糖果屋

《糖果屋》（粵拼：tong4 gwo2 uk1；英文：The Gingerbread House ^{[註 1]}）係《格林童話》有收錄嘅一個童話故事。個故事好出名，到咗廿一世紀都仲有一定嘅文化影響力。

呢幅插圖描繪漢蘇同歌麗萄發現糖果屋，見到望落好好人嘅老婆婆。

呢幅圖畫描繪嘅，係漢蘇同歌麗萄喺森林裏面盪失路。

個故仔大致係噉嘅：故仔講到，漢蘇同歌麗萄呢兩個細路喺森林裏面盪失路；佢哋行行吓搵到一間怪屋，怪屋用糖果同薑餅等好味嘅嘢造，而怪屋嘅老婆婆仲好慷慨噉請ceng2佢哋食飯；點知原來老婆婆係巫婆想食咗佢哋，不過兩個細路用機智收拾巫婆，最後安全返到屋企。

喺《格林童話》原版入面，呢個故仔叫《漢蘇同歌麗萄》（德文：Hänsel und Gretel）－呢個呔圖係主角兩個細路嘅名。

情節

話說喺好耐好耐以前有一對小兄妹，哥哥個名叫漢蘇，細妹個名就叫歌麗萄。佢哋家境窮困，阿爸靠斬柴搵食。小兄妹嘅親生阿媽好惜sek3佢哋但係就死得早，佢哋阿爸後嚟再婚，娶咗個新老婆做小兄妹嘅後抵乸。

有一日，斬柴佬同後抵乸喺度愁屋企唔夠錢開飯，途中後抵乸遊說佢老公，叫佢將漢蘇同歌麗萄帶入森林，再留低對小兄妹喺嗰度等佢哋自生自滅，噉就可以慳返好多米飯。一邊喺側邊偷聽嘅漢蘇於是就諗橋，走去收集石仔返嚟。耳仔軟嘅斬柴佬打後真係聽後抵乸講，帶漢蘇同歌麗萄入森林，不過聰明嘅漢蘇同歌麗萄一路行一路掉deu6啲石仔落地，最後佢哋就由森林深處沿住啲石仔搵到路返屋企。過咗一排之後，死心不息嘅後抵乸再遊說佢老公帶漢蘇同歌麗萄入森林。今次漢蘇同歌麗萄諗住攞麵包糠代替石仔嚟重施故技，點知佢哋掉落地嘅麵包糠畀雀仔擔走嗮。就係噉，漢蘇同歌麗萄就喺陰暗嘅森林裏面盪失路。

漢蘇同歌麗萄係噉搵，都搵唔到路返屋企。冇幾耐，佢哋發現一間古怪嘅屋仔－間屋嘅牆係薑餅，而啲窗就係用糖果造嘅，散發住陣陣香味，望落聞落好好食噉。開始肚餓嘅小兄妹就上前去敲門。應門嘅係個阿婆。阿婆望落好好人噉，仲請ceng2對小兄妹入屋食飯。點知小兄妹食食吓，阿婆就捉住漢蘇，仲將漢蘇鎖入去一間囚房裏面－原來阿婆係個巫婆中意食人肉，打算養肥漢蘇再劏咗佢嚟食，而歌麗萄就要留低做巫婆嘅助手。

如是者，兩兄妹就喺巫婆間屋度生活。歌麗萄每日都會帶啲嘢食去幫巫婆手養肥漢蘇，跟住巫婆就會去囚房叫漢蘇伸隻手指出嚟，畀巫婆摸吓睇吓佢肥咗幾多。漢蘇每次都係攞一條骨頭^{[註 2]}去畀巫婆摸－巫婆年紀大眼力唔好，以為條骨真係漢蘇隻手指。

「點解呢個細路餵極都係咁瘦㗎？」

有一日，巫婆終於忍唔住，決定要郁手煮漢蘇嚟食。巫婆叫歌麗萄行去火爐前面，cek1 吓個爐夠熱未。歌麗萄估到巫婆係想乘機㧬ung2佢入火爐煮埋佢嚟食，於是佢就詐傻扮懵，話唔識得開爐，呃到巫婆爬入爐裏面。巫婆一入咗去，歌麗萄就一嘢閂埋個爐同埋點著個火。最後巫婆就被監生燒死。

歌麗萄即時走去放返漢蘇出嚟。大難不死嘅兩兄妹全力搜括間屋嘅財物，然後就嗱嗱臨帶埋啲財物返屋企。一返到，佢哋發現原來後抵乸已經走咗。亦有版本話後抵乸係死咗。

佢哋一家三口因為得到巫婆嘅財物，唔使再捱窮。從此，佢哋就過住幸福快樂嘅生活。

主題

睇埋：仙子故事同饑荒

《漢蘇同歌麗萄》用咗童話故事常見嘅「惡毒後抵乸糟質主角」橋段，不過噉係因為個故仔經過咗修改。首先，《漢蘇同歌麗萄》成個故仔都係圍繞住饑餓同饑荒^[1][2]－

• 薑餅屋（用食物造嘅屋）係個故仔最深入民心嘅影像之一；
• 故仔提到巫婆想食人肉，人食人係一件饑荒嗰時成日會發生嘅事；
• 故仔亦提到，漢蘇喺被囚禁期間猛咁食嘢；

中世紀嘅歐洲發生過多次大饑荒，當時嘅歐洲人遇到饑荒嗰陣，好多時都會因為唔夠錢開飯而將啲細路遺棄；《格林童話》第一版嘅《漢蘇同歌麗萄》故仔並冇後抵乸呢個角色，想將對小兄妹遺棄嘅係佢哋親生父母；後嚟據講格林兄弟唔中意，似乎覺得個故仔有損佢哋心目中「父母仔女相親相愛嘅理想家庭」嘅形象，所以佢哋就做咗啲修改－話親生阿媽深愛仔女但早死，而親生阿爸心哋唔壞但冇膽怕老婆，真正想虐待對小兄妹嘅係後抵乸^{[註 3][3]}。

亦有人指出，漢蘇同歌麗萄殺死巫婆之後，（喺某啲版本當中）後抵乸竟然咁啱死埋，噉反映巫婆同後抵乸喺早期版本當中係同一個角色^[4]。

影響

睇埋：糖果屋 (歌劇)

《漢蘇同歌麗萄》係《格林童話》其中一個最出名嘅故仔，產生咗唔少衍生文化產物，例如係

• 德文歌劇《糖果屋》^[5]；
• 2013 年美國電影《格林雙俠：獵巫世紀》，講漢蘇同歌麗萄大個咗做獵巫人，專對付女巫；
• 香港音樂組合 per se 作咗首歌《粉碎糖果屋》，就係取材自《漢蘇同歌麗萄》嘅；
• 喺包括珠三角在內嘅世界多地，唔少賣甜品糕點嘅舖頭都會用糖果屋做名，亦有唔少人將糖果屋當咗做「賣甜品糕點嘅商舖」嘅同義詞^[6][7][8]。呢樣嘢好可能就係取自《糖果屋》呢個童話故事嘅。

... 呀噉。

2021 年有人為咗慶祝聖誕而整咗間薑餅屋嚟食。

睇埋

• 耶加婆婆：耶加婆婆係東歐嘅一種傳說鬼怪，形象係會食人嘅巫婆，被指係好接近《漢蘇同歌麗萄》入面嗰個巫婆。
• Boogeyman
• 《薑餅人》

註釋

1. 呢個名就噉字面解係「薑餅屋」噉解。
2. 一般認為，條骨嚟自巫婆餵畀漢蘇食嘅雞翼或者雞髀。
3. 亦有版本索性話成件事純熟意外－話漢蘇同歌麗萄有日跟父母入森林，意外走失咗。

攷

1. Discover The Truly Grim History Behind The Fairy Tale Of Hansel And Gretel. ATI.
2. THE DARK HISTORY BEHIND HANSEL AND GRETEL. SYFY.
3. Zipes, Jack (2013). "Abandoned Children ATU 327A - Hansel and Gretel". The Golden Age of Folk and Fairy Tales: From the Brothers Grimm to Andrew Lang. Hackett Publishing. pp. 121.
4. Lüthi, Max (1970). Once Upon A Time: On the Nature of Fairy Tales. Frederick Ungar Publishing Co. p. 64.
5. Synopsis: Hansel and Gretel. Metropolitan Opera.
6. 糖果屋. Grand Hyatt Hong Kong.
7. 【香港】銅鑼灣新開夢幻糖果屋，必試泡泡窩夫雪糕+手工製糖果
8. 將軍澳Hans & Gretel希臘糖果屋！全場1,200呎 煙囪卷＋雞蛋仔｜外賣食乜好

拎

• Hansel and Gretel, American Literature （英文），《漢蘇同歌麗萄》一個英文譯版。
• Literature / Hansel and Gretel （英文），TV Tropes 講《漢蘇同歌麗萄》呢個故仔。