國際象棋解謎

國際象棋解謎（英文：chess puzzle）係指用國際象棋玩嘅解謎。標準嘅國際象棋對局係由兩位玩家輪流行嘅，雙方要有技巧噉行棋以求打低對手。國際象棋解謎就唔同：一盤國際象棋解謎（一條國際象棋謎題）會

1. 指定盤棋而家嘅狀態，包括棋盤上邊每一隻棋嘅位置，同埋輪到邊個行；
2. 要玩家諗出「最理想嘅做法」－例如「喺兩步之內將死對手」、「和棋」或者「獲得棋力優勢」呀噉；

一條簡單嘅國際象棋謎題：「家陣你係白棋；輪到你行，要點行先至可以喺呢步唔會輸呢？」

有好多國際象棋愛好者都鍾意玩國際象棋解謎，甚至仲整咗網站專門俾人玩同設計國際象棋謎題^[1]。

諗頭

睇埋：國際象棋同解謎

國際象棋謎題可以係一種國際象棋訓練方法，叫玩家解決特定嘅問題或者情況，從而幫佢哋提升技術。正常嚟講，每條謎題都會提供一個棋盤狀態，要求解題者搵出「最好嘅嗰一步棋」或者「最好嗰一連串步驟」，目的可以係要將死對手、獲得重大優勢（例如食咗對手嗰隻皇后）、或者避免輸棋。國際象棋謎題嘅難度可以好低，初學者淨係要有基本知識就可以玩，但係亦可以好深，需要高級嘅策略思維能力^[1][2]。

國際象棋謎題通常集中於戰術多過要玩家諗長遠策略：戰術係指可以即時產生影響嘅短期行動，例如食咗對方隻棋、對對方國王造成威脅，或者搵方法將死對手隻王；透過解謎，玩家可以學點樣識別棋盤狀態，仲有係學點樣準確計數同埋喺實戰當中快速反應^[3]。

做法

國際象棋謎題有以下呢啲類型^[4]：

• 一步或兩步內將死：最簡單嗰種謎題，要求玩家喺 N 步之內將死對手。呢種謎題被指係最啱教初學者學習將死相關嘅概念。
• 殘局謎題：喺呢啲謎題當中，棋盤上得返幾隻棋。謎題嘅挑戰就係要諗吓點樣贏到盤棋，通常係要將死對手或者贏到重要嘅棋（例如食咗對方隻皇后佢）。
• 防守謎題：唔係所有謎題都係想教玩家點贏嘅，有啲謎題係要玩家搵出最好嘅「防輸」步驟去避免徹底輸晒。呢啲謎題可以幫玩家點樣防止自己出錯。

拆解

睇埋：策略思考

解國際象棋謎題要睇得通透。玩家要睇清楚棋盤上嘅形勢，搵出有咩潛在嘅威脅同優勢。喺落手前，玩家要諗清楚唔同行動可能帶嚟咩後果。喺實戰中，呢種預想嘅本事好重要，而謎題就係練習呢種技能嘅辦法。

解國際象棋謎題解得多，玩家可以達致^[5]：

• 識得睇穿陣勢：透過解大量謎題，玩家開始識得睇穿啲重複出現嘅戰術模式，可以喺實戰中使用。
• 計算能力提升：謎題幫到玩家練習計算幾步之後嘅情況，呢個係打好國際象棋必須要有嘅技能。
• 決策能力變強：解謎題嗰陣，玩家學識快速搵出最掂嘅行動，呢樣嘢可以幫佢哋喺實戰中時間緊逼嗰陣都可以淡定噉做決定。

等嘅眾多好處。

睇埋

• 解謎遊戲
• 專家知識
• 策略同戰術之別

引咗

1. Holly, M., Tscherko, J. H., & Pirker, J. (2022, May). An Interactive Chess-Puzzle-Simulation for Computer Science Education. In 2022 8th International Conference of the Immersive Learning Research Network (iLRN) (pp. 1-5). IEEE.
2. The Right Way To Improve Your Tactics Using Puzzles. Chess.com
3. "Chess Tactics". Chess.com.
4. Polgar, Laszlo (1994). Chess: 5334 Problems, Combinations, and Games. Black Dog & Leventhal.
5. de Groot, Adriaan (1978). "Thought and Choice in Chess". Mouton & Co.

拎

• （英文） Chesspuzzles.com