油塘
From Wikipedia, the free encyclopedia
From Wikipedia, the free encyclopedia
油塘（Yau Tong），又舊寫游塘，係香港一地，亦係一灣，歸入新九龍，響新九龍東南邊，藍田同三家村之間。油塘對出係個海灣，都係叫油塘，或者油塘灣、觀塘仔灣。個灣南北都係個半島，北嘅叫茶果嶺。油塘對住維多利亞港，近鯉魚門嗰邊。油塘以前係漁村同鄉郊，家下係工業區同住宅區。而家油塘更加擁有一份社區報，叫做《集油》。
1920年代，油塘重未發展。當時油塘係灣，開口向東。灣北岸有村叫茶果嶺（Rocky Hill），以後面個山為名，山高498呎。茶果嶺村係以採石而名，係九龍四山之一。灣𡰪有條涌，由下灣山（Hai Wan）同五鬼山（Black Hill，今五桂山）山坳，直流入灣[1]。
而茶果嶺同五鬼山山腳有谷，即係油塘通去鹹田（今日藍田）之處，以前係條又長又窄嘅田地，所以呢塊田嗰條村叫長龍田。家下已經係油塘邨[1]。
灣南係三家村後山元嶺仔，比較矮，得150呎，自成一個半島[1]。
油塘二戰前並無乜嘢發展，主要1841年英人得到香港島之後，要大興土木。附近茶果嶺同鯉魚門盛產麻石，有客家打石工聚集成村，開石賣去香港島甚至省城。不過主要活動都唔係灣內。茶菓嶺村一直向西岸伸展。其後，採石業衰落，油塘一帶並冇乜進展。
二戰後，香港逐漸回復繁榮，但油塘未有即時發展。戰後地圖所示，茶果嶺村西遷茶果嶺西岸，茶果嶺南岸原村變成官塘仔村（Kwun Tong Tsai）。因而，油塘灣又叫做官塘仔灣。長龍田村（Cheung Lung Tin）重喺度。灣北叾有Shui Tong Min O村，灣南叾村鯉魚門澳（Lei Yue Mun O）。鯉魚門澳後係嶺南新村。油塘灣南岸重有村元嶺仔（Yuen Ling Tsai）[2]。
1950年代尾，香港政府為咗港口需要，將呢度海皮規劃畀船廠用。因為水源豐足，可以儲水，就批地畀人起木廠。除咗用地之外，計劃起鯉魚門道同茶果嶺道，北通官塘，南通鯉魚門[2][3]。
1960年代，油塘已經俾政府劃做一油塘區。佢北面係官塘區，南面係鯉魚門區[3]。因為人口壓力，香港政府喺鯉魚門道側邊起公屋，1964年開始起成油塘邨同高超道邨，重將近岸一帶起成工業區。鯉魚門道起好後，有巴士以呢區做總站。
雖然油塘喺九龍，不過紿終偏埋一邊，遠離鬧市，交通唔方便。1968年政府請嘅顧問公司有報告，建議起集體運輸系統，即係後來嘅地鐵。計劃觀塘綫一直伸到鯉魚門，重喺油塘設站。不過因為唔夠錢，冇人孭得起成個計劃。最後個計劃大規模縮減，地鐵觀塘綫通車時，係冇喺油塘設站。直至到政府要起將軍澳綫，先設返油塘站，到2002年8月通車先有得坐地鐵。
1990年代清拆重建，舊一批公屋開始拆，以新樓代替。所以有段時間人口大跌。不過經過開山劈石，大型屋邨亦相繼落成，人口大增。工業方面，香港製造業因為1980年代搬晒返大陸，已經奄奄一息，工廠大廈唔係丟空就係拆。家下油塘主要係以重建公屋同居屋為主。
油塘主要嘅馬路係鯉魚門道，到家下都係由觀塘到鯉魚門之間嘅要道。響1967年顧問公司曾經建議起快速鐵路去油塘，會起個地鐵站響油塘邨度，不過呢個計劃一直都冇實行，直至地鐵起將軍澳綫，先至起油塘站。得意嘅係，油塘站最初計劃個名唔係叫油塘站，而係叫Ma Yau Tong Station。呢個可能係同藍田對上馬游塘混淆。不過呢個都係推測，未有文件解釋。
而家有多條巴士同小巴線以及地鐵油塘站服務油塘區嘅交通。由於觀塘一帶更加多巴士小巴來往各區，所以都唔少人選擇喺觀塘轉車進出油塘。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
