電子遊戲製作
From Wikipedia, the free encyclopedia
電子遊戲製作(粵拼:din6 zi2 jau4 hei3 zai3 zok3;英文:video game development,game dev)係製作一隻電子遊戲嘅過程。廿一世紀嘅電子遊戲設計以及製作係一個相當專業化嘅領域,而大公司製作新遊戲預算閒閒地都過百萬美金。
要製作一隻電子遊戲,製作者需要做多個工序:佢哋要諗好隻遊戲嘅核心諗頭,再做好程式編寫、電腦圖像製作、同為隻遊戲寫故仔等嘅工作,整一隻初型出嚟,跟手仲要試行試玩吓隻初型,發覺到有問題就要返轉頭執(電子遊戲設計),搞掂出得街之後,仲要度有關點樣為隻遊戲做宣傳等嘅問題,而且喺隻遊戲出咗街之後,製作組仲要喺社交媒體等嘅地方留意玩家俾嘅意見,睇吓隻遊戲有冇乜嘢需要再執[1]。因為電子遊戲製作嘅專業性,呢個領域當中有相當多嘅行話[2]。