狗
動物 From Wikipedia, the free encyclopedia
 | ||||||||||||||||||||||||||
|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|
| ||||||||||||||||||||||||||
| 物種分類 | ||||||||||||||||||||||||||
| ||||||||||||||||||||||||||
| Canis lupus familiaris Linnaeus，1758 | ||||||||||||||||||||||||||
狗一個唔尋常嘅特性係巨大嘅內部差異：喺大約公元前13,000至12,000年嗰陣，狗經已俾人類馴養咗；打後嘅人一路都有養狗同訓練狗，用佢哋嚟做看門口、牧羊、打獵、拖雪橇、幫差人捉賊、做導盲犬同埋做狗醫生等嘅多種工作，而狗喺身體特徵上亦都因為呢個過程而有咗相當大嘅內部差異－到咗廿一世紀，狗品種經已有成幾百個咁多，由俾人養嚟拖雪橇而變得又大隻（成年嘅公可以成 27 公斤重）又跑得快嘅哈士奇（Husky）以至得嗰幾公斤重嘅芝娃娃（Chihuahua）都屬於狗（彼此之間能夠配種，生有生殖能力嘅後代）[7]，而狗嘅毛皮顏色由白、黑、紅、灰、金黃同啡都有[8]。
人同狗之間嘅關係密切：研究指，狗因為同人相處咗咁漫長嘅時間，進化到好識睇人嘅眉頭眼額[9]，會（例如）主動親近人同埋喺主人發嬲嗰陣知驚；現代人好興養狗嚟做寵物，會將狗視為屋企人噉，而狗仲因為佢哋同人嘅緊密關係而俾人稱為「人類最好嘅朋友」（man's best friend）[10]。
詞源
狗嘅學名係「Canis lupus familiaris」或者「Canis familiaris」。狗同狼（學名：Canis lupus）係近親，兩種動物遺傳上接近到能夠配種生出有生育能力嘅後代，所以喺生物學上可以算係同一個物種，而同狼比起嚟，狗嘅馴化程度高，對人類友好，所以就叫「Canis lupus familiaris」－當中「familiris」係拉丁文「屋企人」或者「友好」噉解，所以狗嘅學名成個字可以解做「（對人類）友好嘅狼」噉嘅意思[11]。
考古證據
早期標本
最近發現嘅好多標本被認為係舊石器時代嘅狗，但係佢哋嘅分類仲存在爭議。呢啲係喺歐洲或者西伯利亞發現嘅，可以追溯到40,000至17,000年前。其中包括德國嘅霍勒費爾斯、比利時嘅戈耶特洞穴、捷克共和國嘅普雷德莫斯蒂，以及俄羅斯嘅四處遺址：阿爾泰共和國嘅拉茲博伊尼奇亞洞穴、科斯特永基-8、薩哈共和國嘅烏拉漢蘇拉同俄羅斯平原嘅葉利謝維奇1。法國肖維岩洞中發現嘅距今26,000年前嘅爪印被認為係狗嘅爪印，但亦有質疑稱呢啲爪印係狼留低嘅[12]。
仲有好多後來提出嘅舊石器時代狗，佢嘅分類仲未得到證實。其中包括來自德國、瑞士以及烏克蘭嘅許多標本。根據形態同發現地點嘅考古遺址，一組可追溯到15,000至13,500年前嘅標本已經被確定為家養狗。其中包括來自西班牙、法國同德國。喺呢個時期之後，人哋喺歐亞大陸各地嘅考古遺址中發現咗家養犬嘅遺骸[12]。
由於對舊石器時代狗標本所代表嘅意義存在爭議，所以距今15,000至40,000年前之間可能存在狗嘅馴化，呢一點仲未清楚。呢個係因為犬屬形態嘅靈活性，以及狼犬同家犬喺形態上非常相似。呢個亦都係因為可供分析嘅更新世狼標本稀少，所以佢哋嘅形態變化未知。棲息地類型、氣候同獵物專門化極大地改變咗灰狼種群嘅形態可塑性，從而形成咗一系列喺形態、遺傳同生態上唔同嘅狼形態類型。由於冇基礎數據，動物考古學家好難區分狗馴化嘅初始指標同各種類型嘅晚更新世狼生態形態，呢個可能導致早期狗同狼嘅錯誤識別。此外，喺馴化過程中，犬科動物同當地狼群持續進行史前混合，可能導致佢嘅行為被馴化，但形態就好似狼。只係透過形態學分析嚟識別早期馴服嘅狼、狼狗或者原始狗可能係唔可能實現嘅，除非進行基因分析[12]。
狗馴化
目前普遍認為，最早嘅家犬遺骸係喺德國波恩-奧伯卡塞爾發現嘅。環境、同位素、基因同形態學證據表明，呢隻狗唔係當地嘅狼。 呢隻狗可追溯到14,223年前，被發現時佢同一男一女埋埋一齊，三人都被噴灑咗紅色赤鐵礦粉末，並埋喺巨大而厚嘅玄武岩塊下。呢隻狗因為患犬瘟熱而死。呢個時間表明，狗係狩獵採集時代第一個被馴化嘅物種，而農業出現之前。 更早嘅可追溯到3萬年前嘅遺骸被描述為舊石器時代嘅狗，但佢哋到底係狗定係狼仍然存在爭議因為喺晚更新世，狼之間存在相當大嘅形態多樣性。
DNA序列表明，所有古代同現代嘅狗都有共同嘅祖先，而且都來自一個古老、滅絕嘅狼種群，同任何現代狼譜系都唔同。有啲研究認為，所有現存嘅狼彼此之間嘅關係比同狗之間嘅關係更密切，而另一啲研究則認為，狗同現代歐亞狼之間嘅關係比同美洲狼之間嘅關係更密切[13]。
狗係一種家養動物，好可能係透過共生途徑被馴化嘅（即係，野狗食營地入面嘅垃圾，最初並冇畀人類帶嚟好處，亦冇畀人類帶嚟傷害）。時何地被馴化嘅，目前仍然唔清楚。基因研究表明，馴化過程始於25,000多年前，喺歐洲、北極高地或東亞嘅一個或多個狼群中開始。2021年，一項對現有證據嘅文獻綜述推斷，狗係喺23,000年前由古代北西伯利亞人喺西伯利亞馴化嘅，後來向東分散到美洲，向西分散到歐亞大陸，狗好可能陪伴住第一批居住喺美洲嘅人類。一啲研究表明，已經滅絕嘅日本狼同家犬嘅祖先有着密切嘅關係[13]。
2018年嘅一項研究發現咗現代狗同現代狼之間存在429個差異嘅基因。由於呢啲基因嘅差異亦都可以喺古代狗化石中發現，所以呢啲差異被認為係最初馴化嘅結果，而唔係最近嘅品種形成嘅結果。呢啲基因同神經嵴同中樞神經系統發育有關。呢啲基因影響胚胎發生，並能夠導致馴服、下頜較小、耳朵鬆軟以及顱面發育遲緩，呢啲特徵將家養狗同狼區分開嚟，被認為反映咗馴化綜合症。研究得出結論，喺早期狗馴化過程中，最初嘅選擇係行為。呢種特性受到神經嵴基因嘅影響，從而導致咗現代狗所觀察到嘅表現型[14]。
人類歷史上最重要嘅轉變之一係動物嘅馴化，佢始於3萬多年前狼同狩獵採集者之間嘅長期交往[15]。狗係第一個被人類馴化嘅物種，都係唯一一個被人類馴化嘅大型食肉動物[16]。
已知最古老嘅狗骨骼係喺西伯利亞嘅阿爾泰山脈同比利時嘅一個洞穴入面發現嘅，可以追溯到大約33,000年前。研究表明，呢個可能表明狗嘅馴化係喺唔同嘅地理位置同時發生嘅[17]。
狗品種
特性
睇埋：狼
打獵
狗曉好似狼噉打獵，而且相當擅長做呢樣嘢。狗可以單獨打獵又得，（好似狼噉）成群噉打獵都得[18]。
Info：狼嘅打獵
一群狼圍住咗一隻美洲野牛；隻牛今次睇怕都走唔甩。 狼最主要嘅覓食方式係打獵，而且相當擅長做呢樣嘢。狼可以單獨打獵又得，成群噉打獵都得，就算係一隻獨行嘅狼，都有能力殺死駝鹿等嘅大型獵物，而且有研究指單獨或者成雙成對打獵嘅狼打獵嘅成功率可能仲高過成大群噉打獵嘅狼[18]。
狼嘅體能好勁：喺行路嗰陣，狼通常會用大步跑，並且喺跑嗰時將要行前嗰隻腳擺喺跟尾嗰隻腳嘅正前方，而佢哋可以用呢個方法一路以時速 8 至 9 公里（5.0 - 5.6 哩每小時）移動[19]，係噉行成幾個鐘頭咁耐。喺空曠嘅地方（冇積雪等嘅嘢阻住），一隻狼可以話咁快就加速到去時速 50 至 60 公里（31 - 37 哩每小時）。佢哋一吓可以跳到 5 米嘅距離，而且能夠維持高速奔跑最少 20 分鐘[20]。狼嘅高耐力表示佢哋有能力使用堅持式打獵（persistence hunting），而佢哋嘅跳躍力喺捉細獵物嗰時特別有用[20]。
狼嘅各種感官對佢哋打獵好有用：狼嘅嗅覺冇打獵用嘅狗咁勁，只能夠探測由 2 至 3 公里（1.2 至 1.9 英哩）嘅距離隨風而嚟嘅腐肉嘅除，要捉好識匿埋嘅野免或者雀仔有啲難，但能夠輕易追蹤留低冇耐嘅氣味，所以要獵食大型動物完全冇問題；狼嘅聽覺亦都好敏銳，能夠聽到頻率係26千赫嘅聲[21]－即係喺秋天可以聽到樹葉跌落地嘅聲。狼啲感官咁敏銳，代表中至大型嘅動物好難避得開狼嘅追蹤[22]。
食腐
狗同狼一樣，喺唔夠嘢食嗰陣會去食腐肉（carrion；動物屍體上腐爛嘅肉）[23]，而喺歐亞大陸某啲多人類活動嘅地區，狗會走去食垃圾[24]。
狗群組成
地盤性
狗係一種有地盤性嘅動物：一隻狗主要有兩種方法話俾第啲狗群知「呢帶係我地頭」－嚎叫（howling）同氣味標識（scent marking）[23]。嚎叫指隻狗向天叫，等周圍一帶都聽到佢把聲同知佢存在，呢種行為喺狼身上都見得到；但一般認為，氣味標識比嚎叫更加有效，氣味標識指隻狗喺自己地頭嘅某啲地方屙低尿[25]，令到嗰啲地方有自己陣除。
狼對狗
因為狼同狗都係強勢嘅食肉動物，所以兩者成日都會打交[26]。單打獨鬥嘅話，狗通常都會俾狼殺死，而且爭嘢食唔會夠狼爭；但狼群通常狼數唔多（頂櫳得嗰十零隻，當中得兩三隻成年），而且如果佢哋喺人類多嘅地區同狗碰頭，狗會喺數量上佔重大優勢之餘仲有人類撐佢哋，所以喺呢種情況下，狼多數唔夠狗打[27][28]。
狼有時會殺狗，而某啲個別地區嘅狼族群仲興以狗肉做重要糧食來源。例如喺克羅地亞，狼殺狗殺得多過殺綿羊，俄羅斯嘅狼據講會壓制流浪狗嘅數量，而喺廿一世紀初嘅斯堪的納維亞同美國威斯康辛州，狼攻擊狗俾人視為一個生態問題[29]；狼可能會喺人類屋企附近或者森林當中攻擊狗[29]，會殺死多種嘅獵狗，當中年紀大嘅狗最受影響，因為呢啲狗唔似得後生啲嘅狗咁細膽，往往唔曉驚同避開狼，不過有啲大型嘅狗種可以同狼打交打到不相上下[29]。值得一提嘅係，狼攻擊起有人陪伴嘅狗上嚟，好多時會狼死得好交關，仲會忽視隻狗身邊嘅人[30]。
根據紀錄，全世界每年俾狼殺嘅狗數量查實好少，但「狼殺狗」嘅現象就引起唔少人為佢哋啲狗擔憂：喺唔少文化當中，人都視狗為好朋友，當佢哋係屋企人同工作夥伴，而呢種對「狼會殺狗」嘅恐懼有時會令公眾支持獵人殺狼[27]。
有唔少生態學家指出，牧羊狗可以幫手減少人同狼嘅衝突，而噉做可以間接幫手保育狼[31]：牧羊狗唔係特別有攻擊性，但因為狗同狼相近，所以佢哋能夠一定程度上同狼溝通；牧羊狗能夠向狼做出一啲曖昧行為，例如係好幾隻牧羊狗一齊向住啲狼做出吠、邀請佢哋玩、或者有攻擊性嘅舉止等等嘅舉動，呢啲舉動可以干擾狼，令到佢哋無所適從（不過噉做有陣時會搞到牧羊狗冇命）[27][32]。事實係，歐亞喺歷史上不嬲有用開牧羊狗嚟抵抗狼對牲畜嘅獵食，而且頗有成效[33]。
疾病
内文：狗疾病一覽
文化
狗呢個字本係講幼犬，不過家下狗已經取代咗犬嘅意思。
各地對狗嘅睇法差異相當大，就算喺同一文化之下，亦有相反嘅睇法、意見。以「人類最好嘅朋友」嚟形容，亦有啲產品用狗做招牌，例如：Hush Puppy 鞋。重有幾隻牌子嘅煙同朱古力叫 Laika，紀念第一隻上太空嘅狗 Laika。
狗係中國嘅十二生肖之一，排尾二。
嚮以前嘅唐人社會，狗只係種農場動物，唔算寵物。除咗要來趕人趕動物，重會劏來食。大把食譜同埋藥方都有狗肉，話好補身。亦有諺語「狗肉滾幾滾，神仙都企唔穩/三六滾一滾，神仙企唔穩」，形容狗肉好食。粤語區嘅廣西有玉林狗肉節，係個一年一度嘅食宴[34]，引來好多批評。而家好多地方，食狗肉犯法，要坐監。
廣州話詞彙
同狗拏緪嘅彈多過讚。
壞話
做到隻狗噉（指做嘢辛苦）[35]、（好）狗（形容詞——卑鄙）、狗衝（狂奔）、扮死狗[36]、狗咬龜（——無埞埋手）、狗咬狗（骨）、狗咬着爛嘅（——人舐着好嘅）[37]、跟尾狗、狗仔隊[38]、落狗屎[39]（/屍）、餓狗搶屎[40]、狗口長不出象牙[41]、生咗對狗眼/狗噉眼（狗眼看人低）[42]、狗噏（㞗噏）[43]、烚熟狗頭、人多烚狗唔腍[44]、門口狗（看門狗/看家狗）、裝假狗、男人老狗[45]、好狗唔攔路、心肝當狗肺（狼心當狗肺）、打死狗講價[46]、有狗肉食就嫌狗虱/有狗肉食就咪嫌狗虱[47]、食屎狗[48]、狗公[49]、狗上瓦坑（——有條路）[50]、生滋狗（意譯——癩皮狗）、偷雞摸狗、摸狗不成流鼻涕[51]、狗屎垃圾、番狗、唐狗、癲狗、無聲狗（——咬死人）[52]、阿豬阿狗/阿貓阿狗、龍床不及狗竇[53]、（打）落水狗、趕狗入窮巷（——臨死咬番啖）、水瓜打狗（——唔見噉橛/唔見一截）、掟死狗、打狗（都要）睇主人（面）[54]、唔食狗肉飲（/撈）狗汁[55]、黑狗偷食（——白狗當災）[56]、外來狗（——養唔熟）[57]、耷尾狗、喪家狗、無狗拉隻貓[58]、細佬哥玩狗（——終歸捱一口）、小偷畀狗咬（——暗啞抵）、養狗咬荔枝[59]、閂埋門打狗、拉狗封屋、落（/拉）閘放狗、狗瘦主人羞[60]、阿崩叫狗（——越叫越走）、阿崩養狗（——轉性）、阿崩咬狗虱（——唔死有排慌）、狗死狗虱死（狗死狗虱也無命）[61]、和尚食狗肉（——一件係噉，兩件又係噉）、夏至狗（——無埞走/無得走）、食咗夏至狗（——西風兜路走）[62]、狼過華秀隻狗[63]、狗仔抬轎（——不識抬舉）[64]……
老百姓用來鬧官府中人係狗嘅詞語唔少，舊時就有嘅包括：「狗官」[65]、「狗賊」[66]、「（清朝）鷹犬」[67]、「（港英）黃皮狗」[68]……近年，香港反政府示威者多咗直接用「狗[69]」同埋「警犬」借喻香港警察[70]，指渠哋嘅人格同行為好似狗咁衰，又引申出「狗屋」（差館）[71]、「狗車」（警車）[72]、「狗糧」（差人嘅人工或者嘢食）[73]等等相關詞語嘅新用法。香港親政府示威者乃至傳媒，會將政黨熱血公民叫作「熱狗」[74]。
其他
汪汪（狗）［wou1 wou1 （gau2）］（細拏仔用）、汪星人（wong1 sing1 yan4）、熱狗（香港舊款巴士）[75]、烏嘴狗（香港舊款巴士）[76]、跑狗（澳門賽狗）、瘋狗症（狂犬病）、喂豬帶挈狗[77]、女人狗肉（其他食物）[78]……
英文傳媒術語「watchdog journalism」，有指幫人民做看門狗（英文：watchdog），監察政府同社會嘅意思[79]。喺香港，黃毓民話渠創辦嘅《癲狗日報》同埋《癲狗周刊》兩個名就帶有呢種比喻[80]；而個老闆，似乎亦都唔介意俾人順理成章，一語雙關（包括言論火爆）噉樣叫作「癲狗」。李怡試過自稱「癲狗老人」，邏輯差唔多[81]。
狗形象嘅衍生作品
科技
以上同其他純種狗，係由商人近百年整出來嘅，用咗近親交配等等方法。由於渠哋着重嘅係顧客喜好，主要係外形，令到大把狗嘅身體構造極差，易傷易病易死易黐線，大部分日子都過得唔好。部分品種，例如英國鬥牛狗，交配同埋生狗仔都下下要靠人同工具[82]。配種狗係千挑萬選嘅少數，往往俾人頻繁噉樣利用，有啲會被迫住一路忙碌，重要食春藥，搞到又傷又殘[83]。健全嘅狗，天生都有條尾，不過有唔少都會俾人切/剪走咗（成條或者部分），原因有大把——有啲唔人道[84]。
註釋
睇埋
攷
Wikiwand - on
Seamless Wikipedia browsing. On steroids.