捍衛沙田

捍衛沙田係2015年2月15號喺香港新界沙田市中心所發生嘅社會運動，由Facebook群組「光復香港 捍衞本土」喺網上發起，原因係為咗抗議香港境內水貨客問題、爭取取消港澳個人遊、一簽多行及反對商場租戶傾向自由行，目標同喺2012年9月起發動嘅光復上水站同喺2015年2月8號發動嘅光復屯門嘅原因差唔多。

示威者喺新城市廣場第一期3樓展覽廊嘅通道集會，當中有示威者揮舞香港旗，高呼「香港獨立建國」。^[1]

示威者指控來自中華人民共和國嘅水貨客充斥港鐵東鐵綫沿線，涉嫌從事走私活動，長期霸佔商場通道，同時令物價上脹以及商舖租金上升，原本位於沙田市中心一帶嘅小商戶都被藥房、首飾店及名店等受自由行歡迎嘅商店取代，影響到附近居民生活。大約200至300人響應社交網絡號召，集中到新城市廣場及沙田中心一帶示威，事件最終演變成衝突（喺新城市廣場多次爆發，多間店舖閂閘），差人機動部隊施放胡椒噴劑同使用警棍以驅散示威者。事件造成3人受傷，6人被差人捉。^[2]

參考

1. 〈捍衛沙田行動警方又出胡椒噴霧　名店暫停營業有閘門損毀〉。《熱血時報》。2015-02-15。喺2020-04-05搵到。
2. 〈「捍衛沙田」爆衝突 警施胡椒噴霧拘6人〉。AM730 (香港中文)。2015-02-16。原著喺2020-04-05歸檔。喺2020-04-05搵到。