麥哲倫海峽

麥哲倫海峽（粵拼：mak6 zit3 leon4 hoi2 hap6）（西班牙文：Estrecho de Magallanes；葡文：Estreito de Magalhães）係南美洲大陸同火地羣島之間嘅海峽，連接大西洋同太平洋。海峽超多彎，行船好易出事。

海峽個名源自1520年10月21號發現佢嘅葡萄牙探險家——麥哲倫。

古仔

16世紀初，葡萄牙航海家麥哲倫信得過自己，話一定可以搵到通去南海^{[註 1]}嘅路，結果喺1519年9月20號帶咗個船隊，從西班牙西維爾出發，開展咗好長時間嘅環球水上探險旅行。到咗南美洲東海岸後跟住海邊去旅行^{[註 2]}，直到1520年10月21號去到南緯52°位置，發現咗個疑似「海灣」嘅位，重派咗兩部船入去睇下咩事，咁啱撞正橫風橫浪，但佢哋冇停到，而係繼續行。直到嗰年11月28號先至離開咗個疑似「海灣」嘅地方，入咗太平洋，打開咗第一次環球航行嘅勝利航道^[1]。後人爲咗紀念佢，將嗰條疑似「海灣」嘅地方改名做麥哲倫海峽。

呢條海峽非常彎曲，西邊係西北-東南走向，中間係南北走向，東邊係西南-東北走向。從西到東啱好轉咗個直角彎。雖然東邊嘅海岸比較直，但中間同西邊啲海岸好多彎曲位，而且超多陡崖同懸崖、島仔同海岬。全長565km，闊度唔固定，最闊有9NM（16.668km），最窄得5鏈（926m）到。水深最深有1080m（近太平洋口嘅群島位），最淺有28m（東段同中段嘅轉角位西南邊附近）^[2]。

海峽周邊同入邊嘅天氣好唔穩定。好多時大霧籠罩、潮水多兼流得快、超多海漩渦、逆流同浮冰出現^[2]，所以呢頭都係人跡罕至，入去時一定要睇實當地嘅天氣情況。一有風雲突變，馬上返去海灣靠邊停好，因為入面有啲港灣可以停大型船隻。雖然巴拿馬運河開通之後，往返太平洋同大西洋嘅船都唔再經呢度，但超大型船隻會有時經過呢度。