倉木麻衣

  提示：呢篇文講嘅唔係藤澤麻衣。

倉木麻衣（日文：くらき まい^{Mai Kuraki}，1982年10月28號—）係日本女歌手兼唱作人，響千葉縣船橋市出世，依家隸屬NORTHERN MUSIC。

倉木麻衣
女歌手
原文名	くらき まい
羅馬拼音	Kuraki Mai
花名	關西小天后 Mai-K 麻衣ちゃん マイマイ クッキー
出世	(1982-10-28) 1982年10月28號（42歲） 日本千葉縣船橋市
母校	立命館大學
父母	山前五十洋（老豆）
唱片公司	Bip! Records（1999年） GIZA Studio（1999年－2007年） NORTHERN MUSIC（2007年－）

因為佢為名偵探柯南系列獻唱咗21次，所以佢攞到「同一個歌手為同一個動畫唱主題曲次數最多」嘅健力士世界紀錄^[1]。

經歷

佢老豆係電影導演兼生意佬山前五十洋（日文：山前五十洋），爺爺係日本詩人山前實治（日文：山前実治）。而「倉木麻衣」呢個名係佢個藝名，真名唔知，估佢原姓山前。

讀小學嗰時，佢聽到由米高積遜唱嘅歌，之後重睇埋雲妮侯斯頓嘅MV，令到佢對西洋樂有興趣，之後就諗住彈琴。有一次，當佢響度一邊睇住五線譜，一邊哼歌嘅時候，鋼琴老師行過嚟同佢講：「我覺得你做歌手好過去彈琴」。因為老師呢句，倉木佢開始考慮做歌手。響升到初中之後，佢聽咗好多西方歌手嘅歌，例如瑪麗亞嘉兒同埋勞琳希爾，受到佢哋嘅影響，倉木佢最後決定做歌手。響呢個時候，佢識咗BEING創辦人長戶大幸。當長戶聽到倉木嘅樣本唱片之後，就建議倉木升高中之後出道，重叫佢學好英文。升高中之後，長戶介紹佢去GIZA studio度試音，最後試音成功，正式出道，當時佢只有16歲。而長戶就幫佢起個藝名叫「倉木麻衣」。

響1999年10月，佢以「Mai-K」嘅名義響美國出道，同時推出第一支歌《Baby I Like》，之後響日本發售，聽講好快賣嗮。同年12月8號，以「倉木麻衣」呢個名發表第一張日文歌《Love, Day After Tomorrow》。呢首歌開頭銷量唔高，但係響2000年銷量開始急升，響同年3月銷量更加升到去138萬，倉木可以話係「旗開得勝」。

之後，佢隨即發表兩首新歌，分別係《Stay by my side》同埋《Secret of my heart》，呢兩首歌嘅銷量都有100萬左右。而《Secret of my heart》重係倉木第一次同名偵探柯南系列合作。

攷

1. 〈柯南陪倉木麻衣破健力士紀錄 - 20170726 - SHOWBIZ〉。《明報OL網》 (繁體中文)。喺2020-07-05搵到。