江譽鏐

  「南海十三郎」跳轉到呢度。想搵其他用法，請睇「南海十三郎 (搞清楚)」。

江譽鏐（鏐慣讀球，粵拼：gong1 jyu6 kau4^{[註 2]}；1910年3月3號—1984年5月6號）^[3]，又名江譽球^{[註 2]}、黃標，字絳霞^{[註 1]}，號小蘭齋主，別號南海江楓，藝名南海十三郎，人稱十三哥、江十三，喺廣州出世，祖籍廣東南海縣張槎下塱村^{[註 5]}，係粵劇編劇。代表作有《心聲淚影》、《女兒香》、《燕歸人未歸》等。弟子有袁準、唐滌生等^{[註 6]}。有一女黃菊霜^{[註 4]}。清末翰林江孔殷太史第十三個仔；影星梅綺同食家江獻珠嘅叔父。

南海十三郎
字	絳霞 [註 1]
號	小蘭齋主
原名	江譽鏐
出世	江譽球[註 2] 1910年3月3號 廣州黃沙叢桂西街
死	1984年5月6號(1984-05-06)（74歲） 香港瑪嘉烈醫院
別名	江楓、黃標
籍貫	廣東南海縣張槎鎮塱邊鄉下塱村
語言	粵語、吳語、國語、英語、德語
教育程度	大學肄業
母校	南武小學[註 3]（約1920-1922，肄業） 私立嶺南大學附屬中學（約1922-1923，肄業） 廣州私立中德中學（約1923，肄業） 香港預科書院（1924-1925，肄業） 私立嶺南大學附屬中學（1925-1927） 香港華仁書院（約1927-1928） 香港大學（約1928-1929，肄業）
職業	編劇
活躍時期	1924年—1960年代
知名作品	《心聲淚影》、《女兒香》、《燕歸人未歸》
伴侶	陳馬利（1920年代末） 林雪蝶（1930年代中，未正式結婚） 黃菊霜之生母（1930年代末）
仔女	黃菊霜（女）[註 4]
父母	江孔殷（父） 杜秀蘭（母）
親屬	江清泉（阿爺） 江譽漢（大哥） 江仲雅（二哥） 江叔穎（三哥） 江季槐（四哥） 江譽桂（五哥） 江譽題（九哥） 江畹徵（十一姊） 江畹貽（十二姊） 江譽裴（十五弟） 江畹文（十六妹） 江畹英（十七妹） 江家潮（堂大佬） 江端儀（侄女） 江繩宙（侄仔） 江獻珠（侄女） 江沛揚（堂侄仔）
簽名

家世生平

1940年代嘅南海十三郎

江譽鏐係清末翰林江孔殷太史第十三個仔；阿媽係江孔殷第六房妾杜秀蘭，喺廣州黃沙叢桂西街生落佢之後過身^[4]，之後畀伯娘周氏湊大；兩歲跟江孔殷搬去香港堅道七十五號，無耐返去廣州河南嘅太史第住^[3]。佢幼年喺太史第入邊嘅「蘭齋私塾」讀書，師從名儒何天輔、陳桂生等讀經史；十歲入讀南武小學，師從胡鳳昌等^{[註 3][3]}；之後先後入讀嶺大附中、中德中學、香港預科書院、香港華仁書院，再考入香港大學讀醫科。

1924年，預科書院請「寰球樂劇團」義演，班主何浩泉請江譽鏐編劇，佢就將莎翁嘅《隨汝喜歡》改編成《寒夜簫聲》，呢個亦係佢編嘅第一齣劇^{[註 7]}。1929年，入「覺先聲劇團」第一屆班，起藝名「南海十三郎」；同年喺港大退學，諗住轉校去北平協和醫學院^[6]，收尾留喺上海，直至1932年返廣州；1930年，憑劇作《心聲淚影》名揚省港^[8]。1938年，廣州淪陷，江氏跟屋企走難落香港，喺同一個女人同居，生落個女，後來起名黃菊霜^{[註 4]}；遞年，受趙如琳邀請返廣東，入省立藝術院寫《平戎帳下歌》等抗日劇。1940年，廣東省府主席李漢魂請佢做「戰時粵省參議」，佢自己改名「南海江楓」；遞年，北上曲江，同關德興編劇。1945年8月返廣州。無幾耐，朋友請佢去香港辦報；半年之後又搭火車返廣州，車行到蘿崗，佢被人拱ung2落車，撻親個頭同尾龍骨，入河南紅會醫院留醫。

1949年，返去南海縣鄉下住；同年冬，落香港中環，住喺大道中鹿角酒店^[3]，收尾搬去分域街、軒尼詩道附近^[4]；1953年、1959年兩度入高街精神病院；1961年，入青山醫院，遞年三月出院。1964年，同《工商晚報》等寫專欄文章，後爲朱少璋博士輯爲《小蘭齋雜記》三卷；1970年，入大嶼山寶蓮寺做知客；1976年，又試入青山醫院。1984年5月6號，喺瑪嘉烈醫院過身^[3][4]，享年七十四。

軼事

下低南海十三郎軼事，據《小蘭齋雜記》同《滄桑太史第》、按時間順序輯錄：

• 1920年初，喺南武小學讀書嗰陣，因為得罪校長朋友、燒咗校長幢蚊帳，被校長開除出校。
• 1930年代，南海十三郎名揚省港之後，逢親係十三郎編嘅劇，都會撻「南海十三郎」呢個朵先，薛老揸個名都要跟佢後邊。
• 1930年代中，薛覺先親臨太史第，專程答謝十三郎。薛覺先着住藍布長衫，後邊跟住一班樂手，由十三郎帶入廳食蛇羹。食完餐飯，薛覺先唱咗十三郎撰嘅劇《心聲淚影》嘅歌《寒江釣雪》。
• 1934年，《春秋》雜誌嘅衛春秋寫咗一篇影射江太史一家嘅小說《春深太史第》。江孔殷一查，原來係十三郎將太史第啲醜事爆畀當時《華僑日報》副刊編輯楊大明聽，楊大明又同衛春秋講返，經衛春秋添油加醋，寫成《春深太史第》。於是江孔殷就用《中庸》同「江氏祖訓」教訓十三郎。
• 1935年，因爲拍電影《女兒債》識女演員林雪蝶，感情漸深，於是乎兩家訂婚，林雪蝶亦自號「十三娘」。收尾由於性格唔啱，卒之無成親。
• 1953年10月26號，佢喺大道中高陞茶樓附近嘅十字路口同過路人大聲演講，講時事、論政局，成棚人圍住睇。差佬帶佢返灣仔差館，經警方判斷爲精神病發作，轉送佢入高街精神病院。
• 1960年代，佢打電話報警，同灣仔啲差佬講佢唔見咗對鞋。差佬問邊個偷佢對鞋，佢話嗰兩個人差佬唔敢拉，偷佢左邊鞋嘅係毛澤東，偷佢右邊鞋嘅係蔣介石，自己左右都唔行得^{[註 8]}。

作品

劇^[3]：

• 「寰球樂」劇團：《寒夜簫聲》
• 「覺先聲」劇團：《心聲淚影》、《紅粉金戈》、《引情香》、《秦淮月》、《梨香院》、《明月香衾》、《紫薇花對紫薇郎》、《花魂春欲斷》等
• 「大江南」劇團：《明宮英烈傳》、《殘花落地紅》、《莫問儂歸處》等
• 「玉堂春」劇團：《血染銅宮》等
• 新一屆「覺先聲」劇團：《銅城金粉盜》、《誰是負心人續篇》、《女兒香》、《惜花不護花》、《半生脂粉奴》、《花市》、《春思落誰多》、《幽香冷處濃》、《咬碎寒關月》、《無價春宵》等
• 「義擎天」劇團：《七十二銅城》、《燕歸人未歸》、《天涯歌女》、《漂泊王孫》、《花落春歸去》、《血債血償》、《義結擎天》、《無情了有情》、《古塔可憐宵》等
• 「萬年青」劇團：《渴飲匈奴血》、《去年今夕》等
• 「興中華」劇團：《白虎戲玄壇》、《燕市鐵蹄紅》、《八陣圖》、《太平天國》、《金鳳池與年羹堯》等
• 「大羅天」劇團：《黃浦月》等
• 「勝光明」劇團：《花債何時了》等
• 「太平」劇團：《太平山傳奇》、《啼笑皆非》、《赤馬雲鬟》等
• 「錦添花」劇團：《伏姜維》、《明宮英烈傳》、《海上紅鷹》、《跨海屠龍》、《紅俠》、《橫斷長江水》、《莫負少年頭》等
• 「勝利年」劇團：《紫塞梅花》、《五代殘唐》、《萬世才人》、《海角孤臣》、《平戎帳下歌》、《從戎續舊歌》等
• 「關德興粵劇宣傳團」：《節義春秋》、《燕歌行》、《陳子壯》、《洪宣嬌》等
• 其他：《梳洗望黃河》、《江南廿四橋》、《銀鎧半脂香》、《美人關是鬼門關》、《香化復仇灰》、《李香君》、《梁紅玉》、《孤城血花淚》、《情央夜未央》、《天下賤丈夫》、《孔雀東南飛》、《趙飛燕》、《劉伯溫》、《桃花扇底兵》、《仙境曇花》等

電影^[3][9]：

• 《寂寞的犧牲》（1929，合編）
• 《女兒債》（1936，編劇、導演）
• 《萬惡之夫》（1937，編劇、導演）
• 《百戰餘生》（1937，編劇、導演）
• 《公子哥兒》（1937，編劇）
• 《最後關頭》（1938，編劇、導演）
• 《女兒香》（1939，編劇、導演）
• 《一代名花花影恨》（1940，編劇、導演）
• 《夜盜紅綃》（1940，編劇、導演）
• 《趙子龍》（1940，編劇、導演）
• 《花街神女》（1941，編劇）
• 《天涯慈父》（1941，編劇）
• 《新女兒香》（1953，編劇）
• 《南國麗人》（1958，演員）
• 《一寸山河一寸血》（1972，演員）

相關書目

• 南海十三郎：《小蘭齋雜記》
• 江獻珠：《蘭齋舊事與南海十三郎》
• 廖雲：《南海十三郎之正傳》
• 江沛揚：《滄桑太史第》
• 杜國威：《南海十三郎》

註

1. 《小蘭齋雜記》：「......余又字絳霞，先兄字少霞......」^[1]。
2. 「鏐」本讀「流」（lau4）。依照《小蘭齋雜記》，十三郎話自己「本名『譽球』，後改『譽鏐』」，「鏐」係「取『百忍作金、始可交友』之意」；江沛揚《滄桑太史第》話，十三郎個名係「譽鏐」，因爲名易讀錯，索性自稱「江譽球」。
3. 《小蘭齋雜記》：「......胡為廣州河南南武中學教師，童年余肄業南武附小，即受其訓勉，師友之誼，至今不忘。」^[5]，又「余童年，在廣州河南南武中學附小肄業......」^[6]；嗰時，南武中學設附屬小學，叫「南武小學」，亦叫「南武附小」。除《小蘭齋雜記》，各本均誤作「南武中學」。
4. 《小蘭齋雜記》：「曾偕養父訪余於廣州，養父姓黃，因隨養父姓，名為黃菊霜。余以其名雅逸，亦甚喜悅，菊霜亦知余為生父，初見即有親切之情。」；亦推出黃菊霜生年係1938年^[2]。
5. 而家佛山市禪城區張槎街道。
6. 《小蘭齋雜記》入邊，南海十三郎多次寫「弟子唐滌生」^[4]。
7. 《小蘭齋雜記》：「其初能動余撰劇興趣者，因余在香港預科書院肄業，時年只十五，校中為籌賑西江水災，聘『寰球樂劇團』義演......余乃以莎翁所著之《隨汝喜歡》改編《寒夜簫聲》一劇」^[7]。由江氏喺1910年出世^[3]，計返條數，呢年係1924年。
8. 因爲政治敏感，杜國威編嘅舞臺劇《南海十三郎》將「毛澤東、蔣介石」換成「英國佬、日本仔」^[4]。

攷

1. 南海十三郎。〈已無淨土酣夢醒 尚有黃花晚節香〉. 《小蘭齋雜記》。頁 99。
2. 南海十三郎。〈天涯弗許同相聚 骨肉人間嘆離亂〉. 《小蘭齋雜記》。頁 268。
3. 南海十三郎。〈南海十三郎傳略〉. 出自 朱少璋 (編)。《小蘭齋雜記》。商務印書館。ISBN 978-962-07-5689-4。
4. 〈香港書展2016：南海十三郎的傳奇人生〉。Youtube。
5. 南海十三郎。〈相逢異地猶嘉慰 珍重叮嚀約後期〉. 《小蘭齋雜記》。頁 300。
6. 南海十三郎。〈旅病窮愁為遠客 難療心上舊傷痕〉. 《小蘭齋雜記》。頁 110。
7. 南海十三郎。〈敝屣尊榮徒釣譽 文章倚馬負虛名〉. 《小蘭齋雜記》。頁 133。
8. 聽返香港電台節目《講東講西》之「南海十三郎與小蘭齋雜記」（主持：劉天賜、朱少璋）
9. "Nam Hoi Sap-Sam Long - IMDb". IMDb.