行山

行山，書面語叫遠足，英文叫 hiking，係行路嘅一種，可以鍛鍊身心、旅遊享樂、欣賞風景等，行山地方一般係冇乜人住嘅郊外，郊野公園嘅行山徑。

行山嘅地方

各地行山嘅地方受到當地嘅地形風貌、氣候所限，山多嘅香港行山徑經過山脊、山谷、河谷。挪威嘅高原、高山、冰川多，而冬天好凍，嗰道行山嘅要求有啲唔同，好多時只有夏天先行得。行山地方包括：城郊、鄉村、山地、森林、叢林、沙漠、冰川、峽谷、平原、山嶺、長城、古道、草地、環湖…

行山喺香港係幾受歡迎嘅活動，唔使好多錢就可以玩足成日，香港嘅行山徑又多，變化又大，有各種唔同類型、長度、難度可以揀。特點係同市區嘅距離近，而且配套設施（比如標距柱等等）比較完善。

澳門十幾條步行徑位於氹仔、路環、黑沙，由1.6 公里到 8.1 公里長。中國大陸近年興起行山團，由熟識當地情況嘅導遊帶團。

加拿大同美國有幾多原始森林，國家公園，行山徑數目好多，管理亦好，加拿大BC省就有成百公里嘅行山徑^[1]。

歐洲行山徑數目好多，不過各國情況唔同。

澳洲地方大，人口少，好多屬無人之地，離開市區可以好多日見唔到人，響嗰道行山要格外小心，出發之前要通知其他人，參加熟識當地嘅導遊帶嘅本地團亦唔錯。

行山友通常唔靚景都唔去行。不過呢啲靚景地方通常都好脆弱。行山友有時會唔小心整壞個環境。一個人通常都無乜大影響，但係一大班人就唔可以睇小。響山道執柴，無山火嘅話，一次兩次就無乜影響。但係人人長年累月咁執，會拎走地方嘅養份。

通常好多受保護嘅地方，好似郊野公園咁，都有法例去保護。行山友跟住來做，影響就會細好多。通常例包括，唔畀生火，只可以響營地紮營，處理好大小二便，同每日限制人數。

行山友有自己一套規矩，就係不留痕蹟。行山友行到好似無人行過咁，第日嘅人一啲都睇唔出。好多行山友就算無例都跟呢套做。