好撒馬利亞人嘅比喻

好撒馬利亞人嘅比喻係耶穌講嘅一個比喻，記載喺《新約聖經》《路加福音》第10章第30至37節。

好撒馬利亞人

聖經譯文

「	耶穌答佢話：「有一個人從耶路撒冷去耶利哥，途中遇到強盜。佢哋剝佢嘅衫，將佢打到半死，揼低佢走咗。咁啱有一個祭司喺嗰條路經過，見到佢就從另一邊走咗。又有個利未人嚟到嗰度，見到佢，亦係照樣從另一邊走咗。但係，有個撒瑪利亞人路過嗰度，睇見佢就動起慈心，埋去用油同酒倒喺佢嘅傷口，幫佢包紥，扶佢騎上自己嘅牲畜，帶佢去旅館嗰度照顧佢。第二日，佢拎出兩個銀幣交畀店主，話：『請你照顧佢，額外嘅費用，我返嚟嗰陣會還畀你。』你認為，呢三個人，邊一個係遇到強盜嗰人嘅鄰舍呢？」佢話：「係仁慈對待佢嗰個人。」耶穌對佢話：「你去照噉樣做啦！」	」
——《路加福音》10章30至37節

解釋

從耶路撒冷去耶利哥嘅路，係一條危險嘅路途。耶路撒冷喺海拔二千三百呎以上；而耶利哥附近嘅死海卻係喺海拔一千三百呎以下；因此，喺短短二十哩之內，兩地高度相差有三千六百幾呎。由於路途險窄，怪石嶙峋，彎角出沒無常，呢度就成為強盜匿藏嘅好地方，佢哋四處埋伏，隨時襲擊路過嘅人。油係一種減輕痛苦嘅膏藥，而酒就有消毒作用。喺耶穌嗰個時代，呢兩樣都係用嚟處理傷口嘅標準藥物。

撒馬利亞人喺猶太人嘅心目中係外族人，根本唔屬於「鄰舍」範圍。但係用鄰舍相助嘅精神嚟照顧受傷嘅猶太人，卻係猶太人所恨惡嘅撒馬利亞人。有責任救死扶傷嘅祭司同利未人，反而唔理佢就噉走咗。好撒馬利亞人嘅比喻，講明一個人喺佢能夠愛佢嘅鄰舍之前，自己先要成為其他人嘅鄰舍。如果我哋無辦法成為某啲人嘅鄰舍，噉樣，我哋就冇遵守上帝要我哋愛鄰舍如同愛自己嘅誡命^[1]。

參考

1. 〈好撒馬利亞人〉 (PDF)。原著 (PDF)喺2020年3月15號歸檔。喺2018年3月16號搵到。