From Wikipedia, the free encyclopedia
《藏經洞基督像》(英文:Fragment of a Christian Figure)係莫高窟藏經洞所出嘅敦煌歸義軍時代景教基督像絹畫[1],已殘破,現藏大英博物館。
呢幅畫作繪製於公元9世紀末[2],1908年畀匈牙利籍英國考古學家斯坦因發現於莫高窟第17窟,即藏經洞。據京都大學教授羽田亨考証,「敦煌出土嘅應為基督畫像嘅絹畫斷片…… 大概為敦煌地方唐代畫家接受景教司祭或教徒嘅訂貨,按其意願或其他參考材料畫成。」有「景教博士」之稱嘅佐伯好郎亦主張此像乃景教嘅耶穌像[3]。
根據北京大學考古文博學院教授林梅村及匈牙利羅蘭大學講師宋妮雅(Buslig Szonja)嘅研究,佢哋認為呢幅基督畫像喺很多方面都刻意模仿波斯薩珊王朝時代嘅塔奇·博斯坦岩石浮雕神像。比如兩者都有頭光,佩戴類似項圈,甚至基本姿勢都好相似。由此推測,呢幅基督像很可能係以波斯宣教士阿羅本帶至長安嘅聖像為底本摹繪[註 1][1]。但呢幅畫亦有濃郁嘅唐代佛畫風格,佛教藝術型式畀採納為基調。
幅畫初頭睇落似一幅菩薩像,但仔細睇面部會發現有異於中土嘅西式特徵,鬍鬚同鄂鬚都係赤茶色,同菩薩通常嘅綠色鬍鬚完全唔同,顯示出該畫屬於另一種宗教[2]。畫中人物為四分之三身像,佩戴有十字蓮花裝飾嘅頭冠及墜有十字架嘅項圈,頭冠同項圈上嘅十字架邊緣為水滴狀,而十字蓮花呢種符號亦見於《大秦景教流行中國碑》。人物右手結安慰印(Vitarka Mudrā[註 2]),左手持遊行用嘅十字架長杖。除咗十字架,人物所戴頭冠亦好特別。呢個係一種羽翼頭冠,源自貴霜-薩珊藝術,象徵主權。披喺膊頭嘅捲髮就令人諗到犍陀羅藝術中嘅佛像[4]。
此像身披黃色襯裏嘅紅色披肩,其下着綠衣,但已褪色,同背景顏色相近。長至手肘嘅衣袖飾有規則嘅皺褶紋樣,手腕上戴一金色手鐲。頭光有細小嘅火燄帶,閉合嘅唇綫拉着墨綫,兩端稍微往下翻卷。整幅畫嘅背景裝飾散落嘅小花,可能係為咗增強宗教嘅神聖性,並有「奉愛」之意[4]。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.