From Wikipedia, the free encyclopedia
呢個傳說喺1980年代尾90年代初流傳,由一班麥當勞員工散播,後來開始喺網上流傳。傳說大概係話,每一包麥當勞包裝茄汁下便都有A1至A12不等嘅怪冧巴,呢啲怪冧巴都係代表茄汁嘅甜酸度,A1最甜,A12最酸。麥當勞噉樣嚟方便各類型人客,等啲人可以揀甜或者酸嘅口味。
呢個傳說流傳到好大,甚至連麥當勞嘅一啲基層員工都噉樣嚟解釋包裝茄汁怪冧巴,加上麥當勞本身無主動解釋怪冧巴點嚟,搞到人人都信咗呢個講法。
後來麥當勞見到傳說越傳越廣,就向啲人解釋,其實包裝茄汁上便嘅怪冧巴,只係代表佢哋嘅生產編號,同茄汁嘅甜酸度完全唔啦更,所有茄汁嘅甜酸度都一樣。而其他牌子嘅包裝茄汁,上便都有印生產編號,不過大家比較注意麥當勞嘅包裝茄汁啫。