青山灣

青山灣（Castle Peak Bay，Tsing Shan Wan），又名屯門灣，古名屯門澳，係香港一灣，喺新界屯門。青山係灣嘅西面。舊時海灣遼闊，因建青山新市鎮，大幅填海，灣失泰半，西側填到平直，北填留一明渠，叫屯門河。今灣內有堤，分灣爲二。一邊係屯門避風塘，係三聖墟嘅地方，另一邊係海灘，灘有青山灣泳灘、加多利灣、舊咖啡灣、新咖啡灣、黃金泳灘。灣東盡處，爲龍珠島。

青山灣

史

1898年《展拓香港界址專條》中之青山灣，名Castle Peak Bay，甚為寬闊

青山灣，舊時水面甚闊，東西有兩山屏蔽，東有九逕山，西有青山，南面有大嶼山爲巨屏，堪可避風，水上人亦聚居於此。古船巨舶，舊時亦聚於此灣，候時入省，或出南洋。劉宋時，已有各國船麕集。

屯門之名，見諸古籍。大唐時設屯門鎮，駐重兵，防海賊，屯門之名，因以爲始。鎮治喺今深圳南頭，同家下屯門無幾遠。古時屯門所治，範圍堪大，已不可考。因時地不同，屯門之名，亦各有意思。屯門澳，多指青山灣。屯門海，指青山灣到大嶼山嘅洋面。屯門汛，喺青山灣呢面爲基地。有時寫屯門海澳，屯門海島，就未必係青山灣呢面，而係大嶼山嗰面。

大明時，佛朗機人到屯門海澳海島立寨，青山灣就近大陸南頭寨，兵數眾多，佛朗機不能以此地爲寨。反而，喺大嶼山爲屯門島，當中一澳爲屯門澳，會較合理。

英國見青山似城堡，名之爲Castle Peak，意爲城堡山，而灣名就順理成章叫Castle Peak Bay。後租得大清新安縣南部。Castle Peak既爲青山對譯，Castle Peak Bay亦叫青山灣，灣名沿用至今。而近灣地方，一直叫青山。

水陸居民，以三聖墟爲市，墟有三聖廟，一九一四年所立。

二十世紀，六十年代尾。香港政府着手立青山新市鎮，後改名屯門新市鎮。地名由青山改屯門。但灣名仍叫青山灣。建新市鎮時，青山灣大幅填海，灣大爲收窄。

風俗

青山灣有水上人聚居，年年有龍舟競渡。