第5屆白俄羅斯總統選舉響2015年10月11號舉行。
白俄羅斯總統盧卡申科一如預期，喺選舉中攞到壓倒性勝利，第五次贏出，有民眾認為選舉不公，上街抗議[1]。
盧卡申科
做咗總統廿一年嘅盧卡申科，被形容係歐洲最後獨裁者，任內大力掃除異己。選舉當日帶埋佢十一歲嘅仔響明斯克投票。響大部份反對派領袖都被禁止參選，或者抵制選舉嘅情況下，盧卡申科講明，如果得票率少過上屆八成左右，都唔滿意。今次同佢角逐嘅只有兩個親政府政黨領袖，同一個知名度唔高嘅反對派人士[1]。
選舉委員會初步點票結果話，盧卡申科得票率八成四左右，攞到壓倒性票數贏出[1]。
盧卡申科成功連任嘅消息傳出之後，近百個示威者響首都明斯克街頭抗議選舉不公[1]。
身在德國、本身係白俄公民嘅應屆諾貝爾文學獎得主，阿列克西耶維奇曾經呼籲杯葛選舉，認為響極權國家投票畀邊個唔重要，重要嘅係由邊個來點票[1]。
盧卡申科一直採取親俄羅斯立場，同俄羅斯總統普京關係密切。分析認為，俄國吞併克里米亞之後，唔少白俄人認為，雖然盧卡申科唔能夠改善國家經濟，但係國家總算和平穩定。盧卡申科8月釋放多個被囚嘅反對派人士，爭取西方國家解除經濟制裁[1]。
盧卡申科培育接班人
外界關注鐵腕管治白俄廿一年嘅盧卡申科，正試圖建立北韓式嘅王朝政權，傳位畀細仔，雖然細仔只有十一歲，但一早就已經陪老豆出席重要場合，會見外國元首[2]。
投票日，陪同盧卡申科到票站嘅唔係佢老婆，而係十一歲細仔尼古拉。兩個人嘅西裝、領呔都一模一樣，選票重係由尼古拉抌入票箱。反對派話已經做咗總統廿一年嘅盧卡申科，一心要捧尼古拉做接班人，建立北韓式嘅盧卡申科王朝[2]。
年紀細細嘅尼古拉，早就見慣大場面，四歲就着軍服陪老豆主持閱兵。自此之後盧卡申科會見外國領袖嗰陣，尼古拉經常陪響隔離，今年9月，就同老豆到北京出席閱兵儀式，同中國國家主席兩公婆習近平同彭麗媛見面，跟住又響紐約聯合國大會，同美國總統兩公婆奧巴馬同米歇爾影相[2]。
盧卡申科已經同老婆分居，傳媒話佢有唔少情婦，相信尼古拉係佢同前私人醫生嘅私生仔，雖然盧卡申科同另外兩個三十五同三十九歲嘅仔都有響政府做嘢，但係盧卡申科絕少同佢哋一齊公開露面[2]。
白俄羅斯憲法規定總統候選人需要年滿三十五歲，如果尼古拉真係要參選總統，亦要等多廿四年，但係可以修憲降低年齡限制[2]。
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
