等呼

等呼（粵拼：dang2 fu1）係中國傳統音韻學嘅術語。等呼嘅原始定義係韻圖嘅等，喺等韻圖，喺一幅圖中按照四聲分成四格，再喺呢四格內每格打豎分四行，呢四行就代表四個等呼。由上到下分別係一等、二等、三等、四等嘅呼。呢個等叫做韻圖等。

因爲韻圖出現遲過反切，後來啲人研究反切，得出反切等，即係聲韻嘅搭配關係。一個韻母屬於某個等，而聲母就會同特定嘅等相拼。喺中古漢語拼音，三等韻用i、y表示介音或者主元音，二等韻用r表示介音，其餘都係一、四等，其中四等嘅主元音都係e。

下面係聲母同反切等嘅搭配關係。

• 幫組（幫、滂、並、明）：一、二、三、四，冇開合之分。
• 端組（端、透、定、泥）：一、四。同知組互補。
• 知組（知、徹、澄、娘）：二、三。同端組互補。
• 來母（註：泥娘母嘅變化實際同來母同步）：一、二、三、四。
• 精組：（精、清、從、心、邪）：一、三、四。另外邪母只拼三等。
• 莊組：（莊、初、崇、生、俟）：二、三。另外俟母只拼三等。
• 章組：（章、昌、常、書、船、日）：三。
• 喉牙：（見、溪、群、疑、影、曉、匣、云、以）：一、二、三、四。另外群、云、以只拼三等，匣母唔拼得三等。

韻圖擺法

喺等韻圖上擺嘅字，可以噉樣歸納：

1. 一等、二等係洪音，無介音-i-；三等同四等係細音，有介音-i-。
2. 喺洪音，聲母上同精組、端組結合，呢個係一等，聲母上同莊組、知組結合，呢個係二等。
3. 細音嘅原則噉樣記：
   1. 因爲重紐，分成咗三、四等，三等係弱介音，四等係強介音。
   2. 喺舌音，舌頭（端組）配四等，舌上（知組）配三等。
   3. 喺齒音，齒頭（精組）配四等，正齒嘅章組配三等，莊組配二等。但實質上，佢噉樣擺係爲咗顯示聲母嘅特點，所以有啲莊組字實質係三等，稱爲假二等真三等，有啲精組字實質係三等，稱爲假四等真三等。
   4. 喻母分爲云母同以母，喺圖上云母擺三等，以母擺四等。實質以母亦係假四真三。
   5. 幽韻配四等。

就似上面講嘅，決定等位嘅係聲母、介音、主元音嘅複雜關係。唔清楚點解等韻圖嘅作者會噉樣分四等，而家認爲喺作十六攝分開合嘅圖時，作等韻圖嘅人嘅音韻體系係分四等嘅，可以用一隻字收曬對應嘅所有音^[1]。

現代用法

喺現代中古音研究，等韻圖上一等嘅叫一等韻，二等嘅叫二等韻。十六攝中同一攝、同一開合嘅一等韻有多個時，噉就叫一等重韻。同樣有多個二等韻時叫二等重韻。

喺《切韻》屬洪音而喺等韻圖屬四等嘅韻，一般認爲呢啲韻到韻圖時代就由洪音變成咗細音。呢樣稱呼做洪音四等韻，又叫假四等韻。

至於重紐，三等嘅叫重紐三等，四等嘅叫重紐四等。

正齒音嘅各字母同喻母喺《切韻》分別出兩種唔同嘅音素，呢樣稱呼做「正齒三等、正齒四等」「喻母三等、喻母四等」。

到四呼嘅轉變

之後嘅音韻變化唔再分四等，摸索出開合各二等嘅模式。明代嘅《字彙》附嘅韻圖《韻法直圖》設新嘅呼，使用咗十呼，同樣《字彙》附錄嘅李世澤嘅《韻法橫圖》整理出五呼：開口呼、齊齒呼、合口呼、撮口呼、混呼。然後，清代潘耒（中文：潘耒）嘅《類音》開始分類爲四呼：開口呼、齊齒呼、合口呼、撮口呼，畀而家嘅漢語學使用。

攷

1. 遠藤光曉 (2001年)。《敦煌文書P2012「守温韻学残巻」について. 中國音韻學論集》。白帝社。頁 151。ISBN 4891744251。

睇埋

• 四呼
• 介音