遊戲開發者

遊戲開發者（粵拼：jau4 hei3 hoi1 faat3 ze2 | 英文：game dev）指製作電子遊戲軟件嘅企業、團體或者個人。喺廿世紀嗰陣，遊戲軟件幾乎冚唪唥都係由一啲團隊製作嘅，但係喺廿一世紀開始，因為某啲技術上嘅進步，開始有咗唔少由個人製作嘅獨立遊戲^[1]。

分類

• 第一方開發者（first-party）：俾一間遊戲機平台製作商收購咗嘅開發者，一個第一方開發者製作嘅遊戲通常只會喺佢所屬嘅平台製作商出嘅遊戲機平台上賣^[2]。
• 第二方開發者（second-party）：唔屬任何平台製作商，但同某啲平台製作商有特別協議嘅開發者，一個第二方開發者製作嘅遊戲通常只會喺同佢協作嘅平台製作商出嘅遊戲機平台上賣^[2]。
• 第三方開發者（third-party）：完全唔屬任何平台製作商嘅開發者，一個第三方開發者製作嘅遊戲可以喺任何遊戲機平台上賣^[2]。

睇埋

• 電子遊戲設計
• 電子遊戲詞彙，做遊戲開發嘅人必備嘅知識