From Wikipedia, the free encyclopedia
糧船灣超級火山[1](英文:High Island Supervolcano[2])喺香港新界西貢區糧船灣伸到果洲群島一帶,山體向東傾斜約莫30度,直徑有18公里,係香港以至成個中國東南部第一座被發現嘅古代超級火山。依家喺一座死火山,位置幾乎包澌香港地質公園西貢東部嘅火山岩區,依家多數火山岩已經被風化侵蝕,得番啲殘餘[3],而且座火山大部分都喺海平面之下[4]。
呢座死火山上面個部分係火山岩,由糧船灣伸到果洲群島,幾乎包澌西貢東部地質公園入面大塊土地。火山口喺糧船灣一帶,當時岩漿嚟自九龍半島同港島北部,岩漿通過幾條通道向東輸送,穿過馬鞍山同將軍澳[5]。座火山上次爆已經係1億4千萬年前嘅事,噴出約莫1萬3千億立方米嘅火山灰,啲灰冷卻凝固之後,變成一轆轆六角石柱。火山嘅深層部係花崗岩,由淺入深噉由西貢向九龍同香港島伸開去[6][7][8][9]。土木工程拓展署已經喺嗰度採樣,然後交畀外國相關機構化驗測年[4]。
土木工程拓展署話,喺1億幾年前,香港同成個華南東部都係位於火山帶。經過拓展署多年嘅地質調查發現,喺2012年確認糧船灣伸延到果洲群島一帶曾經有一座超級火山,叫做糧船灣超級火山[3][5][10][11]。土木工程拓展署為咗呢嗰發現寫咗篇文,並喺2012年1月美國地球物理期刊《Geochemistry, Geophysics, Geosystem》入面[6] 發表[12]。
糧船灣超級火山上次爆係1億4千萬年前嘅事,火山爆發嗰陣,幾百立方千米嘅高矽質岩漿從地殼淺層嘅岩漿庫湧出,同時間造成附近幾公里嘅地殼下陷而呈現出盆地地形,形成一個破火山口(破火山口指嘅係因為冇咗岩漿支撐而崩塌咗嘅火山口)。當時噴出約莫1萬3千億立方米嘅火山灰,啲灰急速凍咗凝(king4)埋收縮之後,變成依家可以喺糧船灣、果洲群島度見到嘅六角凝灰岩柱。
超級火山指嘅係可以引發極大規模爆發嘅火山,係以火山嘅噴發量嚟計嘅,當時糧船灣超級火山爆發,爆發指數(VEI)係最高嘅八級,噴出約莫一千立方公里嘅岩漿。以爆發指數嚟計,糧船灣超級火山當年爆發嘅威力係2011年5月冰島格里姆火山爆發嘅一萬倍。
糧船灣超級火山嘅獨特地形,有助科學家解開現時歐亞板塊同菲律賓板塊移動過程中嘅一啲謎團,成座超級火山遺址都有資格申請做世界自然遺產,佢嘅科學研究價值能夠幫助科學家了解地球嘅演變過程。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.