坦克 (電子遊戲)

  提示：呢篇文講嘅唔係坦克大戰。

電子遊戲上講嘅坦克（粵音：taan2 haak1）係一種角色類型，尤其常見於多人玩嘅動作遊戲同戰略遊戲。佢哋重點特徵係負責要幫隊友「擋子彈」—呢啲角色通常血量高、或者有盾同防護罩等嘅嘢可以阻擋攻擊。

呢幅圖入便嘅係 MMORPG《魔獸世界》嘅半獸人角色；喺美術設計上，坦克角色通常會設計成好似半獸人噉大隻嘅角色。

喺《鬥陣特攻》等嘅隊制射擊遊戲裡便，坦克型角色仲可以分做主坦同副坦^[1]兩種，前者集中保護隊友，而後者保護能力冇咁強但係就有第啲有用嘅異能。

坦克型角色又有叫肉盾（參見英文 meat shield），而粵語又有簡稱坦。

基本特徵

呢幅圖畫描繪嘅係一位騎士：喺美術上，坦克型角色好多時又會設計成「身穿閃呤呤盔甲、為同伴擋攻擊嘅勇敢騎士」。

睇埋：角色扮演遊戲同生命值

喺電子遊戲嘅隊制戰鬥當中，坦克型角色重點係要為隊友「擋子彈」。一個噉嘅角色通常會有以下嘅特徵：

• 有大量生命值，吸收傷害，例如喺《鬥陣特攻》同《漫威爭鋒》裡便，一個非坦克角色血量大約係二百幾，而一個典型嘅坦克血量就閒閒哋會係五至六百；
• 有某啲方法打消敵人嘅攻擊，例如盾同防護罩都係坦克嘅常見異能，呢啲盾同防護罩通常會有返咁上下闊，隊友可以匿埋喺後面；
• 有啲坦克能夠回復自己嘅生命值，例如《鬥陣特攻》當中嘅攔路豬^[2]就係噉；
• 佢哋好多時有保命用嘅異能，例如可能有個異能施展咗出嚟，保證跟住落嚟嗰 10 秒內佢唔會死；
• 亦有部份坦克靠嘅係迴避能力。

因為佢哋嘅呢啲特徵，坦克有能力保護隊友，尤其係啲血量比較低、唔多捱得打嘅 DPS（集中攻擊嘅角色）同埋治療師（集中治療受咗傷嘅隊友嘅角色）同時治療師往往會企喺坦克身後，用自己嘅治療能力支援坦克。

使用技巧

有啲坦克係所謂嘅 dive tank，呢種坦克冇盾或者防護罩，取而代之嘅係高移動能力，呢種坦克角色能夠一嘢衝入（英文 dive 指嘅嘢）敵陣，喺敵陣製造混亂，同時佢哋血量高，就算畀敵人由四面八方攻擊都唔會咁易死，佢哋嘅隊友可以趁敵方陷入混亂推進，例子可以睇吓《漫威爭鋒》當中嘅毒魔^[3]。

喺 RPG 當中，坦克好多時仲有能力操縱敵意。遊戲設計上講嘅敵意機制可以噉想像：每位角色有一個數值表示敵人對佢「幾有敵意」而由 AI 控制嘅敵人會首先攻擊敵意值高嘅角色；如果一隻遊戲有呢種機制，設計師可以賦與坦克型角色特殊異能，畀佢哋提升自己嘅敵意值，噉嘅話使用坦克型角色嘅玩家就可以強迫敵人攻擊佢，從而達致保護隊友嘅效果^[4]。

由於坦克負責保護隊友生存，佢哋好多時都會擔當非正式嘅領導角色，負責企前排帶領隊友推進。有遊戲業評論者就噉樣描述 MMORPG 當中嘅坦克（重述版本）：^[5]

坦克要吸引同控制敵人嘅注意力，成為團隊嘅實質領袖。我（做坦克嘅）要負責控制清理關卡嘅節奏。除咗要知隊友有能力同時應付幾多敵人，我仲要知道啲敵人應該會喺邊、佢哋面向邊個方向，同埋佢哋可以點樣威脅到隊友。我仲要緊貼當前關卡嘅攻略方法。如果有捷徑可以 skip 咗其中一啲敵人佢，我要知。

應用例子

坦克型角色呢個概念可以追溯至一九九二年^[6][7]。而一九九〇年代嘅電子遊戲已經有用到坦克型角色^{[註 1]}。

• 喺《最終幻想系列》嘅多部作品（包括一九九〇年代嗰啲）當中，都有戰士或者類似嘅職業。揀咗呢種職業嘅角色往往血量比較高，能夠抵受敵人嘅攻擊，而且佢哋仲會有某啲異能，可以（例如）喺隊友受攻擊嗰陣直接將啲傷害轉移到自己身上^{[註 2]}。
• 廿一世紀初嘅英雄射擊遊戲成日都會用坦克型角色嘅概念。例如二〇一六年嘅《鬥陣特攻》同二〇二四年嘅《漫威爭鋒》當中，玩家可以選用嘅英雄分做三類，其中一類就係坦克。呢啲角色血量高，而且大多數都有某啲類型嘅盾或者防護罩，可以為隊友擋子彈^[8]。
• 二〇〇二年 MMORPG《仙境傳說》嘅劍士職業有種技能叫犧牲，呢種技能用嗰陣可以指定五位隊友，喺一段時間內嗰五位隊友受嘅傷害冚唪唥都會由使用者嚟承受^[9]。

等等。

睇埋

• DPS：多人遊戲當中專門負責攻擊殺敵嘅角色。
• 治療師：多人遊戲當中負責支援隊友嘅角色。
• 職業：响美術上，坦克通常對應戰士、騎士或者類似嘅角色。