大韓民國國軍

大韓民國國軍（韓文：대한민국 국군），係大韓民國嘅國家軍隊，除咗大韓民國預備軍（韓文：대한민국 예비군）之外，重包含：

• 大韓民國陸軍（韓文：대한민국 육군）
• 大韓民國海軍（韓文：대한민국 해군）
  • 大韓民國海軍陸戰隊（韓文：대한민국 해병대）
• 大韓民國空軍（韓文：대한민국 공군）

韓國現役總兵力有50萬，喺世界上排第六，其中陸軍有36.5萬、海軍有7萬（包括海軍陸戰隊嘅2.9萬）、空軍6.5萬、預備軍有310萬。美軍響韓國大約有2.4萬駐兵^[1]。軍隊嘅指揮系統分為平時同戰時兩種體制。平時嘅指揮架構係由大韓民國總統擔任最高統帥，戰時就同駐韓美軍並肩作戰。

大韓民國國軍嘅主要任務係防衞國土同防禦北韓嘅軍事威脅，但係海外維和同災害救濟亦都係任務之一。

組織

陸軍

内文：大韓民國陸軍

大韓民國陸軍，做通稱韓國陸軍或者南韓陸軍，係大韓民國國軍嘅陸上部隊^[2]，亦都係三軍之中規模最大嘅軍種。

海軍同海軍陸戰隊

内文：大韓民國海軍同大韓民國海軍陸戰隊

相對於陸軍同空軍，韓國海軍以往比較唔受重視，噉可能同北韓海軍實力唔強有關。韓國海軍主要嘅任務係海岸防衞，次要任務係為海軍陸戰隊嘅兩棲作戰提供支援，近年都成日派船艦參與海外維和行動^[3]。韓國海軍計劃響2020年左右成為藍水海軍^[4][5]。

海軍陸戰隊最初係獨立嘅軍種，雖然1973年之後嘅海軍陸戰隊改由海軍作戰司令部管轄，但係實際運作上重好獨立。

空軍

内文：大韓民國空軍

韓國空軍係一支擁有600架以上先進戰機嘅現代化空軍，主要任務係防衞領空，次要任務係支援地面部隊作戰。

武器研發

大韓民國國防部轄下有國防科學研究所，主要任務係研發武器。

海外行動

大韓民國國軍有時會參與海外軍事行動，以提升自身嘅實力同國際地位。南韓第一次參加海外戰爭係越戰^[6]，高峰時期駐越嘅南韓軍有48000人，僅次於美軍^[7]；又曾經派海軍特戰旅去索馬里，響挾持事件入面擊斃幾個索馬里海盜^[8]。