澳門大學

22°07′43″N 113°32′44″E

澳門大學
Universidade de Macau University of Macau
校訓	仁、義、禮、知、信
開辦	1981年3月28號（東亞大學） 1991年9月12號（澳門大學）
類型	公立大學
校監	澳門特別行政區行政長官 （賀一誠）
校長	宋永華教授
副校長	馬許願教授（全球事務） 葛偉教授（研究） 蘇基朗教授（學生事務） 高薇博士（行政事務）
教師	602
學生	10,414
校址	澳門氹仔大學大馬路
代表色	藍、紅同金
網站	http://www.umac.mo/

澳門大學

澳門大學（粵拼：ou3 mun2 daai6 hok6，葡萄牙文：Universidade de Macau；英文：University of Macau；簡稱澳大、UM/UMAC）係澳門唯一一間綜合性公立大學，世界351至400位，亞州大學排第42位，全球最佳年輕大學排名60。葡語地區大學排第二。

澳門大學前身係1981年成立嘅私立東亞大學，係澳門第一間研究型大學，又係唯一一間全面引入住宿式書院系統嘅大學。澳門大學喺2014年搬去橫琴新校區之後，明確以轉型做研究型大學為目標，仲推行以「四為一體」教育模式為主嘅「博雅教育」。根據國際論文資料庫ISI Web of Science（WOS），澳門大學嘅高端科研論文發表數量由2008年嘅127篇增至2017年嘅1,342篇，2017年澳大論文比人引用差唔多17,246次。喺晶片研究方面入選國際固態電路會議論文數量最多前10名嘅大學。澳門大學獲得中華人民共和國科學技術部批准設立「模擬與混合信號超大規模集成電路國家重點實驗室」、「智慧城市物聯網國家重點實驗室」同埋「中藥質量研究國家重點實驗室」三個國家重點實驗室。

澳門大學有人文學院、工商管理學院、教育學院、健康科學學院、法學院、社會科學學院、科技學院、中華醫藥研究院、微電子研究院、應用物理及材料工程研究所，協同創新研究所，同埋榮譽學院 ，開辦學士、碩士、博士等差唔多130個學位課程，用英文上堂。

澳門大學有10間書院，分別係曹光彪書院、鄭裕彤書院、張崑崙書院、蔡繼有書院、霍英東珍禧書院、呂志和書院、馬萬祺羅柏心書院、滿珍紀念書院、紹邦書院，同埋何鴻燊東亞書院。

澳門大學喺2019年泰晤士高等教育世界大學排名351-400，國際化排名第五，喺2019年亞太地區大學排名60，全球最佳年輕大學排名60。Quacquarelli Symonds（QS）世界大學排名也節節上升，喺2020年上升至387位。「工程與科技」與「計算機科學」排前200、喺「生命科學」排251-300、「款待及休閒管理學」 排46、「語言學」 排151-200、「法學」 排251-300位。五大學科領域：臨床醫學學科、工程學、藥理學與毒理學、計算機科學同社會科學總論進入基本科學指標資料庫（ESI）前1%。

澳門大學近年嘅排名同學術地位都有大幅提升，喺2016年成為第一間獲澳門特區政府頒發教育功績勳章嘅澳門高等院校。

攷

睇埋

• 澳門大學一覽

出面網頁

• 澳門大學