From Wikipedia, the free encyclopedia
無軍隊嘅國家,係指無武裝力量嘅主權國家(唔包括境外領土)。武裝力量一詞係指任何由政府主導嘅防禦組織,用嚟推行政府嘅對內同對外政策。
呢尐國家嘅國防由其他國家負責,或者以特定方式取代軍事:部分列表入面嘅國家,例如冰島同摩納哥,並無設立軍隊,但係仍然有武力;有尐國家同前佔領國達成軍事協議,因此無軍隊,例如摩納哥同法國之間嘅協議[1];同美國達成《自由聯合條約》嘅馬紹爾群島、密克羅尼西亞聯邦同帛琉喺本國防務上無發言權[2][3][4];冰島同美國有一份防務協議,美國必須喺必要時要保護冰島本國嘅安全[5]。安道爾七百幾年嚟無打仗所以軍隊人數極少,主要任務只係護送國旗,必要時要求其他國家軍事支援[6]。有尐國家由於種種原因,例如政變等等,將武裝部隊解散。
其餘嘅國家自己負責防務安全,但只係保留一支人數極少嘅軍隊或者根本無軍隊。其中一尐國家,例如哥斯達黎加同海地經歷咗非軍事化進程[7][8]。其他國家成立以嚟就無軍隊,因為佢哋曾經或者依家依然得到另外一個獨立主權國家嘅軍事保護。
國家 | 說明 | 參考資料 |
---|---|---|
安道爾 | 安道爾無常備軍,但係同西班牙以及法國簽咗防務條約,少量自願軍主要係作儀式用途。警察有自己嘅反恐部隊「安道爾警察干預隊」(Grup d'Intervenció Policia d'Andorra)。 | [9][10] |
哥斯達黎加 | 哥斯達黎加係第一個正式廢除軍隊嘅國家,憲法自1949年起明文禁止設立軍隊,只有負責執法周治安嘅國民警衛隊。 | [8][11] |
格林納達 | 自1983年美國為首嘅國家入侵格林納達之後唔再設有常備軍,由格林納達皇家警察部隊負責維護治安,國防由地區安全體系負責。 | [7] |
基里巴斯 | 當地只有警察同海岸警衛隊,防務問題由澳洲同新西蘭負責。 | [12] |
列支敦士登 | 列支敦士登喺1868年規定只會喺戰時設有軍隊,只係擁有配備輕型武器嘅警察同特警隊以維持治安,不過從1868年到依家,列支敦士登未經歷過戰時狀態(響一戰同二戰都係保持中立)。 | [13] |
馬紹爾群島 | 由美國負責防務問題。 | [2] |
密克羅尼西亞聯邦 | 由美國負責防務問題,只有一支准軍事化嘅警察武裝力量。 | [3] |
瑙魯 | 根據一份非正式協議,瑙魯嘅防務由澳洲負責。 | [14] |
帛琉 | 由美國負責防務問題。 | [4] |
聖盧西亞 | 聖盧西亞皇家警察係一支准軍事化服務同治安武裝力量,防務由地區安全體系負責。 | [7] |
聖文森特和格林納丁斯 | 聖文森特和格林納丁斯皇家警衛隊係一支准軍事化服務同治安武裝力量,防務由地區安全體系負責。 | [7] |
薩摩亞 | 薩摩亞無常備軍,自1962年同新西蘭簽協議之後由新西蘭提供軍事援助。 | [15] |
所羅門群島 | 所羅門群島曾經響1998年至2006年間發生過嚴重嘅種族衝突,喺澳洲、新西蘭同其他太平洋國家嘅干預之下恢復和平,家陣無常備軍。 | [16] |
圖瓦盧 | 圖瓦盧無軍隊,不過有一個配備咗海事巡查嘅警察單位。 | [17] |
梵蒂岡 | 梵蒂岡擁有一支維持治安嘅憲兵隊伍,而瑞士近衛隊直屬聖座,唔屬於梵蒂岡。梵蒂岡同意大利之間無軍事協議,不過意大利軍隊依然非正式性地保護梵蒂岡嘅安全。梵蒂岡僅有嘅巴拉汀近衛隊同貴族近衛隊響1970年被廢除。 | [18] |
國家 | 說明 | 參考資料 |
---|---|---|
海地 | 海地軍方喺1995年6月解散,但係由於反政府武裝嘅出現而重新建立。海地有大約九千個警察,其中包括一尐准軍事化武裝力量同海岸警衛隊。不過,海地周遭國家嘅武裝力量好細,佢嘅武裝力量被認為係過量。2012年4月,海地總統提出重設軍隊,以維持局勢穩定。 | [19][20][21] |
冰島 | 冰島自1869年打後就無常備軍,不過冰島係北約成員。響1951年及2006年間,冰島防務由美國負責;喺2006年3月,美國宣布將繼續負責冰島嘅防務,但係唔會繼續駐兵。雖然冰島無常備軍,但係有一支參與海外維和任務嘅軍隊,國內亦都有警察、海岸警衛隊同特警,同挪威、丹麥同埋其他北約國家喺安全問題上有合作。 | [22][23][24][25][26][27][5] |
毛里裘斯 | 毛里裘斯自從1968年起就冇後備軍,防務、警務同保安由10000人嘅警察同海岸警衛隊負責。 | [28][29][30] |
摩納哥 | 摩納哥嘅防務由法國負責,不過依然保留兩支武裝力量,一支負責親王同司法機構嘅安全,另一支負責當地治安同消防,呢尐武裝力量都經過訓練而且配備輕型武器,另外有一支警隊負責內部保安。 | [1][31][32][33] |
巴拿馬 | 巴拿馬喺1990年廢除咗軍隊,並且響1994年嘅憲改投票案中通過,家陣保留警察、邊防等等嘅武裝力量,具有一定嘅作戰能力。 | [34] |
瓦努阿圖 | 瓦努阿圖無正規軍隊,只有警察同警衛人員300人。 | [35][36][37] |
日本 | 根據《和平憲法》第九條,日本聲稱無軍隊,但係佢嘅自衛隊係武裝力量。 | [38] |
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.