契弟

契弟，是指一世的好兄弟出生入死

響古時，同性戀嘅男人會搞上契，有「契父、契兒」或者「契兄、契弟」呢啲關係。喺舊時省城廣州西關嘅光雅里有五、六間棺材鋪，每間入面都養住幾個哭郎，佢哋好多都生得青靚白淨兼且皮光肉滑，因為哭郎入息微薄，所以佢哋就兼職去做基佬同城中官太、富婆玩樂嘅鴨（男妓）^[1]，之後「契弟」變成鬧人嘅俗語。攞而家嘅標準嚟睇，最初用嚟鬧人係有歧視成份，而今時今日，攞嚟鬧乜人都得。

廣州有兩句歇後語：

• 「光雅里出世嘅人：正契弟！」
• 「盲公過光雅里，冇眼睇你班契弟！」

有時純係契兄弟，避開唔叫契弟，叫契細佬。

例

• 「死𡃁仔，正契弟。」
• 「契弟走得摩（mo1）。」遲緩、慢吞吞。

名著都用

【契弟】有響四大名著《紅樓夢》出現過，第九回嘅一段話：「原來薛蟠自來王夫人住處後，便知有一家學，學中廣有青年子弟，不免偶動了龍陽之興，因此也假來年上學讀書……卻不曾有一些兒進益，只圖結交些契弟。」^[2]

【契弟】亦有響《清稗類鈔》出現過：

• 《清稗類鈔・方言類》：契弟，【讀作開代。】男子賣淫者也。老契，指姘頭也。
• 《清稗類鈔・稱謂類・粵人以契弟二字罵人》：契弟之稱，初惟師之於弟有之，言其衣缽相傳，兩兩相契也。繼而避嫌不用，則以閩、粵之好男風者，每以此二字稱其所歡耳。粵中罵人輒曰契弟，其音略同開怠，蓋以龍陽譬之也。

參考

1. 〈充满人世辛酸嘅光雅里〉。原著喺2016年3月10號歸檔。喺2013年3月13號搵到。
2. 《星島日報》，教育點評，F1頁，2007年3月26號