From Wikipedia, the free encyclopedia
獨居老人,亦叫獨居長者,係指單身一人或者夫妻兩人孤獨居住嘅老人家,係現今社會問題之一。
獨居老人可能因喪偶或者無後代而獨居,亦可能因為仔女住喺其他地方而獨居。喪偶老人可以叫做鰥寡老人,而屬於後一種情況嘅老人家中國大陸又叫做空巢老人。隨住人口老化,空巢老人已經成為中國大陸社會問題之一,通常面臨比其他人嚴重心理問題[1][2]。喺高齡化嘅日本,獨居老人同樣嚴重,甚至出現好多孤獨死事件。
喺西方,由於流行核心家庭,成年仔女好少同父母同住,老人獨居好常見。無仔女獨居長者一般處於社會弱勢,唔單只面對心理問題,經濟上亦往往面對困難。一啲獨居老人喺死咗幾日後先被發現。歐盟有對獨居長者嘅強制走訪制度,但係台灣等地依家仲未有噉嘅制度[3][4]。
空巢老人係指缺乏子女照顧嘅老人家,佢哋可以係單居或者夫妻雙居。中國大陸嘅空巢老人大致上可以分為三類,第一類係無仔無女無老伴嘅孤寡老人、第二類係有仔女同佢哋分開單住嘅老人,第三類就係仔女喺外地,好難成日返家鄉成日照顧佢哋。
國務院2017年公佈嘅《「十三五」國家老齡事業發展和養老體系建設規劃》指出,預計到2020年,全國60歲以上老年人口將會增加至2.55億人左右,獨居同空巢老年人將增加到1.18億人左右。隨住內地老齡人口不斷增長,空巢家庭亦會相應增加。
古代「孤」同「獨」唔同義,例如《禮記‧禮運‧大同篇》:「故人不獨親其親,不獨子其子。使老有所終,壯有所用,幼有所長,鰥寡孤獨廢疾者皆有所養」當中「孤」係「幼年喪父或者父母雙亡」,即係孤兒[5];「獨」是「老而無子」[6]。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.