叶音

  提示：呢篇文講嘅唔係叶韻。

叶音hip3 jam1^{[註 1]}，又寫做協音，亦都叫啱音ngaam1 jam1，係有啲聲調語言塡詞時嘅技巧，塡詞人要令歌詞嘅聲調走向同旋律嘅音高起伏一致。如果一種語言，聲調變化有較多，例如粵語，噉唔叶音（即係拗音，亦稱倒字）嘅歌詞容易令聽嘅人冇辦法正確辨識詞義。協音嘅概念同填寫古詩詞所要求嘅平仄相符，或者粵曲填詞所講求嘅啱合尺ho4 ce1相類似，不過「叶音」一詞指嘅係現代音樂嘅填詞合樂技巧。絕大多數粵語歌詞都係叶音嘅。

粵語塡詞嘅叶音

粵語廣州話擁有九聲六調（六種聲調輪廓）^{[註 2]}，不過有啲聲調嘅高低有相似嘅地方，喺叶音的角度嚟講，六調可以構成嘅音級，有「高、亢、下、沉」（最高、中、低、最低）呢四種，係一個完整嘅四級音階^[1]。表列如下：

音階（五度標記法）	聲調 /五度標記法（例字/粵拼）
高（5）	陰平聲 55（詩 si1）	陰入聲 5（昔 sik1）	陰上聲 35（史 si2）
亢（3）	陰去聲 33（試 si3）	中入聲 3（洩 sit3）	陽上聲 23（市 si5）
下（2）	陽去聲 22（事 si6）	陽入聲 2（食 sik6）
沉（1）	陽平聲 21（時 si4）

標示類似音階有幾種方法，如果由低至高排列（即係上表嘅「沉下亢高」次序），包括有：「零（〇）、二、四、三」^[2]、「零、六、五、一」^[3] 、「藍、綠、翠、(紫)青」^[4]等。當中以「〇、二、四、三」最普遍，寫起嚟亦都比較簡單易寫。

粵語嘅叶音，唔係硬性講求呢粒音係do或者so就一定要對應邊個音級嘅字，而係視乎呢粒音同隔籬嗰粒音之間嘅走向關係（向高發展定向低發展）同埋差幾遠（以音程計）。粵語相鄰字音的音程關係，見下表^[5]：

前字＼後字	〇	二	四	三
〇	同度	上行大二度 上行大三度	上行純四度 及以上	上行純五度 及以上
二	下行大二度 下行大三度	同度	上行小二度 上行小三度	上行純四度 及以上
四	下行純四度 及以上	下行小二度 下行小三度	同度	上行大二度 上行大三度
三	下行純五度 及以上	下行純四度 及以上	下行大二度 下行大三度	同度

此外，仲有啲彈性協音技巧，例如^[6]：

• 微調法：令兩個相鄰嘅同音高字（尤其是陰平和陽平聲字）音高略有變化。
• 彈性配合三原則：字音音高必須同旋律走向一致；高音區塡高音字，低音區塡低音字；樂句尾嘅長音必須塡準。
• 一逗一宇宙：音樂旋律因爲樂逗或者樂句斷開之後，重新安排字音音高嘅叶音。
• 二度三度多游移與模進原理：二度、三度音程，唔理大小，因爲佢嘅游移性質，可以做一些表外嘅寬容叶音。
• 大跳出錯覺：以好細嘅字音音高距離，配以四度及以上嘅跳進音程。
• 陰上聲嘅協音技巧：在「四」音級和「三」音級之間增加「九」音級。

其他語言

漢語族

官話

官話（包括普通話、國語）雖然係聲調語言，有「陰平、陽平、上聲、去聲」呢四種聲調，但係喺叶音角度，官話只有兩種音級。因爲陰平（以五度標記法標記嘅聲調值係55）、陽平（聲調值35）、去聲（聲調值51）嘅共通點，在於聲調值最高時一樣係5，所以佢哋都屬於同一個「高音」音級。換言之，官話只有「高」同「低」兩級，唔夠支持旋律嘅多種高低變化，構成唔到多層嘅完整音階。講究嘅塡詞人亦只可以盡量配級旋律嘅高同低嚟塡，而今日嘅普通話或國語歌曲，大家都普遍接受唔會字字啱音。

日語

日語係高低重音語言，唔係聲調語言，雖然有「重音」^{[註 3]}，不過淨係憑「高」同「低」兩種音調，唔足以支持旋律嘅多種高低變化，所以塡詞時都唔使叶音。

非聲調語言

所有唔係聲調語言嘅話，例如英語，本身就冇聲調嘅分別，所以唔使叶音。

睇埋

• 聲調語言
• 平仄
• 旋律

註

1. 呢個「叶」字並唔係「葉」嘅簡化字，唔可以寫做或者讀做「葉音」。
2. 有陰平、陰上、陰去、陽平、陽上、陽去、陰入、中入、陽入九聲，不過陰平同陰入高低一樣，陰去同中入高低一樣，陽去同陽入高低一樣，所以得六種高低。
3. 例如「橋」同「筷子」都係「はし」，但係將「はし」讀成前高後低，就係「橋」；讀成前低後高，就係「筷子」。

參考

1. CHEUNG Kwan Hin (2013). Ripples riding on waves: Cantonese tone-melody match mechanism illustrated (PDF). The18th International Conference on Yue Dialects. 原著 (PDF)喺2020-07-17歸檔. 喺2020-07-17搵到.
2. 黃志華：粵語歌文字聲律學淺說^{[失咗效嘅鏈]}
3. 香港01：填詞其實唔難　粵語歌愛好者話你知填詞冷知識 互聯網檔案館嘅歸檔，歸檔日期2021年8月8號，.
4. 黃志華：粵語歌詞的「平仄」──零二四三（溯源篇）
5. ACG/Vocaloid同人粵語中文歌詞wiki：是否協音
6. 參考黃志華：《粵語歌詞創作談》。

出面網頁

• 粵語填詞之苦與樂─其之一：寫粵語詞的難點(一)
• 粵語填詞之苦與樂─其之二：寫粵語詞的難點(二)
• 不協音，何以填詞？^{[失咗效嘅鏈]}
• 粵語歌詞的「平仄」──零二四三（溯源篇）〔黃志華編〕
• 0243.hk 粵語協音輔助器、搵嘢方法。
• 1234填詞器