趙佶

宋徽宗趙佶（1082年—1135年）係北宋第八位皇帝。

宋徽宗趙佶係宋神宗第十一個仔，阿媽係欽慈皇后陳氏。佢阿哥宋哲宗喺紹聖三年（1096年）封趙佶做端王。^[1]

元符三年（1100年）正月宋哲宗過身，由於哲宗冇仔，宋神宗皇后向太后支持由趙佶繼位，雖然有章惇反對，但係章惇都係拗唔過向太后，而且冇乜人企喺章惇嗰邊，於是就由趙佶繼位。^[1]

宋徽宗相對於宋朝前代各個皇帝，政績並唔突出。例如佢在位嗰陣，就動用大量資源採辦「花石綱」，搜集奇花異石運到汴京，喺皇宮起園林^[2]。1120年方臘喺江南作反，到1122年先畀政府軍完全平息曬。

宋徽宗睇見遼國唔夠新崛起嘅金國打，佢想攞返燕雲十六州全部，就唔理同遼國嘅「澶淵之盟」，喺1120年同金國訂立「海上之盟」，約定夾攻遼國。但係宋軍連就嚟亡國嘅遼軍都打唔贏，最後係金軍佔領埋本來約定由宋軍攻佔嘅大同同燕京。金國睇到宋朝嘅軍隊唔掂，就有咗入侵宋朝嘅想法，終於喺宣和七年（1125年）十月，金軍分兩路入侵宋朝。^[3]十二月，徽宗傳位畀佢個仔宋欽宗，自己做太上皇，由個仔去應付。

宋靖康元年、金天會四年閏十一月（1127年1月），金軍攻陷汴京，之後捉咗宋徽宗、宋欽宗兩個皇帝，史稱「靖康之變」。

天會五年二月，金國將徽欽二宗眨做庶人。^[4]

1128年（天會六年）農曆八月廿一日，徽欽二宗到咗金上京會寧府，畀金國分別封做昏德公同重昏侯；^[4]同月廿四日，兩位皇帝同埋家眷都坦胸赤背、身披羊皮，跪拜金太祖廟，行「牽羊禮」，去乾元殿拜謁金太宗完颜吳乞買（完顏晟）。

1135年宋徽宗病死喺金國^[5]。死後追加謚號叫做體神合道駿烈遜功聖文仁德憲慈顯孝皇帝，葬喺永佑陵。

Remove ads

宋徽宗雖然唔係出色嘅皇帝，但佢好擅長藝術。佢成立咗翰林書畫院，即係當時嘅宮廷畫院。又以繪畫作為科舉考試嘅內容，主持咗一啲藝術書籍嘅編輯，好似《宣和書譜》、《宣和畫譜》、《宣和博古錄》等等。

佢獨創咗一種書法，又瘦又有力，姿態優美又大方，俾後世人稱為瘦金體。歷代書法家都認同佢係一種成熟嘅書體，兼有人模仿。

《宋史‧徽宗本紀》咁樣評論宋徽宗：「宋徽宗諸事皆能，獨不能為君耳！」^[6]。