朱次伯(1892年—1922年7月3號[1])係粵劇演員,白話粵劇嘅先驅,亦係文武生同粵劇平喉嘅創始人之一。首本戲《三氣周瑜》、《桃花送藥》、《夜弔白芙蓉》。門下弟子有薛覺先。
生平
朱次伯老母吳麗珍係粵劇演員[2],老豆朱基係中國同盟會革命人士[3]。朱次伯10歲入「移風社」,跟牡丹錦、師父福學戲。「移風社」歸入「優天影」之後,朱次伯就喺「優天影」做武生。後來入「祝康年」、「樂其樂」班[4]。
1911年之後,朱次伯家道中落,時常飲花酒,做戲無心機,時時交行貨。香港「寰球樂」個班主何浩泉睇朱次伯演嘅武生戲,睇見朱連續幾下「單腳車身」,呢個動作喺省港第啲名班未曾見過,當堂就贊到佢恒,將佢撬咗來「寰球樂」,特登吩咐佢咪又試交行貨[4]。喺「寰球樂」時期,朱次伯演嘅主要劇目有《夜弔白芙蓉》、《山東響馬》、《三氣周瑜》、《舉獅觀圖》、《寶玉怨婚》、《西廂待月》[5]。其中《夜弔白芙蓉》係1920年代頭由朱次伯編劇,朱次伯、新丁香耀主演[6]。
1922年7月3號晚[1],朱次伯喺廣州樂善戲院做完戲返屋企,行到去一德路同白糖橋交界,俾人用槍射死[3]。呢劑嘢令到戲班停演[4]。
藝術成就
朱次伯係白話粵劇、粵劇平喉、文武生行當嘅先驅。舊底粵劇唱戲棚官話,係金山炳帶咗白話入來。朱次伯繼續改進,將成齣戲變嗮省城白話,開創咗廣東話粵劇風潮。佢唱平喉,仲係用小武「左撇」運氣方法,胸、腹、鼻三腔共鳴。演《寶玉哭靈》做賈寶玉,小武行當做小生角色,叫樂師降低八度,用平喉唱「怨婚」同「哭靈」兩段曲[5]。
朱次伯扶掖後學。薛覺先初時喺「寰球樂」班仲係拉扯,一路跟住佢學藝。後來又俾薛喺大戲度演書僮,佢自己唱平喉,又等薛唱埋平喉,睇得觀眾歡喜,薛自不然有咗些少名氣。多得佢教路同幫扶,薛好快就做到三幫小武,後來仲成咗粵劇界一代宗師[4]。
參考
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.