From Wikipedia, the free encyclopedia
彭德(英文:Kenneth Myer Arthur Barnett,1911年3月19號—1987年10月24號)係前港英官員兼漢學者,響1959年至1970年出任人口調查處處長(1967年改叫政府統計處處長),另外佢仲曾經出任新界民政署長、市政局主席。
彭德響倫敦克里克伍德出世,老豆叫Arthur Barnett,而阿媽叫Amy Barnett[1]。彭德早年入讀磨坊山學校,期間佢曾經參加中量級拳擊比賽、欖球同埋曲棍球等等運動[2]。之後,佢升讀劍橋大學國王學院,響1932年以文學士嘅身份畢業,響1936年獲政府授做文學碩士[3]。
1934年,彭德以官學士嘅身份,正式加入港英政府,隨即畀人派去潔淨局做行政助理,響1937年調去做九龍巡理府[4]。1940年,佢調去做戰時稅務專員,第二年先係出任試委員會委員,之後又做返潔淨局行政助理[5]。同年12月爆發香港攻防戰,而彭德畀人調去香港義勇防衞軍第四炮兵連做中尉[6]。十幾日後香港淪陷,彭德畀日軍捉到。佢首先畀人坐監響亞皆老街集中營,之後佢轉去深水埗拘留營[6]。期間,彭德響食物問題上面曾經直接同紅十字會駐香港代表講,因而違反咗日軍對戰俘嘅規則,彭德因為咁而畀日軍打,但係戰俘嘅食物問題上面因為呢件事就有所改善[7]。
1945年,日本宣佈無條件抗降,彭德出獄,畀政府任命做第三突擊旅上尉,同東江縱隊合作,負責管理九龍、荃灣、屯門、西貢、清水灣同埋離島,維持治安[8]。除咗維持治安之外,彭德仲有份起嘢,就好似西貢公路,就係佢同海軍中尉約翰波遲(英文:John Wynne-Potts)一齊起嘅[8]。
響1946年,港英政府正式恢復運作,之後彭德分別響1947年至1948年同埋1951年至1952年期間,兩次做助理輔政司,仲響1949年一度出任助理財政司同埋社會福利署署長[9][10]。響做助理財政司期間,佢有份禁止炒黃金,試過因為呢條問題而同金銀首飾業商會傾點樣應對[11]。
1951年,彭德轉做市政局主席,期間遇上有好多中國大陸嘅人走難落嚟香港,令到人口幾何式咁增加,而佢哋又周圍起木屋(冇地方住,佢哋咪周圍起,起碼有地方瞓),而彭德為咗處理木屋問題,下令起徙置區[12]。1952年,佢制定咗一套解決住屋問題嘅計劃,計劃入面佢提議響全香港分19個徙置區,安置班難民,批准難民響徙置區度起木屋;佢仲希望可以響1954年拆嗮所有木屋;另外佢仲要求起一個組織監管徙置區[13]。同年4月,九龍仔大坑西發生大火,於是彭德響同年11月將嗰班災民安置到東頭同埋土瓜灣[14]。
1953年,彭德計劃擴建當時啱起完冇耐嘅荔枝角平房區,咁做係為咗收容當時因為要起長沙灣街市而迫住要搬屋嘅市民[15]。佢將住響平房區嘅人搬去何文田文華村,批准佢哋響文華村重新起過間平房,又畀佢哋響屋入面做小型工廠,仲將文華村入面唔合格嘅木屋重建[15]。同一時間,佢又為東頭起基本生活設施[15]。同年12月,發生石硤尾大火,有大約五萬八千人一夜之間無家可歸,之後彭德清拆石硤尾一帶嘅木屋,並原址起咗有兩層高嘅平房去安置佢哋[16]。
1954年,彭德畀人調去做新界民政署長[17]。
1970年,彭德辭去政府統計處處長呢份工,正式退休,一共為港英政府服務三十七年,而香港會等等團體都有為佢餞行[18]。響離開香港個日,彭德一家人響啟德機場受到佢嘅同事同埋老友送別[19]。退休之後,彭德分別畀人派去馬拉維同埋孟加拉,幫聯合國做人口統計[20]。
彭德響1946年娶咗小學老師王慶琛(英文:Joan Hing-sam Wong)做老婆[21]。王慶琛係湖南保靖人,老豆係東北軍阿頭王化南[2]。兩公婆生咗一個女,叫彭世珍(英文:Ruby Shai-chan Barnett),彭世珍曾經響香港同埋愛爾蘭讀書,之後成功做咗律師[22]。
彭德對粵語、桂林話同埋客家話都好熟悉,另外佢亦熟悉20種唔同嘅語言[20]。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.