From Wikipedia, the free encyclopedia
金沙(英文:Sands;中文繁稱:澳門金沙(酒店);英文繁稱:Sands Macao (Hotel))係個金沙中國嘅架步,起喺澳門半島,響2004年5月18號開張。其中嘅主要生意為金沙娛樂場(英文:Casino Sands),博彩區域面積約為廿一萬二千平方呎;亦設五星豪華級嘅金沙酒店(英文:Hotel Sands)——客房有289間;重有餐廳、水療及文娛等設施;食肆有金沙閣、888自助餐及高雅扒房等。[1][2][3][4][5][6][7][8][9][10]
![]() | 呢篇文側重咗喺部分見解、事件或爭議。 |
2010年11月13號嘅《蘋果日報》報道
男香港人曾炳榮話:
响2009年12月14號,佢喺金沙娛樂場玩加勒比海撲克,中咗累積大獎;當時巨型電子屏幕顯示,應得金額為370萬。曾興奮到即場向同枱其餘6個賭客,每人送3,000蚊。職員跟住驗牌,大概半個鐘頭之後,竟然話畀佢知,個彩池係同其他賭場連線嘅,而有個人早過佢三分鐘,喺威尼斯人娛樂場中咗獎,贏走嗮嗰筆錢,故此佢只可以拎走由頭計過嘅30萬底價獎金,以及枱面上贏到嘅4萬蚊,一共得34萬。曾認為對方呃佢,於是响隨後嗰兩個鐘頭,喺賭場內不斷就此質疑,並要求攞出證據,可惜不得要領。職員就送出貴賓卡同直升機機票,游説佢袋住先,遲啲再投訴。曾喺無奈之下簽字就範,職員連收據都唔畀張,就由後門送咗佢走。佢一直忿忿不平,响之後嘅半年,走遍澳門各大賭場,了解加勒比海撲克嘅規則……懷疑根本就冇連線呢回事,係呢間賭場棍咗佢;其他賭場嘅大獎底價為100至300萬不等,唔會得30萬咁少。曾又話,响2011年5月,喺另外一間賭場見到有人中咗620萬嘅大獎之後,賭場再開出嚟嘅大獎底價係300萬。佢向賭場投訴多次都冇用,就揾博監局,不過一直冇回音。响2010年11月12號,再去了解時,曾得知單投訴排緊隊等處理,於是向崔世安遞信(由其他職員代接),要求討回公道。佢已經得到嘅獎金,部份用咗嚟還債,其餘嘅喺奔波於香港同澳門期間已經使嗮。
詹培忠表示:
博監局一定要盡快調查,認為呢種累積大獎派彩,賭場實有紀錄,應該向事主出示。[11]
記者指:
連續幾日多次聯絡澳門金沙娛樂場,截至2010年11月12號,都收唔到回覆。[12]
2007年2月21號嘅《蘋果日報》報道:响2007年2月20號,三個香港人——黃姓16歲叫阿彤嘅女仔、佢姓陳嘅阿媽同佢七十多歲嘅外婆一齊喺金沙娛樂場賭錢。阿彤玩老虎機中咗個74萬嘅獎;當時佢同外婆喺埋一齊,陳女士喺第二處。跟住職員嚟到,叫阿彤畀張身份證過佢哋登記;之後話佢唔夠18歲,無獎金收,就趕走咗佢哋兩個,並打電話揾嚟陳女士,將聲稱係阿彤所用過嘅四十多個代幣交低,兼勸佢走。佢哋跟住向賭場及博監局投訴,賭場最終答應調查,並話會响72個鐘頭之後答覆。陳女士個細佬收到求助,就趕去澳門嘞。同日,記者撥輪去賭場查詢,對方話研究同調查緊呢件事,亦會諮詢公司嘅法律意見,以及根據政府博彩法處理。鄭康樂表示:多年前澳門賭場都發生過同類嘅事——有個未成年人偷偷哋竄咗入賭場玩老虎機,中咗大獎,職員打算派彩時發現佢未成年,最後以此為理由冇派彩;睇返阿彤呢單嘢,按法例規定,賭場唔賠都奈佢唔何,不過可以試下打官司,由法庭裁決;然而賭場保安亦有責任,應該查下懷疑唔夠秤嘅人啲身份證。[13][14]
博監局响2007年2月23號裁決,要賭場將嗰74萬獎金派畀陳女士。雪萬龍指佢哋有調查過,又聽咗多個法律專家嘅意見,重參考埋澳門旅遊娛樂有限公司以前嘅案例,定奪阿彤係合法同冇欺詐噉樣中獎,亦考慮到法律有灰色地帶兼且有嘢唔清晰,而作出呢個決定;而陳女士帶住唔夠18歲嘅阿彤入咗賭場,代表賭場同兩母女都犯咗法——因為冇相關罰則,所以只係向金沙娛樂場作出嚴厲警告,同口頭警告兩人,重提到唔排除發出禁制令嘅可能性——例如唔准陳女士行入澳門任何賭場一排;為免事件重演,該局會盡快建議改好啲法例同建立套規範。當日稍後,賭場仍然指正喺道研究緊,暫時未決定會唔會將啲獎金派畀陳女士。[15][16][17][18]
响2007年2月24號,金沙娛樂場將全筆彩金派畀陳女士。當地賭場隨即紛紛加強管制,避免再出呢種錯。傳媒之後爭相追訪阿彤,然而收穫甚微。[19][20][21][22]
响2008年8月,綽號福建霖嘅江湖男猛人喺金沙娛樂場玩老虎機,多次擊中由之隨時可以贏大錢嘅特別獎「freegame」,然而個屏幕忽然之間唔妥,機械亦轉唔停。賭場職員打開架機檢查嘅同時,屏幕資料洗走哂。為此,福建霖向博監局投訴,後嚟被判輸。佢一度怒斥調查人員閉門造車,對賭客唔公平。[23]
由2004年5月14號或更早開始,唔知乜嘢人經幾個渠道散布謠言,話金沙娛樂場會响開幕日送泥碼,呃到好多想攞着數嘅人走過去;佢哋入咗場先至知道被棍,於是鼓噪起嚟,令到場面一片混亂。[24]
本文金額均為約數,並以港幣計算。「博監局」嘅全名係「博彩監察協調局」。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.