擔保有限公司

擔保有限公司（英文：company limited by guarantee），又叫擔保公司或者保證公司^[1]（guarantee company^[2]），係有限公司一種，但係冇股份，所以亦冇股東，只有擔保人^[3][4]（有啲人會用 ｢股東｣ 字眼^[1]，其實係指擔保人），而擔保人要負嘅責任，係限於公司無法償還債務^[4]或者要清盤嗰陣，負起應承咗負責嘅資本額^[3][5][6]，叫擔保金（guaranteed amount^[4]），但係擔保金可能只係一個好細嘅金額^[6]。擔保有限公司係一種普通法嘅概念，有啲似大陸法系嘅基金會^[6]。

擔保有限公司通常係用來減低非牟利組織嘅風險，同時提高組織嘅公信力^[7]。爾ni1啲公司可能係普通牟利公司特別為咗履行佢哋嘅企業社會責任而設立嘅子公司，亦可能係做一啲文化、科學、藝術、體育、宗教、教育、研究等等有關嘅嘢^[3]。

香港

睇埋：慈善團體

喺香港，部分免稅嘅慈善團體都係擔保有限公司，但係擔保有限公司同慈善團體係唔同概念，註冊做慈善團體要向稅務局申請。^[3][7]

海外

擔保有限公司通常都係非牟利^[1][8]，但亦有牟利嘅擔保有限公司，例如，世界四大會計師行嘅母公司（德勤^[9]、安永^[10]、畢馬威^[11] 同羅兵咸永道^[12]）全部都係擔保有限公司；保柏亦係擔保有限公司^[13]。

雖然係普通法嘅嘢，但係並唔係所有行普通法嘅地方都有擔保有限公司，例如，喺加拿大淨得亞省^[14]同斯高沙省^[8]有爾樣嘢（以前多啲，後來冇咗），大部分省份都冇。

另外，有啲地方可能有有股份嘅擔保有限公司^[6]，喺爾啲地方，冇股份擔保有限公司又叫純擔保公司^[暫譯]（pure guarantee company^[15]），而有股份嘅擔保有限公司又叫混合式公司^[暫譯]（hybrid company^[6]）。

睇埋

• 慈善團體
• 非牟利組織