同心理、神經有關嘅疾病 From Wikipedia, the free encyclopedia
精神障礙（粵拼：zing1 san4 zoeng3 ngoi6），又叫精神疾病（zing1 san4 zat6 beng6）、精神紊亂，失心瘋，失心病[1][2][3][4][5][6][7][8]（紊讀問，zing1 san4 man6 lyun6）[註 1]又稱情緒病[9]，係種有特定癥狀去影響心理同日常行為嘅病，呢啲癥狀構成行爲上嘅功能性障礙，而同行爲嘅社會規範無關。根據病徵大體上分爲思覺失調同神經症兩類。而根據程度分爲精神異常（zing1 san4 ji6 soeng4）同精神錯亂（zing1 san4 co3 lyun6）。
根據世界衛生組織，精神障礙會有症狀同痛苦所導致嘅功能性不全[10]；而據美國精神醫學學會，精神障礙會有顯著嘅痛苦以及功能性障礙[11]。習慣上，精神障礙稱呼做精神病（zing1 san4 beng6），對應嘅英文係mental disease[10]，嚴格嘅正式用語叫「精神障礙」或者「精神紊亂」，對應嘅英文係mental disorder[10][12]。一般各種精神障礙嘅名叫做「症」或者「障礙」。而確診得咗精神疾病嘅人稱爲精神病患。
精神疾病有生理因素同心理因素。生理因素同神經系統有關，尤其係腦部神經嘅異常，呢方面有時有些少遺傳因素，所以坊間俗稱做神經病（san4 ging1 beng6）；心理因素比較複雜多樣，比如外界好強嘅刺激等。
推定喺世界上嘅罹患者有4500萬人，每四人就有一人喺一生中經歷一次以上嘅精神障礙[13]。喺任意時刻，成人人口中每十人就有一人罹患精神疾病[14]，而18歲以下嘅兒童青年每八人中有一人罹患，當中殘疾兒每五人中有一人[14]。神經精神疾患佔世界失能調整生命年（DALY）嘅13%，WHO推定到2015年增加到15%[13]。喺美國，同精神障礙關連嘅成本達到1470億美金，超過癌症、呼吸道疾病、艾滋[14]。
根據病徵有無影響心智來睇，分成思覺失調同神經症兩大類。
而根據ICD-10嘅分類，精神疾病分爲11種類型，有器質性精神障礙、精神藥物引起嘅精神障礙（比如藥物依賴之類嘅物質關聯障礙）、精神分裂症、情感性精神障礙（比如抑鬱症同躁鬱症）、神經症及應激相關同埋身體形式嘅障礙（比如恐慌症、焦慮症）、生理紊亂及同軀體有關嘅行爲障礙（比如性功能障礙）、成人人格及行爲障礙、精神發育遲滯、心理發育障礙、起病於幼年嘅行爲及情緒障礙、未定類型。
中國大陸《中華人民共和國精神衛生法》用嘅術語叫「精神障礙」，定義係：因爲各種原因引起嘅感知、情感、思維等精神活動嘅紊亂或異常，導致患者明顯噉心理痛苦，或者社會適應等功能損害。另外仲有術詞「嚴重精神障礙」，定義：症狀嚴重，令患者喺社會適應等功能損害嚴重，對自身健康狀況、客觀現實冇辦法完整認識，又或者唔能夠處理自身事務[15]。
香港《精神健康條例》用嘅術語叫「精神紊亂」，對應嘅英文叫mental disorder，涵括四種：一係精神病；二係智力上、社交能力上顯著減損嘅心智發育停頓或唔完全狀態，呢個狀態關連到異常侵略性、或者極唔負責任嘅行爲；三係精神病理障礙；四係唔屬弱智嘅任何精神失常，或者精神上無能[16]。
中華民國《精神衛生法》用嘅術語叫「精神疾病」，定義：指思考、情緒、知覺、認知、行爲等精神狀態表現異常，令佢適應生活嘅功能有障礙，需要醫療、照顧嘅疾病。範圍有精神病、精神官能症、酒癮、藥癮、仲有經中央主管機關認定嘅精神疾病（但唔包括反社會人格違常者）[17]。
韓國現行《障礙人福祉法》同《精神保健法》，用嘅術語叫「精神的障礙」，分兩類：發達障礙同精神障礙[18]。
精神障礙嘅認證係：精神分裂（調絃病）、躁鬱症（兩極性情動障礙）、反覆性憂鬱障礙、憂鬱障礙嘅患者經過一年以上持續治療以後，完全冇好轉跡象，噉嘅情況認爲係精神障礙者。
發達障礙又分兩類：知的障礙、自閉性障礙。知的障礙即係：智能障礙，又叫精神遲滯、精神薄弱，智力指數喺70以下。自閉性障礙即係：自閉症。
|
<2200
2200-2400
2400-2600
2600-2800
2800-3000
3000-3200
|
3200-3400
3400-3600
3600-3800
3800–4000
4000–4200
>4200
|
精神疾病相當常見，全世界大部份國家，有三分之一嘅人喺成世人入面有過某個程度嘅心理病[19]。單喺美國，就有46%人有過某個程度嘅心理病[20]。
精神疾病同其他嘅病一樣，都令患者好痛苦，但由於精神疾病會影響心智同行爲，令到社會隔離精神病人，歧視、侮辱佢哋，污名化咗精神病，甚至迫害精神病人。比如納粹曾經屠殺精神病患。
根據法國哲學家福柯嘅名作《癲狂與文明》，癲人曾經畀社會接納過，後來理性主義上升，社會唔再接納癲人，因爲癲狂視爲非理性，成爲理性主義鎮壓嘅對象，自此產生對精神病患嘅分隔、攻擊、污辱，於是產生癲狂院呢種機構，呢種機構同一般病院唔同。照常講，病人有權決定要唔要治療，喺醫院出入自如。但癲狂院當中，精神病患韞住曬，甚至強迫接受治療，病人無得話事。噉樣癲狂院與其話係醫療機構，不如話更似監倉。福柯認爲，癲狂院其實係社會鎮壓精神病患嘅暴力機構。
而喺法律上，精神病患定做無行爲能力嘅人，有監護宣告，所以喺法律上精神病患唔可以處理自己嘅財產，必須由監護人出面。
因爲社會對精神病嘅污名化，精神病成爲受政治攻擊嘅標籤，只要貼呢個標籤，就可以順理成章迫害、鎮壓唔畀社會接納嘅個人。因此精神病患嘅人權問題好突出。同時精神病嘅治療亦涉及到醫療倫理問題。
對精神病嘅污名化亦見於啲鬧人嘅話，比如「發神經」、「黐線」（或者寫做「痴線」）、「神經病」等等。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
