2020武統台灣

2020武統台灣，係指中國全國政協委員、解放軍南京軍區前副司令員、退役中將王洪光，喺2016年底預言台灣喺2020年前就會被中國大陸以武力統一。呢個預言最終並無實現，反而成為咗一啲香港同台灣網民恥笑揶揄嘅目標言論。

預言內容

王洪光2016年12月17號喺《環球時報》2017年年會上面^[1]話，台灣喺2020年前就會被中國以武力統一，以中共軍隊而家嘅飛彈同埋長程火箭炮實力，根本唔需要發動兩棲登陸戰就能夠喺幾個鐘頭內炸毀衡山指揮所。^[2][3]佢又話，由於台獨勢力已經成為台灣主流民意，過多1、20年將會無人承認自己係中國人，加上台灣統派力量邊緣化，所以已經去到以武力或武力威脅統一台灣嘅時候。^[4][5]

各地媒體期間嘅反應

• 前中共中央黨校校刊《學習時報》副編審，後嚟定居美國嘅鄧聿文，喺新加坡《聯合早報》撰寫文章，指北京多年讓步無換嚟台灣民眾對北京嘅好感，武統只係時機問題，而2020年係中共『兩個一百年』奮鬥目標嘅第一個一百年，中共領導人具有武統動力。另外，到咗2020年中國理應完成咗本身軍改目標嘅大半，而要檢驗軍改效果，打一仗係最好嘅做法。^[6]

踏入期限前後嘅反應

由於去到2020年底，中國都無任何嘗試武力統一台灣嘅行動，呢番言論，一直以嚟引起咗唔少人嘅恥笑揶揄，當中包括香港台灣兩地嘅網民同埋台灣一啲政治人物。

• 台灣基進黨立委陳柏惟，喺社交媒體發表言論諷刺，話大家「要注意飛彈」，之後有網民回應話因為武漢肺炎疫情延期、改咗做線上武統、反問有邊次唔延期、話佢哋努力生火取暖中（當時因應中澳貿易爭議，中國禁止澳洲煤炭進口引致全中國唔少地方停電限電）唔得閒，同陳柏惟一唱一和。^[2]
• 台灣大型網絡社群PTT有唔少人揶揄係延期，又反問有邊次唔延期。^[4]
• 台灣網絡名人，律師林智群就笑稱「遺民淚盡綠塵裏，北望王師又一年」。^[4]
• 香港高登討論區嘅Facebook，喺2019年除夕進行過直播倒數，畫面寫上「陸退役中將王洪光：2020年前武統台灣」，「國務院通過上海2020年成國際金融中心」，「2020年實現全面建成小康社會」，後兩者左邊仲分別放咗一隻小熊維尼嘅卡通公仔，又叫網民投票中國究竟會唔會走數。^[7]
• 喺2020年12月30號，惡搞媒體眼球中央電視台節目《無話可說》，以「2020武統台灣宣告失敗」為標題揶揄，分析點解武統台灣失敗，更加搵人扮《環球時報》總編輯胡錫進（片內角色叫做胡藍進），又稱呼中共總書記習近平做「習維尼」，話佢笑死人。^[8]

參考

1. 〈今日信報-- 內地議武統 2020年前難免一戰〉。《今日信報》。喺2020-12-31搵到。
2. 〈3年前他預測2020武統台灣 網酸：喔喔! 今天是最後期限呢! | 政治〉。《新頭殼 Newtalk》 (中文)。2020-12-31。喺2020-12-31搵到。
3. https://www.facebook.com/TBSCTS。〈中國退將3年前稱「2020武統台灣」 他截圖搞笑倒數〉。《華視新聞網》 (中文)。喺2020-12-31搵到。 {{cite web}}: |last= has generic name (help); External link in |last= (help)
4. 三立新聞網 (2020-12-31)。〈「2020武統台灣」倒數13小時！網笑翻：哪次不延期？ | 政治 | 三立新聞網 SETN.COM〉。www.setn.com (中文)。喺2020-12-31搵到。
5. 中時新聞網。〈陸退役中將：2020年前武統台灣 - 焦點新聞〉。《中時新聞網》 (中文)。喺2020-12-31搵到。
6. 〈邓聿文：北京或2020年武统台湾(3)_联合早报〉。www.uzaobao.com。原著喺2021-02-12歸檔。喺2020-12-31搵到。
7. 〈中國退將豪語「2020前武統台灣」 港人倒數直播：最後10小時 -- 上報 / 焦點〉。www.upmedia.mg。喺2020-12-31搵到。
8. 《【無話可說】2020武統台灣宣告失敗 紅色統一還要等多久？｜眼球中央電視台》 (英文)，喺2021-01-01搵到