本字（粵拼：bun2 zi6）係指一啲字嘅本來寫法，同時下通用嘅寫法相對。「本字」呢箇詞可以係指「字形」上嘅原本寫法，亦可以指「語彙」──平時口講但又唔知點寫或者潦隻記音字，查實有字可寫。「本字」同「正字」係兩箇唔同概念。
喺漢字嘅流傳過程中，有時字形會寫寫下變咗形，而變咗形嘅寫法成爲習慣乃至標準寫法，噉樣原先嘅寫法就嗌做時下通行寫法嘅「本字」。比如臺灣制定嘅字表入面，「教」字係標準寫法，但佢有本字，即係「敎」。
正如《說文解字》話齊：「文者，物象之本；字者，言孳乳而寖多也。」意思係喺原先嘅象形符號嘅基礎上，以六書嘅造字法（好多係用形聲法）整咗一堆字出來。因爲語文發展緊，啲人有時將啲意思寄託喺已有嘅字上面，令到呢隻字含義變多，耐咗啲人就新造隻字，分擔原字嘅意義，噉樣原字就成爲「本字」。比如：
- 「其」「箕」。「其」嘅甲骨文寫法表示佢嘅原意係「筲箕」，後來「其」以假借用法表示「佢」等等嘅含義，後來就喺「其」上面加竹字頭表示本義「箕」。
- 「舍」「捨」。原本「捨」係寫成「舍」，比如十三經入面就噉寫。後來啲人爲咗分開「宿舍」同「捨棄」，就加箇剔手邊就分開。
- 「采」「彩」「採」。「采」嘅本義就係「採摘」（據甲骨文），後來將諸如「風采」「色彩」呢啲含義加諸隻字，於是作咗「採」「彩」分流咗呢啲意義。
因爲舊時文人寫文言而唔多寫白話，而口語都係口頭承傳，所以好多講法究竟點寫啲人唔識，後來白話文運動興起，於是就有搵番本字嘅需求。對於呢啲口頭話要點樣寫，有幾種處理：
- 搵本字。但有啲時候本字可能比較古董，或者同口語發音脫節（音轉現象），要推廣無咁易。
- 訓讀，將呢箇意思寄託喺家下多人識嘅字，而唔理佢嘅字音。不過訓讀過多嘅話，會搞到字嘅讀法好亂，無益於書面化。
- 記音字。搵同音或者諧音字記音。呢種做法其實係六書嘅一種，叫「假借」，比如「然」嘅本義係「燃」（即係然係燃嘅本字），後來爲咗表達「然也」之類嘅抽象概念，就攞佢來記音。
- 作字。作隻字入去。喺粵文中係常用做法（見粵字），此外重有吳字、臺閩字、蜀字，華北地方嘅官話亦有佢哋作嘅字。
此外對於用拼音字（白話字）有番幾年嘅唐話，佢哋會將唔識寫嘅字寫成拼音，或者乾脆通篇寫拼音。
本字唔等同於正字。「正」係相對「誤」「訛」而言，而「本」祇係「原本」噉解，而無判明係咪「錯」。比如將「日曆」寫成「日歷」，會話噉係寫錯咗，正字係「日曆」，但係「嘅」同「忌」（諸如一系列嘅各家本字）之間就唔係「啱」同「錯」嘅問題。
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
