順化京城

順化京城（粵拼：seon6 faa3 ging1 sing4；越南文：Kinh thành Huế／京城化），全名順化故都遺跡建築群seon6 faa3 gu3 dou1 wai4 zik1 gin3 zuk1 kwan4（Quần thể di tích Cố đô Huế／群體遺跡故都化），係喺而家越南順化市嘅古代建築羣遺址。呢度喺1993年同順化皇城一齊列入聯合國教科文組織嘅世界遺產名錄。

順化故都遺跡建築群
聯合國教科文組織認定嘅世界遺產
順化京城
登錄原文名
英文	Complex of Hué Monuments
法文	Ensemble de monuments de Huê
基礎信息
國	越南
位	承天順化省順化市
座標	16°28′11″N 107°34′40″E
類	文化遺產
標準	iv
籌	678
登錄史
登錄年份	1993年 （第17屆）

佈局

順化京城喺香江隔籬，京城南臨香江，南邊對住案山御屏山，構成風水格局。

皇城

順化京城嘅中心係阮朝皇帝嘅宮殿順化皇城（Hoàng thành Huế／皇城化），皇城入面有正殿太和殿，阮朝帝后妃嬪居住嘅紫禁城，太后同太妃居住的壽祉宮、長寧宮，供奉祖先嘅太廟、世廟、肇廟、興廟、奉先殿等建築，同埋內務府、馬廠、象廠等等服務性機構，重有几暇園、瀛洲等園林。皇城正門午門嘅南面有大旗台。

政府機構

喺皇城出面嘅順化京城，設有都城隍廟、社稷壇、觀象台、敷文樓、國子監、文廟、啟聖祠、賢良祠、機密院、六部、都察院、國史館、通政使司、淨心湖、藏書樓、火藥碪硝庫、慶寧宮、保定宮、宮監院、平安堂、武庫、鎮平台、恭宗廟、舒光園等等嘅政府機構、離宮同園林。

城牆、城台

京城外圍有正方形城牆，內填夯土，外包磚石，城牆厚20米，高6米，長9950米。城牆出面係畀寬22米、深4米嘅護城河圍住。四面城牆上共有二十四座西洋式棱堡，叫做「台」。南面城牆有南明台、南興台、南正台、南昌台、南勝台、南亨台等六台；東面有東泰台、東長台、東嘉台、東輔台、東永台、東平台等六台；西面有西成台、西綏台、西靜台、西翼台、西安台、西貞台等六台；北面有北定台、北和台、北順台、北中台、北奠台、北清台等六台。每座城台上面都設有大砲，城台下面係火藥庫同值更所^[1]。

城門、街道

順化京城設城門十一座，南面係體仁門、廣德門、正南門、東南門，東面係正東門、東北門、鎮平門，西面係正西門、西南門，北面係正北門、西北門。明命元年五月設京城街道，體仁門內係體元大街，廣德門內係廣德大街。城內一共設咗九十五個街坊^[2]。

御河、淨心湖

嘉隆元年，喺城內嘅武庫附近開鑿清溝，之後擴建咗御河，河上起有御河橋、慶寧橋、永利橋、博濟橋、平橋等石橋。喺御河流出城嘅地方，設有東城水關同西城水關^[3]。

皇城東北、御河南面有淨心湖，湖中小島原本係火藥庫，之後改做阮朝皇室遊玩嘅離宮，四周圍牆，闢有夏薰門、春光門、秋月門、冬曦門四門，湖中有蓬萊島、方丈島同四達亭三座水中小島，重有蓬瀛殿、清心榭、南薰閣、天然堂、養性軒、淨心樓、碧藻門、紅蕖橋、綠柳橋、白萍橋、金鶯堤等景點。

明命帝在位嗰時，曾題有「鶯堤春色」、「曲榭荷風」、「淨湖曉月」、「水榭觀魚」、「湖樓煙雨」、「竹徑乘涼」、「輕槎賞蓮」、「南薰覽勝」、「澄練晩晁」、「三洲曉景」等「淨心湖十景」。

鎮平台

喺順化京城嘅東北角，重設有凸出城外嘅小城一座，叫做鎮平台（初名太平台），設有鎮平門，係駐軍守城嘅要塞，周長738米，高20米，牆厚10米，周圍有寬22米嘅護城河，擺咗三門大砲同埋有座火藥庫喺度。阮朝後期，鎮平台變咗做法國軍隊駐紮嘅營地。

行宮、寺院、皇陵

順化京城嘅出面，重設有香江行宮、神符行宮、順直行宮、順安行宮、翠雲行宮、虎園等阮朝時期嘅行宮建築，同埋南郊壇、先農壇、玉盞山神祠等等嘅禮制建築。城內同城外嘅宗教建築有靈佑觀、妙諦寺、天姥寺、國恩寺、慈孝寺。至於郊外就有興祖孝康皇帝基聖陵、世祖高皇帝天授陵、聖祖仁皇帝孝陵、憲祖章皇帝昌陵、翼宗英皇帝謙陵、景宗純皇帝思陵、恭宗惠皇帝安陵、弘宗宣皇帝應陵等等嘅阮朝皇家陵寢建築。

註

1. 《大南一統志》卷一：京師·城池·京城
2. 《大南一統志》卷一：京師·城池·京城
3. 《大南一統志》卷一：京師·城池·京城

出面網頁

• Complex of Hué Monuments