楊超發

楊超發（英文：Dr. Yeung Chiu Fat, Henry）係香港醫生，香港西醫工會前會長，親中派人士，因為參與香港政治，佢工會會長身份同埋工會2020年被爆一啲稅務同埋帳目嘅違法爭議，得到一啲香港人嘅關注，但佢喺2021年差32票連任失敗^[1]。

政治立場

楊超發一直被人當係親中派人士，曾經組織反對港獨，仲叫行家去粵港澳大灣區發展^[2]，但係立場新聞喺2020年11月報道，佢曾經至少兩次參加反送中遊行，畀某啲人話佢騎牆^[3]。

成立「反港獨西醫前線」

楊超發喺2016年曾經成立「反港獨西醫前線」，並以「反港獨、反壟斷、衹對事、不對人、愛中國、護香港」為參選口號^[3][4]。

反送中運動期間表現

蘋果日報 9 月一篇報導入面，披露楊超發喺西醫工會嘅內部錄音，佢形容「反送中」事件係「暴動，嗰時四圍都有炸彈，又堵路呀嗰啲」。

不過，立場新聞喺2020年11月報道，佢曾經至少兩次參加反送中遊行，同其他遊行人士一樣著黑衫、掛上白絲帶。立場新聞又獲得多張佢嘅自拍照片。立場新聞之後向楊超發查詢，佢就話有啲遊行有參加，有啲無，又話唔想講政治嘅嘢。有熟悉楊超發嘅西醫工會會員就批評，楊超發嘅做法係「食兩家茶禮」、「騎牆派」，對佢嘅舉動感到莫名其妙^[3]。

爭議

西醫工會稅務同埋帳目嘅違法爭議

西醫工會自創立以來，一直都係楊超發做會長。但係喺2020年，西醫工會就曾經被多次揭發涉及稅務同埋帳目嘅爭議。

2020年9月，有報道提及，曾經有工會嘅幹事對賬目提出質疑，要求涉事人員提交資料解釋，反而畀楊超發攻擊，話佢破壞工會聲譽，楊超發仲開幹事會提出動議，聲明嗰個幹事一切言行唔再代表工會，而嗰個動議仲要喺未獲得大多數支持票下通過^[5][4]。

2020年11月，有報道話工會自成立以來一直無報稅，懷疑違反《稅務條例》，事件畀西醫工會副會長梁漢輝揭發，並向稅務局投訴，楊超發回應事件嗰陣就不置可否，而本身做稅務工作嘅會計界前立法會議員梁繼昌就話，雖然好多項目可以豁免交稅，但係工會未有報稅，相信就係違反咗《稅務條例》，稅務局要認真調查及跟進^[6]。

涉嫌挪用公帑做私人消遣同埋資助老婆

2020年11月，西醫工會副會長梁漢輝指控楊超發喺2019年1月以「Tsim Sha Tsui Study Group meeting」為名舉辦活動，並且得到一間奶製品公司贊助，但係當晚席上大多都唔係醫生或者西醫工會會員，大部分時間都係唱卡啦OK、抽獎、晚飯。楊超發被問到嘅時候，就拒絕評論事件。另外，梁漢輝又指控，喺每年周年晚宴，西醫工會都會畀3000 至 4000 元一個表演團作為演出費用，但實際表演者包括楊超發嘅老婆，但係楊超發無做到利益申報。^[6]

參考

1. 楊超發18年來首敗選　西醫工會換莊
2. 西醫工會會長楊超發醫生暢談 CEPA帶動大灣區的醫療發展
3. 〈深藍楊超發曾組「反港獨西醫前線」 形容反送中「暴動」 照片顯示曾現身反送中遊行 | 立場報道 | 立場新聞〉。《立場新聞 Stand News》 (英文)。原著喺2020-11-19歸檔。喺2020-11-19搵到。
4. 〈蘋果踢爆︱深藍楊超發把持西醫工會18年禁查賬 曾組「反港獨西醫前線」〉。《Apple Daily 蘋果日報》 (香港中文)。原著喺2021-06-21歸檔。喺2020-11-19搵到。
5. 〈蘋果踢爆︱深藍楊超發把持西醫工會18年禁查賬 曾組「反港獨西醫前線」〉。《Apple Daily 蘋果日報》 (香港中文)。原著喺2021-06-21歸檔。喺2020-11-19搵到。
6. 〈楊超發創立西醫工會 被指成立 18 年從無報稅 楊：核數師話唔使報 梁繼昌：相信已違例 | 調查報道 | 立場新聞〉。《立場新聞 Stand News》 (英文)。原著喺2020-11-18歸檔。喺2020-11-19搵到。