From Wikipedia, the free encyclopedia
將軍澳新市鎮係香港嘅第三代新市鎮之一,屬於西貢區,位於觀塘同埋清水灣之間。發展可以追溯到1980年代中,人口亦由當初嘅唔夠一萬,迅速增加到而家大概40萬。隨住將軍澳嘅不斷發展,區內房屋、學校、社區、康樂設施同交通網絡亦逐步發展,地下鐵路將軍澳綫通車後,將軍澳新市鎮嘅對外交通更加完善。
|
成個將軍澳新市鎮大部份土地都係由填海得來,除咗近山同較早開發嘅土地以外,其他地方大多數都係靠堆填得來,而將軍澳填海區亦係以前全香港最大型垃圾堆填區,但而家已經填滿晒,所以只收集可以用喺堆填區表面嘅建築廢料,而唔再接收屋企垃圾。
將軍澳新市鎮可以分為八個區域,包括寶林、翠林、坑口、將軍澳市中心、調景嶺、小赤沙、大赤沙同埋百勝角。新市鎮入面最早開發嘅係翠林、康盛花園一頭,之後到寶林、景林一頭。1990年代中,等坑口一帶嘅原居民遷走之後,政府喺當地起厚德邨,並用嚟安置原本住喺調景嶺同牛頭角臨屋區嘅居民。將軍澳市中心一頭嘅尚德邨、唐明苑等喺1990年代後期先開始入伙,嗰時開始發現新填海區嘅土地有唔平均沉降問題。而調景嶺喺所有居民搬走之後就拆晒所有樓,開始移山填海工程,係宜家將軍澳最新發展嘅地方。目前,嗰區重有將軍澳南(寶盈花園對出空地)及清水灣半島(地理上並唔喺清水灣)兩處重未發展。而將軍澳啲地主要係攞嚟發展房屋及社區設施。
寶林、翠林、坑口、將軍澳市中心、調景嶺基本上都屬於住宅區,有公屋、居屋同埋私人屋苑。喺屋苑基座通常設有商場,方便區內人士購物。
小赤沙則設有港鐵將軍澳車廠。
大赤沙北部,就設有將軍澳工業邨。
喺寶林及坑口一帶發展之時,將軍澳被規劃成新市鎮,所以區內有唔少單車徑及康樂設備。但自從區內嘅新填海地進一步發展,為避免居民生活太依賴觀塘,政府改變規劃,將整個將軍澳區按市區嘅模式重新規劃。現時唔少市民都發現區內嘅設計比較奇怪,分區之間似被切開,連接唔係太方便。呢啲都係規劃轉變嘅影響,亦有觀點認為係回歸後各種政治目標(好似八萬五建屋計劃)等所引致。
目前將軍澳最大私人屋苑係新都城,分三期起,共有21座。而平均樓價最高嘅已入伙私人屋苑計有蔚藍灣畔、維景灣畔同埋君傲灣。寶康路近將軍澳廣場對出嘅運動場喺2009年東亞運動會進行時啟用。
將軍澳主要嘅公共交通工具係港鐵同埋巴士。由於將軍澳基本上冇乜公司同埋工商業區,所以對外交通需求彈性仲低過其他新市鎮,對外道路容易出現擠塞。
地鐵(家下嘅港鐵)將軍澳綫喺2002年8月18號通車,全線設有8個車站,其中調景嶺站、將軍澳站、坑口站、寶琳站、康城站5個站都位於將軍澳,本線可以轉乘地鐵嘅觀塘綫同埋港島綫。現時將軍澳大部份居民都會搭港鐵外出,尤其係去九龍同埋香港島嘅會明顯。
將軍澳嘅巴士線主要分兩部份,寶林、翠林、景林、坑口等地巴士線由九巴經營,而調景嶺同埋將軍澳南就係由新巴經營。首條為配合將澳新市鎮發展而開辦嘅巴士路線係93A(1987年開辦),來往寶林同埋觀塘碼頭。其後九巴喺將軍澳北面先後開辦多條巴士線,全部以93系、95系、98系同埋29x系作為路線冧巴。而首條投入服務嘅新巴將軍澳專線係796X,來往將軍澳港鐵站同埋尖沙咀東(現時),其後嘅新巴專線,除咗797M、798同埋792M之外,其餘都係796系,並在冧巴後面加英文字母。
現時有以下交通工具服務將軍澳或經過將軍澳:
路線 | 終點站 | 收費 |
---|---|---|
10M | 慧安園<->觀塘仁愛圍 | $5.5 |
11 | 坑口村<->彩虹站 | $5.5 |
11A | 坑口村<->坑口站(繁忙時間行走) | $2.5 |
11M | 坑口站<->香港科技大學 | $4 |
11S | 寶琳<->彩虹站(通宵服務) | $7 |
12 | 寶琳<->西貢 | $8.5 |
12A | 寶琳<->順利紀律部隊宿舍(繁忙時間行走) | $5.5 |
13 | 康盛花園<->仁愛圍 | $5 |
15 | 坑口北<->康盛花園 | $3.3 |
15A | 坑口北<->茵怡花園 | $3.3 |
15M | 康盛花園<->寶琳站 | $3.3 |
16 | 寶琳<->布袋澳 | $7 |
17 | 翠林<->藍田站 | $5 |
17A | 寶康路<->寶琳站 | $3 |
17M | 翠林<->寶琳站 | $3 |
18 | 坑口北<->北角 | $12 |
19S | 坑口北<->銅鑼灣(循環線,通宵服務) | $16 |
101M | 坑口站<->西貢 | $7 |
102 | 坑口站<->新蒲崗 | $7 |
102B | 坑口煜明苑<->彩虹 | $6.7 |
102S | 坑口站<->彩虹(通宵服務) | $8 |
103 | 清水灣第二灘<->觀塘碼頭 | $8.5 |
103M | 將軍澳站<->清水灣第二灘 | $7 |
105 | 康盛花園<->土瓜灣高山劇場 | $7.4 |
105S | 康盛花園<->土瓜灣高山劇場(通宵服務) | $9 |
106 | 寶琳<->九龍灣 | $6.5 |
107 | 寶琳<->靈實醫院 | $3 |
108A | 調景嶺站<->坑口北 | $4 |
109M | 坑口站<->清水灣半島 | $2.8 |
110 | 調景嶺站<->九龍城(循環線) | $8 |
111 | 寶琳<->新蒲崗 | $7 |
將軍澳工業邨位於將軍澳嘅東,係香港第三個工業邨,於1995年啟用。同另外兩個工業邨(大埔同元朗)唔同,將軍澳工業邨只容許一啲冇污染性同高科技行業設廠。不過,啟用時正值香港製造業「日落西山」,所以真正喺將軍澳工業邨設廠嘅並唔多,唔少土地都係空置。