諾貝爾和平獎得主一覽
From Wikipedia, the free encyclopedia
挪威諾貝爾委員會每年都會將諾貝爾和平獎頒畀「促進民族國家團結友好、取消或者裁減軍備、同埋為和平會議嘅組織同宣傳盡咗最大努力或者貢獻嘅人」[1]。呢個獎係喺1895年根據阿爾費利德·諾貝爾嘅遺囑設立嘅五個諾貝爾獎之一,分別畀喺化學、物理學、文學、和平同生理學或醫學唔同方面有傑出貢獻嘅人[2]。根據諾貝爾嘅遺囑,和平獎會交畀挪威諾貝爾委員會管理,挪威議會會揀5個人組成委員會嚟決定攞獎嘅人選[3]。諾貝爾和平獎嘅第一次頒獎係喺1901年,嗰時有兩個人攞獎,分別係弗雷德里克·帕西同埋亨利·杜南。每位得獎者都會攞到一塊獎牌,一份證書,仲有唔同銀碼嘅獎金[4]。1901年,帕西同埋杜南攞咗15萬零782瑞典克朗,即係等於2008年嘅773萬1004瑞典克朗。 和平獎每年12月10號喺奧斯陸頒發,呢一日係諾貝爾嘅忌日,挪威國王會親自將獎項頒畀每一位得獎者,係唯一一項唔係喺斯德哥爾摩頒發嘅諾貝爾獎[5]。另一個同其他諾貝爾獎嘅唔同嘅地方係,和平獎會成日畀組織,而唔係個人,例如紅十字國際委員會就先後三次攞到呢個獎。
有啲觀點覺得和平獎係諾貝爾獎入面最具爭議嘅一個獎,佢揀嘅好多位得獎者都受過批評[6][7],聖雄甘地曾經先後五次攞到提名,但始終都係無攞獎。1948年佢俾人刺殺之後,挪威諾貝爾委員會曾經考慮追頒,但最終都係無咁做,而係決定喺呢年唔頒獎。佢畀出嘅解釋係:「無適合而且在生嘅候選人」[8]。1961年,道格·哈馬紹喺拎到提名之後逝世,但依個時候獎都係仲未頒發,佢亦成為唯一一位攞到追頒嘅得獎者。依次之後,規則進行咗調整,令到之後幾乎無可能再有人會得到追頒[9]。1973年,黎德壽拒絕接受諾貝爾和平獎,表示考慮到越南嘅處境,自己無立場嚟接受依個獎項[10]。萊納斯·鮑林喺1962年攞到諾貝爾和平獎,仲喺1954年攞到諾貝爾化學獎,成為唯一一位攞到兩次諾貝爾獎嘅得獎人[10]。2009年奧巴馬得獎都俾人批評好草率同頒獎理由企唔住腳。1989年同埋2010年,西藏宗教領袖十四世達賴喇嘛同埋中國異見人士劉曉波分別攞獎,激起中國大陸政府嘅強烈抗議。馬拉拉·優素福紮伊喺2014年拎到諾貝爾和平獎,成為諾貝爾獎歷史上最後生嘅得獎者。佢攞獎嗰陣剩係得17歲[11]。2017年,諾貝爾和平獎就頒咗畀國際廢除核武器運動。