肇東

46°3′4.2″N 125°57′41″E

中華人民共和國 > 黑龍江省 > 綏化市 > 肇東市

  呢篇文講縣級市。想搵肇東市轄下同名嘅鎮嘅話，請睇肇東鎮。

肇東市
宋站
地圖
肇東市喺綏化市內嘅地理位置
明細
粵拼	siu6 dung1 si5
普通話拼音	Zhàodōng shì
所屬省級政區	黑龍江省
所屬地級政區	綏化市
政區類別	縣級市
成立	1912年11月5號（建置）[1] 1986年9月8號（設市）[1]
政府駐地	肇東鎮[2]
首長	隋旭鵬（市長）[3] 張偉志（市委書記）[4]
面積
- 全部	4,332 km2（1,673 sq mi）[5]
街道辦事處數目	4[6]
鎮數目	12[6]
鄉數目	9[6]
人口（2016）	87.98萬人[7]
人口密度	203.09 人/km²
本地生產總值（2016）	403億元[7]人民幣
郵政編碼	151100[2]
電話區號	0455[2]
車牌	黑M
時區	本地時區：UTC+9
網站： 肇東市政府
睇 傾 改

肇東（粵拼：siu6 dung1）係中國黑龍江綏化嘅縣級市，位於黑龍江南部^[2]。面積4332 km²，市區規劃面積50 km²，建成面積36 km²；人口87萬（2016年）^[7]，其中城區人口30萬，農村人口63萬（約係2015年數據）^[5]。

肇東地處松嫩平原中部草甸草原，位於松花江中游北岸，地勢平坦，沿江有大片草地，中部、北部多係鹽鹼地，氣候上屬中溫帶大陸性氣候^[2]。交通上有濱洲鐵路、301國道、305省道、G10綏滿高速經過，松花江亦可以通航。當地有金代嘅八里城古蹟^[2]。

史

中國地名變遷
建置	1912年11月5號
現名	肇東市
中華民國	肇東設治局（1912年~1914年） 肇東縣（1914年之後）
中華人民共和國	肇東縣（1949年~1986年） 肇東市（1986年之後）

「肇東」嘅意思係「肇州東部」，佢同「肇源」一樣從肇州分出，佢哋三個合稱做「三肇」。「肇」嘅意思係「肇興、開始」，當年金太祖完顏阿骨打就喺三肇度大敗遼軍、建立金國，所以喺呢度設「肇州」紀念，有「肇基王績」嘅含義。

肇東地方原本係遊牧民族領地，隋唐時係靺鞨，十三世紀末葉之後主體民族係蒙古族。金國建立後，天會八年（1130年）喺今日肇東四站鎮西南3公里嘅地方起八里城，係當時嘅軍事重鎮。清朝順治五年（1648年）呢度歸郭爾羅斯後旗。光緒九年（1883年）扎薩克府（旗公府）從公營子（今日肇源茂興鎮西）搬到老爺屯（今日肇東四站鎮東興村）^[1]。之後光緒年間出放蒙墾，多咗移民，喺光緒三十四年（1908年）肇州直隸廳喺昌五城（昌五鎮）設肇東分防^[8]。

民國成立後，1912年11月5號，肇東分防改爲肇東設治局。設治局係民國時屬省嘅二級政區，係設縣前做籌備嘅過渡政區。1914年7月11號，肇東設治局升為肇東縣。之後肇東嘅縣置一直延續，到1986年9月8號，由縣升為肇東市^[1]。

喺1912年到1937年間，肇東政府駐地喺昌五，喺1937年12月3號，肇東縣公署從昌五城搬到滿溝（而家肇東鎮），之後一直駐嗰度。因爲之前嘅駐地喺昌五，所以肇東設治局又有種嗌法爲「昌五設治局」。肇東鎮一帶原本叫甜草崗，因爲笪崗地出產甜甘草；後來俄國人鋪東清鐵路來呢處設站時，因爲係蒙古郭爾羅斯後旗嘅牧地，所以俄國人起名做「蒙古站」，站名嘅俄文發音後來畀當地諧音成「滿溝站」；1939年搞街村制時，定名做滿溝街，政府駐地改來呢度後，爲咗同縣名一致，1940年5月1號滿溝街改叫肇東街^[1][8]。

隸屬同領域變動方面，初時屬龍江道，1929年2月廢道，由黑龍江省直轄做二等縣。滿洲國時期初屬黑龍江省，1934年12月改屬濱江省，1935年9月而家縣西南部份嘅第三區大部（四站、西八里、澇洲、德昌、五里明）劃畀郭爾羅斯後旗。滿洲國崩潰後，1945年12月屬哈西專區，1946年3月屬吉江行政區，當年4月郭爾羅斯後旗嘅八里、四興（卽四站）、向陽、三星、同仁村，呼蘭縣嘅樂安、安居、長發、萬寶村劃入新設嘅樂安縣。當年5月，撤銷吉江，改屬嫩江省，當年7月，樂安併入肇東。1947年2月到9月間屬黑嫩聯合省第四專區，黑嫩分開後，屬嫩江省，1949年5月，嫩江併入黑龍江，肇東跟住改屬，由黑龍江省直轄。1958年8月25號劃畀哈爾濱市；1959年12月14號，肇東嘅萬寶公社畀咗哈爾濱道裏區，遞年1月執行。1960年5月12號，肇東由哈爾濱改屬松花江專區，之後松花江專區改名做綏化專區/地區，之後演變成而家嘅綏化市^[8]。

政區

肇東轄4條街道、12個鎮、9個鄉、2個單位^[6]，之下再分爲33個社區、186條行政村^[5]：

• 街道：朝陽區街道、東昇區街道、西園區街道、正陽區街道
• 鎮：肇東鎮、昌五鎮、宋站鎮、五站鎮、尚家鎮、姜家鎮、里木店鎮、四站鎮、澇洲鎮、五里明鎮、黎明鎮、西八里鎮
• 鄉：太平鄉、海城鄉、向陽鄉、洪河鄉、躍進鄉、德昌鄉、宣化鄉、安民鄉、明久鄉
• 單位：四方山農場、澇洲魚種場

喺2015年，西八里由鄉升爲鎮^[9]。

攷

1. 〈歷史沿革〉。肇東市政府。原著喺2014年11月19號歸檔。喺2015年10月2號搵到。
2. 〈肇東市概況地圖〉。行政區劃網。2013年2月21號。喺2015年10月2號搵到。
3. 〈政務公開：市政府〉。肇東市政府。喺2019年3月9號搵到。{{cite web}}: CS1 maint: url-status (link)
4. 〈政務公開：市委〉。肇東市政府。喺2019年3月9號搵到。{{cite web}}: CS1 maint: url-status (link)
5. 〈行政區劃〉。肇東市政府。原著喺2016年7月22號歸檔。喺2015年10月2號搵到。
6. 〈2018年統計用區劃代碼：肇東市〉。中華人民共和國國家統計局。喺2019年3月9號搵到。
7. 〈2016年肇東市國民經濟和社會發展統計公報〉。《肇東市政府》。2017年4月15號。喺2019年3月9號搵到。{{cite web}}: CS1 maint: url-status (link)
8. 〈肇東市歷史沿革〉。行政區劃網。2013年2月21號。喺2015年10月2號搵到。
9. 對比2014年同2015年嘅政區代碼變動。