From Wikipedia, the free encyclopedia
法羅群島（法羅文：Føroyar，丹麥文：Færøerne）係一堆喺北大西洋同挪威海中間嘅群島，大約喺冰島同英國中間。法羅群島亦係附屬丹麥嘅自治國家。
.jpg)
法羅群島喺1948年開始就已經係丹麥嘅自治國家。喺呢幾十年間，法羅人已經控制晒大部分嘅嘢，只係有啲嘢重係丹麥負責，好似外交同防禦。
其實法羅群島喺1380年，挪威同瑞典建立卡爾瑪聯盟之後，已經開始屬於丹麥。卡爾瑪聯盟之後慢慢由丹麥控制，不過之後又喺1814年解散。法羅群島喺北歐理事會入面有兩個議員，係丹麥代表。
冇乜人知道法羅群島早期嘅史，只係推測有啲由愛爾蘭或者蘇格蘭嚟嘅蓋爾人修道士同隱士喺六世紀住咗喺度，佢哋帶埋啲綿羊同山羊，重有古代嘅蓋爾話去到法羅群島。一個愛爾蘭修道士聖布倫丹，話佢去過法羅群島兩到三次（512–530），重將其中兩個島改叫「綿羊島」同埋「雀天堂島」。
之後去到650年，北歐日爾曼人開始喺法羅群島住，佢哋講嘅Old Norse話重變埋今時今日嘅法羅文。
有人認為，呢啲人唔係直接由斯堪的納維亞嚟到法羅群島住，而係喺愛爾蘭海同埋蘇格蘭蘇格蘭西群島一帶，昔德蘭群島、奧克尼群島等等嘅地方嚟。根據法羅群島政府所講，北歐嘅話同埋文化都係由住喺法羅群島嘅日爾曼人而來。[2]
根據《法羅史詩》，為咗逃避金髮王夏留德嘅獨裁而走嘅挪威人，喺九世紀尾去到法羅群島。十一世紀初，布理斯鐵之子斯格蒙鐸（Sigmundur Brestisson）呢個喺法羅群島南面啲島住嘅大家族差啲俾北面啲島住嘅人整死晒，佢哋走返挪威，但又俾挪威王奧拉夫一世叫返去攞地。佢將基督教帶咗去法羅群島，即使佢後來俾人殺咗，挪威人佔領時代就咁開始，直到1380年挪威同丹麥入咗Kalmar Union，丹麥就慢慢控制咗個島。1538年，法羅群島開始宗教改革。卡爾瑪聯盟喺1814年簽咗條《基爾條約》之後散咗，法羅群島自此俾丹麥控制。
1940年4月12號，因為德國進攻丹麥，英國佔領咗法羅群島，以加強控制北大西洋。喺1942到43年，英國皇家工程師起咗法羅群島第一個機場————位於華嘉島嘅華嘉機場。戰後英國畀番個島丹麥，1948年因權力下放，法羅群島得到高度自治權。1973年法羅群島放棄聯同丹麥加入歐洲共同體（而家叫歐盟）嘅機會。1990年代早期，法羅群島因為魚業爆煲搞到有好大嘅財政問題，之後因為經濟開始多元化所以先無事。支持獨立嘅人愈嚟愈多，重係共和黨嘅目標。
法羅群島政府負責本地行政。政府阿頭係總理（Løgmaður，字面意思係「法律人」），總理同時係內閣（Landsstýrið）嘅首腦。
今時今日，法羅群島每個區都有各自嘅選舉，投呢個島嘅議員同埋去丹麥代表佢哋嘅議員。有七個唔同嘅選區（sýsla，複數sýslur，字面意思係「警務分區」）選唔同嘅議員。選區劃分基本上跟傳統分區嘅劃分，但係最大嘅史特理莫于區就分成南北兩個選區。 法羅群島議會係每四年選一次，由上述七個選區用比例代表制去投出三十三個議員。
由1388年開始，法羅群島就俾丹麥控制。1814年簽嗰份《基爾條約》令到法羅群島原主挪威俾瑞典控制。同時，法羅群島、冰島同埋格陵蘭就畀咗丹麥。隨後，喺1816年，法羅議會（Løgting）被丹麥取消咗，法羅群島由丹麥直接控制，變成其中一個縣。喺1851年，議會又恢復番，但係只係幫當時嘅州長做諮詢，直到1948年。
第二次世界大戰完咗之後，有啲居民想自丹麥獨立，1946年9月14號搞咗個關於獨立嘅公投，呢個係一個諮詢性嘅公投，國會唔一定要跟住個投票結果去做。呢次係法羅群島人第一次被問到究竟佢哋想獨立定係繼續做丹麥嘅一部分。最後得少數人理呢個公投，個議會最後都唔可以就個結果達成共識，最後因為呢啲解決唔到嘅問題最後搞到聯盟瓦解。幾個月之後，有一次議會選舉，唔想獨立嘅政黨成功攞到多啲議席，重組埋聯盟，最後佢哋成功反對獨立。之後，件事和解，丹麥國民議會簽咗個由1948年開始有效嘅權力下放法。法羅群島唔再係丹麥嘅一個縣，而係由有高度自治嘅法羅群島政府管理。
而家，一半法羅人想獨立，另一半想留番喺丹麥。而每邊又有好多唔同嘅見解。想獨立嘅人之中，有啲想要即時單方面獨立、又有啲想慢慢嚟，同丹麥方面慢慢傾到對方肯畀佢哋獨立。而想留番喺丹麥嘅人就想喺丹麥統治之下，繼續有多啲自治權。
喺兩份羅馬條約入面好明確咁話法羅群島唔係歐盟成員。另外，根據《關於丹麥加入歐洲共同體嘅條約》，住喺法羅群島嘅丹麥人唔當係條約入面嘅丹麥公民。所以，佢哋唔係歐州公民（不過其他歐洲國家嘅公民就算住喺法羅群島，都係歐洲公民）。法羅人並無神根公約入面嘅權利，但係由法羅群島往返神根國家係無邊境限制（法羅群島自1966年起已經係北歐護照聯盟成員。2001年起根據神根公約，法羅群島往返北歐同其他神根公約國再冇邊境檢查）[3]。
行政上嚟講，法羅群島分咗34個地區（kommunur），管住120幾個城或者村。
傳統上，法羅群島有六個分區，包括北島區（Norðoyar）、東島區（Eysturoy）、史特理莫于區（Streymoy）、華嘉島區（Vága）、山道于區（Sandoy）同埋南島區（Suðuroy）。早期，每個分區都有自己嘅法院（Várting）。
喺2005年1月1號，法羅群島有34個地區：
| 地區 | 人口 | 人口密度（每平方公里） | 面積（平方公里） | Markatal | 島 | 區域 |
|---|---|---|---|---|---|---|
| Tórshavnar kommuna | 19,339 | 112 | 173 | 327 | Streymoy | Tórshavn |
| Klaksvík | 4,886 | 57 | 86 | 144 | Borðoy | Klaksvík |
| Runavík | 3,678 | 47 | 78 | 150 | Eysturoy | 南Eysturoy |
| Tvøroyri | 1,819 | 42 | 43 | 60 | Suðuroy | Suðuroy |
| Fuglafjørður | 1,584 | 70 | 23 | 32 | Eysturoy | 北Eysturoy |
| Sunda Kommuna | 1,564 | 10 | 158 | 152 | Eysturoy | 北Eysturoy |
| Vágur | 1,402 | 67 | 21 | 61 | Suðuroy | Suðuroy |
| Nes | 1,238 | 88 | 14 | 40 | Eysturoy | 南Eysturoy |
| Vestmanna | 1,234 | 24 | 52 | 56 | Streymoy | Streymoy |
| Miðvágur | 1,100 | 24 | 47 | 48 | Vágar | Vágar |
| Sørvágur | 1,071 | 13 | 84 | 124 | Vágar | Vágar |
| Gøtu Kommuna | 1,066 | 35 | 31 | 69 | Eysturoy | 南Eysturoy |
| Sjóvar Kommuna | 1,027 | 31 | 33 | 70 | Eysturoy | 南Eysturoy |
| Leirvík | 873 | 79 | 11 | 33 | Eysturoy | 南Eysturoy |
| Sandavágur | 797 | 13 | 61 | 48 | Vágar | Vágar |
| Hvalba | 765 | 19 | 40 | 99 | Suðuroy | Suðuroy |
| Eiði | 705 | 19 | 37 | 49 | Eysturoy | 北Eysturoy |
| Kvívík | 615 | 13 | 49 | 75 | Streymoy | Streymoy |
| Sandur | 586 | 12 | 48 | 97 | Sandoy | Sandoy |
| Skopun | 507 | 56 | 9 | 0 | Sandoy | Sandoy |
| Hvannasund | 441 | 13 | 33 | 38 | Viðoy and Borðoy | Klaksvík |
| Sumba | 383 | 15 | 25 | 64 | Suðuroy | Suðuroy |
| Viðareiði | 339 | 11 | 30 | 48 | Viðoy | Norðoyggjar |
| Porkeri | 333 | 24 | 14 | 37 | Suðuroy | Suðuroy |
| Skálavík | 183 | 6 | 29 | 24 | Sandoy | Sandoy |
| Kunoy | 157 | 4 | 35 | 65 | Kunoy | Norðoyggjar |
| Húsavík | 131 | 5 | 26 | 66 | Sandoy | Sandoy |
| Hov | 125 | 12 | 10 | 24 | Suðuroy | Suðuroy |
| Fámjin | 113 | 9 | 13 | 24 | Suðuroy | Suðuroy |
| Funningur | 75 | 4 | 18 | 15 | Eysturoy | 北Eysturoy |
| Húsar | 61 | 4 | 16 | 41 | Kalsoy | Norðoyggjar |
| Skúvoy | 57 | 4 | 13 | 73 | Skúvoy | Sandoy |
| Svínoy | 52 | 2 | 27 | 23 | Svínoy | Norðoyggjar |
| Fugloy | 44 | 4 | 11 | 14 | Fugloy | Norðoyggjar |
法羅群島係一組有18個主島嘅島群，距離北歐海岸綫655公里，喺挪威海同北大西洋中間、冰島同挪威中間，最近嘅地方係蘇格蘭嘅Northern同埋Western Isles。
法羅群島座標係62°00′N 06°47′W。
法羅群島有1399平方公里（540平方英里）咁大，又無主要海流同湖。法羅群島有1117公里長嘅海岸綫[4]。唯一一個大嘅無人島係Lítla Dímun。
法羅群島海岸通常都係懸崖，最高點係Slættaratindur，有海拔882米咁高。法羅群島亦有低過海拔嘅地。
法羅群島地質主要係火山岩，係古近紀嘅圖里恩高原一部分。[5]
.JPG)
1990年代初，因為法羅群島漁業泡沫爆破，搞到法羅群島經濟變差，最後喺1990年代中期失業率升到10至15%[6]。喺1990年代尾，失業率開始跌，1998年尾跌到6%[6]，2008年6月更加跌到1.1%，不過2009年初又升番上3.4%。[6]。不過，嗰時成個經濟靠漁業同養漁業嘅情況重繼續緊，即係個經濟重係好脆弱。法羅人同格陵蘭於是就唔理由North Atlantic Fisheries Organization（NAFO）設定嘅限捕魚數嘅配額。
法羅群島20%嘅收入係來自丹麥嘅經濟援助，等如法羅群島每年一半嘅支出[7]。
由2000年開始，法羅群島為咗吸引新嘅投資者，開始咗企業計劃同引入新資訊科技。漢堡王喺雷神港開分店係法羅文化全球化嘅一個里程碑，不過，呢個計劃可唔可以整大法羅群島經濟基礎就重未知。法羅群島係最低失業率嘅歐洲地方之一，但係呢樣嘢唔可以話係因為經濟復甦，因為好多後生仔都喺讀完中學之後去咗丹麥或者其他國家，重搞到法羅群島剩番好多可能冇乜技能同知識嘅中年同埋老年人，去打啲啱啱先喺法羅群島出現嘅工。2008年，法羅群島借咗五千二百萬畀冰島，去解決冰島銀行嘅危機[8]。
華嘉機場有飛機來回華嘉島，最大嘅航空公司係大西洋航空。
因為法羅群島國土細同多岩石，所以運輸系統冇其他地方咁好。不過而家情況開始變，基建起得如火如荼。80%住喺法羅群島嘅人都可以用隧道、橋或者堤道去三個最大嘅島同埋東北另外三個大島。而另外兩個大島就可以搭最新嘅快船去其他主要地方。除咗七個細島（當中有6個得1條村）之外，其他島嘅村都有馬路去其他同島嘅村。
法羅群島文化係由北歐日爾曼文化而來。法羅群島係冇以前歐洲嗰啲文化運動，即係佢哋維持住佢哋嘅傳統文化。法羅群島人講嘅法羅文係屬於印歐語系日爾曼語族斯堪的納維亞語支，由喺維京時代喺斯堪的那維亞通用嘅古諾爾斯文演變而成，而古諾爾斯文亦都係冰島文嘅祖先，所以同法羅文有好多相似嘅地方。直到15世紀，法羅話嘅拼音都係同冰島文同挪威文一樣，但係1538年有個改革，丹麥人唔畀拼音文用喺學校、教會同埋官方文件。雖然法羅群島人重係講法羅話，但係之後300年法羅話係寫唔到，即係所有詩同故仔都只係可以口頭上講。作品分做幾個唔同嘅範疇，有歷史（sagnir）、故仔（ævintýr）同埋民歌（kvæði）等，通常都變做歌或者舞。19世紀，法羅話終於寫得番。
根據柯本氣候分類法，法羅群島係屬於海洋性氣候（cfc）。法羅群島氣候俾大西洋嘅北大西洋暖流嘅熱力影響得好勁，加埋其他暖空氣，所以冬暖（平均3-4℃）夏涼（平均9.5-10.5℃）。
法羅群島大風、多雲、多雨（平均每年有260日落雨）同埋涼。法羅群島喺向東北流嘅path of depressions，咁即係全年都有機會有大風同埋暴雨，反轉來講，見到天晴嘅日子好少，而陰天就好多。喺1966年9月5號，有個颶風Faith吹咗去法羅群島，搞到有超過100英里每小時嘅風速，不過之後都冇乜風吹去法羅群島[10]。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
