櫻桃小丸子

櫻桃小丸子（粵拼：jing1 tou4 siu2 jyun4 zi2；ちびまる子ちゃん）係套日本嘅漫畫同動畫，原作漫畫由作者櫻桃子（日文：さくらももこ）於1986年8月至到1996年6月喺RIBON雜誌上連載，2002至2016年喺RIBON作不定期連載，總共17本單行本。爾部漫畫嘅故事發生喺1970年代，作者加入咗自己細嗰時嘅經歷入去。動畫版喺1990年開始製作並播出，到咗2006年重改拍成真人版電影。

另外喺2007至2011年，櫻桃小丸子嘅4格漫畫喺多份報紙上刊登。4格漫畫改以現代為舞台。

櫻桃小丸子嘅形象非常深入人心，爾部作品成為咗日本文化嘅一部份，唔單止喺日本等亞洲地區播出，喺德國等歐美國家都有配音版本播映。

櫻桃子喺2018年逝世之後，櫻桃小丸子漫畫改由Sakura Production職員畫，並由2019年10月開始喺RIBON作不定期連載。

播映

喺香港，1995年櫻桃小丸子首次喺香港有線電視兒童台播映，小丸子嘅配音員係「張雪儀」，之後1997年到1998年喺無綫電視翡翠台播映，2004年到2007年雙喺無綫兒童台（前身係TVBQ）播映。呢部動畫片除咗日本原版配音，喺香港、台灣同中國大陸三個地區都有唔同嘅配音版本，小丸子嘅配音員日本係Tarako，香港係鄭麗麗，台灣係馮友微同林凱羚，中國大陸係鄧玉婷。

喺德國，2000年8月28號到2000年11月3號先喺Super RTL電視台播映咗就得52集嘅德文配音版。

2008年2月10號，香港翡翠台為配合農曆新年，將真人版用《福星高照小丸子》呢個名播映。