香港華字日報

《香港華字日報》（英文：The Chinese Mail），又叫《華字日報》，係份香港報紙，經已停刊。佢初身係《德臣西報》附刊，叫《中外新聞七日報》。一八七二年發行，到一九四六年停刊。佢係香港早期唐字報紙之一。報館喺中環雲咸街五號，卽係報寫大鐘樓上街第五號門牌，同《德臣西報》一樣。

香港華字日報報頭。時爲一八九五年。光緒二十一年歳次乙未。

史

一八七一年三月，《德臣西報》請陳靄庭做副編，搞《中外新聞七日報》。呢份係唐字附報。一八七二年四月十七號，改爲獨立發行，名《香港華字日報》，初時出一週三次。

初時《華字日報》以告白爲主，亦有行情，亦兼報清廷消息、以及廣東、香港兩地及海外近聞。報上有船舶通告、貨價行情、船期、政府憲示及告示等消息，當中包括政府招標通告及種牛痘。告白好多唔同種類，有招股、銀行利率唔同資料。光緒末年，該報加咗「廣智錄」，內容以雜文、中外軼事為主，又有「精華錄」，載有「談叢」、「粵謳」及「歌謠」。

《華字日報》主要係文言寫成。行文以直行爲主，由上而下。部份標題橫行，由右而左。早期係無標點，一氣呵成，咁係當時嘅習慣，讀者要自行斷句。告白、新聞分成細格。有啲同類新聞，會放埋一格，用空隔隔開，段用〇起頭。後尾文風稍稍改變，加咗標點，一則新聞亦另起一段。

一九四一年十二月廿五號，日軍攻入香港島。日治期間，該報停辦。一九四六年四月同六月，兩度復刊。之不過唔夠錢，七月一號又停，從此絕跡香港。該報反映刊時局勢，家下用於研究早年香港歷史、晚清局勢及辛亥革命。

參攷

• 《華字日報》香港早期報刊簡介系列。香港中央圖書館微縮資料室。