色模

《色模》（英文：Super Models），原名《我要做𡃁模》，係一套因香港社會興起少女模特兒熱潮而拍嘅電影，喺2009年9月開鏡，但直到2015年先上畫，由周柏豪、趙碩之、賈曉晨、陳百祥、羅家英、曹查理、戴夢夢、艾美琦、陳若嵐、董敏莉、王合喜、黃嘉樂、梁焯滿主演，羅惠敏、仁傑執導。

最初開拍嗰陣，仲搵嚟趙碩之、陳若嵐、王璐瑤、周柏豪、黃家樂、賈曉晨、顏后君、李婷婷同埋郭思琳等人出席記者招待會。之後重到國際展貿中心舉行一場「𡃁模」比賽。但係電影之後冇咗下文^[1]，多年後據報電影已殺青，不過一直無上映^[2][3]。

加入情色內容後上畫

去到2015年，電影被加入大量情慾情節後，以《色模》嘅名義上映。亦由於呢啲改動，一套笑片變成咗情色片，而六年後人氣地位有所提升嘅周柏豪，就成為咗情色片主角。對於呢個改動，周柏豪話只係感到無奈，而且無被通知。而趙碩之就直頭形容件事冇眼睇。但兩人都表示冇諗住追究件事^[4]。

評價

• 影評網站《講。鏟。片》形容製作同劇本都好求其，只係喺度展示女性嘅乳溝同埋胸圍，演員嘅演技亦唔得^[5]。

參考

1. 《我要做o靚模》爛尾？ | 講。鏟。片 22/02/2011
2. 「翻版謝婷婷」 YoYo兩度尋死獲救 互聯網檔案館嘅歸檔，歸檔日期2019年11月13號，. 香港蘋果日報 2018年6月22
3. 电影《我要做嫩模》杀青 赵硕之解封拼赢贾晓晨（大陸簡體）
4. 男神周柏豪慘變鹹星 香港太陽報 2015-10-23 （香港繁體）
5. Ryan (2015-10-22)。〈《色模》：製作劇本均求其，乳溝胸圍斥全片〉。《講。鏟。片》 (臺灣中文)。喺2021-07-29搵到。

出面網頁

• 《色模》喺香港影庫嘅資料