From Wikipedia, the free encyclopedia
專注（粵拼：zyun1 zyu3；英文：selective attention），學術化嘅又叫注意力控制，係指一個人揀將注意力擺喺邊度嘅能力，令到人嘅腦可以揀留意某啲嘢，同時忽略一啲同手上嘅工作冇關嘅嘢[1]。神經科學上嘅研究顯示，專注過程主要由額葉（最近額頭嗰塊腦葉）控制，而且同工作記憶（WM）等嘅認知執行功能有密切嘅關係[2][3]。
專注係指將注意力資源集中落去某一個資訊源嘅過程。喺現代嘅認知心理學上，科學家一般都認為注意力嘅運作包含咗至少兩大階段：
由第一階段（唔集中）去第二階段（集中）嘅過程就係所謂嘅專注[4][5][6]。
專注唔淨衹涉及集中感知某啲資訊，仲涉及防止個心靈感知一啲專注以外嘅資訊。例如不專注視盲就係一個「防止個腦感知非專注資訊」嘅現象：喺一份廿世紀後期做嘅研究當中，有幾個研究者搵咗班受試者返嚟，叫佢哋睇一段兩隊人喺度打籃球嘅短片，跟住要求班受試者係噉數住「邊隊傳咗幾多次波」等要佢哋望實個波先睇得到嘅資訊；中途段片有個人會著住一件大猩猩嘅衫行過（一件理應係好顯眼嘅事件），結果發現，有成大約一半嘅受試者好專心噉喺度數嘢，事後問返佢哋，佢哋完全唔知有人著住大猩猩衫行過（因為「不專注」而睇唔到一啲嘢）－個實驗顯示咗，當人專注於一個資訊源嗰陣，會造成佢哋感知唔到專注以外嘅資訊[7]。
心理學上第一個描述專注嘅理論模型係由現代心理學之父威廉占士提出嘅聚光燈模型（spotlight model）。個模型將專注比喻成一盞聚光燈：根據佢個講法，注意力呢家嘢有
處於聚焦點嘅資訊個心靈會詳細噉處理，令到個人能夠仔細（高解像度）噉知道嗰個資訊嘅各種屬性；處於周邊嘅資訊個腦會心靈，但處理得冇咁詳細，令到個人知道嗰個資訊嘅存在，但冇噉能夠詳細噉描述嗰啲資訊；而至於邊界以外嘅資訊，個心靈就會完全噉忽視[8]。
第二個模型係 1986 年提出嘅變焦鏡頭模型（zoom-lens model）。呢個模型有齊嗮聚光燈模型有嘅部份，但仲外加咗一個諗頭：根據變焦鏡頭模型，注意力嘅邊界係曉視乎情況而改變大細嘅，就好似相機嗰啲變焦鏡頭噉，而注意力條邊界嘅大細同個心靈手上嘅資源之間會有取捨嘅情況；當個心靈擴大佢嘅注意力邊界嗰時，佢會接收到更多唔同來源嘅資訊；但同時，因為個心靈嘅注意力資源係有限嘅，擴大注意力邊界就表示，個心靈對邊界內嘅每個資訊源嘅資訊會處理得冇咁詳細，又或者會處理得慢啲[9]。
有關變焦鏡頭模型，有份認知實驗就噉樣做過：個研究者喺多次試驗當中要受試者留心望住畫面嘅一個圓圈內嘅區域，個區域嘅大細喺次次試驗入面都唔同，而個研究者一路係噉用神經成像方法，監察住受試者嘅腦活動；實驗結果發現，當一個受試者被要求留心望一個大嘅區域嗰陣，佢個腦塊視覺皮層會有好多分佈廣泛嘅神經細胞啟動，但每一粒神經細胞嘅個別活躍程度比較低；相比之下，當一個受試者被要求留心望住一個細嘅區域嗰陣，佢塊視覺皮層得少量神經細胞啟動，但每粒神經細胞嘅活躍程度比較高－直接噉支撐咗變焦鏡頭模型嘅假說[10]。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
