通貨膨脹
From Wikipedia, the free encyclopedia
通貨膨脹(粵拼:tung1 fo3 paang4 zoeng3;英文:inflation),日常用語就噉簡稱通脹,係指「個經濟體內部啲貨同服務嘅價錢普遍噉升」嘅現象,通常表示個經濟體裏面多經濟活動[2];通脹率就係指啲反映「通脹發生得幾快」嘅數值,會用「啲嘢嘅價錢喺呢年呢年升咗幾多 %」噉嘅方式表示[3]。
喺經濟學相關工作上,通脹呢個課題廣受關注:
- 一方面,極快嘅通脹(惡性通脹)會對民生造成龐大嘅負面影響。想像家陣有個人,佢銀行入面儲住咗 100,000 文美金,打後佢身處嗰個經濟體發生通脹(例如政府亂咁印銀紙,搞到銀紙價值跌),而且靠利息賺到嘅錢追唔上通脹,噉等到佢攞返筆錢出嚟嗰陣,筆錢買到嘅貨同服務嘅量就少咗-即係話通脹會導致隻貨幣嘅購買力下降;而如果通脹勁得滯,仲有可能會搞到啲人對隻貨幣冇嗮信心,唔想再揸隻貨幣,最後就出現「隻貨幣冇人要」噉嘅局面,例如津巴布韋元(Z$)就係噉[4]。
- 不過另一方面,慢同輕微嘅通脹畀人覺得係對經濟有利嘅[5]:通脹會搞到隻貨幣嘅購買力慢慢噉跌;簡化講,噉就表示啲人會唔想淨係揸住啲錢,而係會有誘因想攞啲錢去做投資(例如買股票)慢慢轆大自己嚿儲蓄,然後呢啲投資就會刺激經濟(例如企業賣到股票就會多咗資金,有資金就有得擴張業務);除此之外,慢同輕微嘅通脹仲畀人指可以達致「減低失業率」等嘅正面效果[6]。
因為通脹對經濟同民生咁有影響力,世界各地嘅政府同經濟相關工作者都成日會諗「點樣量度通脹」或者「要用乜政策先可以控制通脹」等嘅問題,想自己管嘅經濟體有慢同輕微嘅通脹,同時又唔會出現惡性通脹。喺學術上,唔少專業嘅經濟學家仲會醉心鑽研通脹,會喺學術期刊等嘅地方撰文,對呢種現象做理論性質嘅研究[5]。