基輔級航空母艦

基輔級航空母艦（蘇聯官方名稱「1143號航空巡洋艦工程」，俄文：Авианесущие крейсера проекта 1143；代號「海東青」，俄文：Кречет）係蘇聯海軍建造嘅第二代航空母艦，第一代可以搭載固定翼飛機嘅航空母艦。

「基輔號」航空母艦

「明斯克號」航空母艦

「新羅西斯克號」航空母艦

喺蘇聯/俄羅斯海軍服役嗰陣嘅「戈勒殊哥夫號」航空母艦

改造之後準備移交畀印度海軍嘅「戈勒殊哥夫號」航空母艦

簡史

1960年代，赫魯曉夫出於「飛彈至上」嘅概念，唔重視航空母艦嘅發展，將幾乎所有資源用澌來發展導彈巡洋艦同核潛艇。雖然蘇聯海軍後來建造徂兩部莫斯科級直升機母艦，但係直升機母艦嘅戰鬥力極其有限，根本無辦法用來保障海權。

1967年，安·安·古歷治高（А. А. Гречко）就任蘇聯國防部長之後，力排眾議，推出「鷹級航空母艦計劃」（「1143號工程」）^[1]。但係當時蘇聯嘅彈射器技術實在太唔成熟。德·菲·烏斯捷諾夫（Д. Ф. Усти́нов）接任國防部長之後，中止徂鷹級航空母艦計劃，改為發展有成熟技術支持嘅基輔級航空母艦^[1]，指定尼夫斯基工程設計局設計戰艦、雅哥夫利夫設計局設計艦載機。

1970年，第一架基輔級航空母艦「基輔號」喺烏克蘭尼古拉耶夫造船廠開工，1972年下水，1975年正式服役。之後，蘇聯政府又建造徂三架基輔級航空母艦，分別係「明斯克號」、「新羅西斯克號」同「巴古號」（後來改名做「戈勒殊哥夫號」）。其中「巴古號」由於艦載設備同武裝都同前三架基輔級有好大差別，所以有軍事家將佢歸為獨立嘅艦級。

蘇聯解體之後，俄羅斯海軍接收徂伊四架航空母艦，但係由於經濟困難，經費緊缺，前三架基輔級喺1993年全部退徂役^[2][3]，而「戈勒殊哥夫號」喺1994年嘅一場火燭之後就一直處於維修狀態^[2]。後來，「基輔號」同「明斯克號」分別被兩間中國集團買徂落來，其中「基輔號」被人拖徂去天津，先後被人改造成軍事主題公園同航母酒店，而「明斯克號」先係被韓國大宇集團買徂，之後又被一個中國集團買徂，之後就被人拖徂去深圳，變成徂另一個軍事主題公園。「新羅西斯克號」被韓國大宇集團當廢鐵恁買徂，之後拆解。2004年，俄羅斯同印度喺新德里簽署協議，俄羅斯向印度海軍轉讓「戈勒殊哥夫號」，但係「戈勒殊哥夫號」要喺俄國接受現代化改造，並且只能夠搭俄製艦載機，改造費用由印度承擔^[2]。2013年，改造之後嘅「戈勒殊哥夫號」改名為「超日王號」，正式加入印度海軍，艦載機亦都由雅克-38改為米格-29。

參考

1. 歐陽欣，《經驗借鑑與航母取向》，收於《巡航者（第一分冊）》，陳樸編，內蒙古人民出版社。
2. 俄罗斯“基辅级”航空母舰：“四姊妹”各奔东西-中国网
3. 〈存档副本〉。原著喺2010年5月10號歸檔。喺2014年7月7號搵到。