日本標準時間

日本標準時間（日文：日本標準時（にほんひょうじゅんじ Nihon Hyōjunji）；英文：Japan Standard Time，縮寫：JST），或者叫日本時間、東京標準時間，係日本全國所採用嘅時間，比世界協調時間快九個鐘（UTC+9），由獨立行政法人情報通信研究機構管理。日本目前冇實施夏令時間。

東京標準時間

東京嘅當地時間原本係UTC+9:18:59。直至1887年12月31號將東京時間校慢18分59秒改爲UTC+9（日本標準時間）。到咗1895年12月31號，日本標準時區轉為日本中央標準時間至1938年。

2013年5月22號，東京知事猪瀬直樹喺產業競爭力會議上提出將東京標準時間提前2個鐘（改為UTC+11）嘅提案，目的係加快東京金融市場嘅啟動，提高東京市場嘅競爭力。政府決定討論呢個建議^[1]。但係，之后嘅十年以上，都無具體討論過呢個提案。

日本東京夏令時間

1938年東京時間再轉返日本標準時間直至1947年。由1948年至1951年，東京實施夏令時間，到咗1952年再冇實施夏令時間。

沿革

明治天皇簽署公布嘅《標準時關聯文件》

日本標準時間係喺1886年7月13號公佈嘅明治19年勅令第51號《本初子午線經度計算法及標準時之件中制定》。1888年1月1號起，將東經135度嘅時間確定為日本標準時間，以東經135度線為日本標準時子午線。

1895年12月28號公佈（明治天皇簽署日期為1895年12月27號）、1896年1月1號施行嘅明治28年勅令第167號《標準時關聯文件》又制定咗「西部標準時」，將東經120度（UTC+8）嘅時間訂為西部標準時，比八重山群島、宮古群島同埋日本殖民統治下嘅台灣、澎湖群島用；東經135度嘅時間改稱「中央標準時」。西部標準時同中央標準時之間有1個鐘時差。

1937年9月25號公布、1937年10月1號施行嘅昭和12年勅令第529號《明治28年勅令第167號標準時關聯文件修正案》刪除《標準時關聯文件》第2條，唔要西部標準時，中央標準時改為日本標準時間。