梁志成分別喺葵芳選區、安蔭選區、石蔭選區同葵興選區當選，喺葵青區議會中，以單一組織嚟講係第二大勢力，僅次於香港民主黨；由於街工同屬泛民主派陣營，故此葵青區係香港十八個區議會中，少數主要由民主派控制嘅區議會。其中梁永權更當選葵青區議會副主席，係街工唯一一席嘅區議會正副主席。而響黃大仙區新蒲崗選區出選嘅黃兆文就落敗。
被視為街工標誌嘅梁耀忠，早喺1991年香港立法局選舉中，參選新界南直選，不過落敗。1995年香港立法局選舉，佢循新九組功能組別第二組紡織界當選，晉身立法局；之後響1998年、2000年同2004年香港立法會選舉中，梁耀忠都喺經新界西地方直選當選。
由於梁耀忠在地區工作相當穩健，故此佢參選區議會或立法會，均多次高票當選，被譽為票王。而響2003年香港區議會選舉，更獲得全港最高票。2004年香港立法會選舉中，街工名單首次加入區議員尹兆堅，想帶多個人入立法會，可惜最後只得梁耀忠一人當選。
2019年第6屆香港區議會選舉，街工派出四位候選人（梁志成、梁耀忠、梁靜珊、何惠彬）參選，結果全部當選，亦都成功衝出葵青區，第一次喺元朗區有區議員席位。
街工原本喺2個區議會擁有4個議席，但隨住何惠彬喺2020年6月尾退出街工，梁耀忠喺2021年4月因為煞停警黑亂港落實五大訴求集會被判坐花廳8個月（緩刑1年），梁志成、梁靜珊同年6月取消同街工嘅政治聯繫，而家街工冇晒區議會議席。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
