Remove ads
1956年2月6號，中華人民共和國政府實行推廣普通話嘅政策[3]。廣州市嘅各個政府，教育機構開始逐步用普通話做主要語言，而廣州市本來嘅主要語言 —— 粵語嘅使用受到唔同程度嘅削弱。
由上世紀90年代尾開始，廣州部分中小學校禁止學生喺校內講粵語，違例會被扣「道德操行分」，有人話「講廿句粵語，三好學生無緣」。同時間亦有啲家長發現佢哋嘅仔女㗽屋企都唔講廣州話，甚至乎對粵語配音嘅卡通片都冇興趣[4]。
另外，隨住越來越多非粵語使用者嘅遷入以及推廣普通話嘅影響，廣東省甚至廣州市內一啲非粵語使用者（尤其係來自北方省份嘅普通話使用者）唔單止拒絕了解同學習粵語，甚至排斥同歧視粵語，稱粵語係「鳥語」、「唔係人話」，並蔑稱粵語使用者係「南蠻」、「猴子」，經常引起粵語使用者同非粵語使用者之間嘅爭執（尤其以網絡更嚴重）。部分極端者更拉攏其他非粵語使用者企圖同化佢哋生活範圍內嘅粵語使用者。
自1990年代中以來，廣東鄰近嘅廣西壯族自治區，尤其係省城南寧，喺20世紀仍係粵語使用嘅活躍地區之一，後來響市政府推行普通話政策多年後進行嘅非正式統計顯示，粵語人口已跌到唔夠三成，而且多數係長者[5]。
喺2010年6月廣州市政協喺網上搞咗一個網上問卷調查，建議增加廣州市營電視頻道嘅普通話節目，問卷內容一面倒，類似軟強迫，令人質疑，即時引起廣州市民嘅強烈反對，超過八成人反對呢項提議，並且引發廣府話存廢嘅激烈討論[6]。
喺2010年7月，廣州市政協委員紀可光正式向廣州市人民政府提交「關於廣州市營電視頻道全面改用普通話廣播」嘅提議[7]，引起咗廣州市各界嘅強烈反對同批評[8][9]。
同月有報道指廣州嘅執信南路小學要求學生喺課外時間都要講普通話，有受訪家長話學生如果被發現講粵語，就會被記名並交畀教師處理，甚至以扣分、「全校點名批評」作懲罰，令到佢個女唔敢講粵語，再係噉落去就連粵語都唔識講[10]。
7月中，有市民發現明代名將袁崇煥喺東莞石碣故鄉紀念園嘅粵語口頭禪銘牌俾人鑿走。原來嘅金色銘牌上刻有佢打仗時嘅口頭禪「掉哪媽！頂硬上！」。香港《蘋果日報》指事件「令廣東話捍衞戰火上加油」[11]。
有網民認為政府嘅做法係有政治涵義：因為習近平好大機會喺2012年中共十八大上面接替胡錦濤做中共中央總書記，但係「習總書記」嘅粵語發音同「雜種書記」係一樣。[12]
有網民模仿香港電影《歲月神偷》嘅海報，整咗《碎粵神偷》諷刺畫[13]。
7月11號，一班廣州市民喺人民公園舉行捍衞粵語活動，參加者一齊唱1980年代嘅粵語流行曲，在場有人手持模仿香港政府宣傳政改口號嘅「廣府話起錨」標語[1]。
7月16號，廣東省委書記汪洋喺廣東省委十屆七次全會上引用《論語》故事，表示廣東基本上已「富之」，下一步更重要嘅係「教之」，要「以教開智，以文化人」，喺講到點樣「教之」嘅時候提到要推廣普通話[14]。香港《蘋果日報》指汪洋嘅講話反映官方對民間呼籲保護粵語嘅立場仍然強硬[15]。
一啲人將今次爭議同學校教材指定課文嘅法國短篇小說《最後一課》所述情境相提並論[16]。
- 7月19日，廣州市委副書記蘇志佳向傳媒表示粵語係嶺南文化嘅重要組成部分，市委、市政府從未諗過「廢除粵語」、「弱化粵語」[17]。同日《人民日報》有文章指出今次爭論已「波及整個粵港澳地區，以及粵語移民較多的加拿大和澳大利亞等地」[18]。
自由亞洲電台於7月21日有文章指出「呢次嘅粵語存廢之爭，喺全國引起咗討論，爆發咗上海、北京、新疆等地對方言處境嘅反思，喺粵語覆蓋區域——例如香港，都引起咗香港人保衛粵語嘅共鳴。」[19]
活動主辦者喺事前已經向公安局備案[21]，其後由於政府當局對佢哋施壓，佢哋被迫自行取消活動[22]。但係25號嗰日仍然有大批市民喺下晝5點準時到達江南西站A出口，自發聚集，為粵語、為廣府文化發出自己內心嘅呼聲。
因為江南西站A出口地處繁華商業區，人流量大，現場好難區別主動參與集會人士同埋行街人士，所以關於參與人數嘅數字有多種講法。香港《蘋果日報》指差唔多有一萬人參加[23]，香港《文匯報》就話有幾百人參加[24]，自由亞洲電台粵語部引述在場人士話有二千幾人參加[25]。呢場「粵語保衛戰」更加蔓延到香港，有人喺Facebook開群組，而且發起8月1號喺灣仔舉行保護粵語大行動[26]。
大陸媒體幾乎冇報導甚至提及呢件事，可能係被大陸封鎖新聞，新浪微博第一時間封咗有關粵語文化、廣州文化嘅微博群，並限制搜索廣州、粵語一類嘅關鍵字，原因就未知。
7月28日，中共廣州市委副書記蘇志佳再一次明確表示廣州市委，廣州市政府無打算廢除同弱化粵語，「推普廢粵」純屬子虛烏有[27]。
但係廣州市政府講一套，做一套嘅做法並冇解決問題。喺9月18、19號，香港知名人士蔡淑芳發起全球撐粵行動。因為當局喺大陸已經提早實行打擊，大陸方面嘅集會搞唔成，但係香港同美國就如期舉行[28]。
Remove ads
廣東省人民政府喺2011年12月17號公佈《廣東省國家通用語言文字規定》[29]，指政府機關、教育、媒體等界別嘅人士需要使用普通話而唔係方言，引起民眾不滿[30]。廣東省政府發言人就話，呢個舉動冇限制到方言嘅使用[31]。
Remove ads
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
Remove ads