軟硬天師
From Wikipedia, the free encyclopedia
軟硬天師(粵拼:jyun5 ngaang6 tin1 si1;英文:SoftHard)係香港嘅一對娛樂組合兼粵語Hip-hop始祖,成員包括「軟天師」葛民輝同埋「硬天師」林海峰。兩個人原先係明愛白英奇專業學校設計系嘅同學(當時嘅同學重有出名嘅攝影師夏永康),畢咗業之後去咗ESPRIT一齊設計櫥窗,後來一齊被香港商業電台請咗。最初兩個喺商業電台林姍姍主持嘅節目《姍姍收音機》以一軟一硬嘅方式向聽眾問問題,個名就係噉嚟。後來兩個人都報過交通消息(葛民輝嘅《馬路天使 葛 of the road》出名啲)。兩個人以嬉笑方式主持電台節目而出名,1988年加入張麗瑾嘅節目《飛越癲狂院》,有「市場價格」環節。1989年9月9號,喺九龍大專會堂做咗第一個表演《軟硬天師軟硬Show》。
Quick Facts 軟硬天師, 組合 ...
Close
之後佢哋愈嚟愈多人識,兩個人主持嘅電台節目有《軟硬癲台》、《老人院時間》、《軟硬今朝》等等。當中《老人院時間》好受後生仔歡迎,《整蠱電話》環節重去到係人都知。之後佢哋兩個出咗好多隻碟,又主持電視節目《軟硬製造》、拍戲等等。直到1995年,佢哋再以組合身份出現。林海峰喺2005年嘅《是但噏發花癲》棟篤笑中提到,佢將會同葛民輝,重有達明一派會喺2007年一齊表演。而喺2006年,軟硬兩個再以組合形式做咗一連串嘅合作計劃,好似拍麥當勞嘅賀年廣告、重有《軟硬天師 Long Time No See 演唱會》[1]。2006年,軟硬更化身成朋克樂隊「高山青龍」,喺「黃貫中狂人習作之音樂篇」演唱會同埋各大媒體出現,暗串當時香港流行樂壇唔掂同埋太多K歌。