粵地流行文化類型、音樂品種 From Wikipedia, the free encyclopedia
.png) |
|---|
| 呢篇文係 香港人口及文化系列之一 |
|
其他香港系列 |
粵語流行曲最初由電影電視嘅主題曲開始慢慢發展，到七、八十年代係粵語流行曲嘅「黃金時期」，喺廣東話地區所有電視電台都幾乎只會播粵語流行曲，甚至去到全世界，重出現咗英文 Canto Pop 呢個字，反映粵語流行曲唔單只係一種地方音樂，甚至喺世界音樂之中有一個地位。不過1998年之後，廣東歌市場慢慢萎縮，而國語歌，重有日、韓歌都已經取代咗廣東歌個市場[1]。
粵語流行曲冇一個確實起源，都係由好多人一路喺唔同方向試吓試吓咁演變出嚟，多數認為係五十年代開始。最初廣東歌根本就冇人聽，所以唔講得上流行，後來嘅電影同電視劇都會用廣東歌做主題曲，一路到七、八十年代開始成熟，而且成為音樂市場主流，但係近十年廣東歌慢慢式微，聽廣東歌嘅人越嚟越少。
英文 Canto Pop 係外國人對粵語流行曲嘅稱呼，喺1970年代，有一個香港嘅斯里蘭卡人 Hans Ebert，佢本身係一個廣告界嘅人，同時又喺美國billboard雜誌寫稿，佢喺一篇介紹許冠傑嘅文入面，就用 Canto Pop 代表許冠傑同新一代摩登化嘅粵語流行曲，之後 Canto Pop 就成為粵語流行曲稱呼[2]。到後尾重發展出 Canto Rock、Canto Electroica、Canto R&B、Canto Rap、Canto Singer Songwriter 等等。
早期粵語流行曲主要係電影插曲，而且都係改編英文歌或者粵曲，到70年代受西方音樂影響，又加上香港華洋雜處，開始有一啲西方音樂混合中國元素好似小調、五聲音階嘅歌，到後期又有K歌，即係適合喺卡拉OK唱嘅歌，除此之外粵語流行曲重有好多西方音樂類型嘅歌，好似R&B、hip hop、搖滾同電子音樂等等。
粵語流行曲發展都係以香港做中心，所以粵語流行樂壇其實即係等如香港流行樂壇。
早期粵語流行曲主要係電影插曲，好多歌只會喺電影先有，唔會出唱片，咁係因為嗰陣啲唱機好貴，有錢佬先賣得起，而有錢人又以鬼佬為主，普通人就算買唱片都無唱機聽，所以唱片公司多數只出英文碟，唔會出廣東碟。除非唱歌個人好紅，例如鄭君綿、陳寶珠、蕭芳芳，呢啲唱片公司就會當電影附屬品咁去出唱片賣。
七、八十年代開始，係粵語流行曲高峰期，而唱片出版主要係幾間大唱片公司壟斷，1994年香港政策透視一個叫《霸權下的流行文化》有個統計話，當年有三百首歌入面，寶麗金佔咗57首，華納、華星同新藝寶夾埋都佔咗57首，電台同電視台都會為咗利益而去催谷唱片公司要求推廣嘅歌，慢慢形成大唱片公司壟斷同音樂類型狹窄嘅局面，細公司或者一啲獨立音樂基本上無得發展[3]。
香港主要大唱片公司有寶麗金（PolyGram）、無綫電視附屬機構華星、新藝寶，同埋喺1921年已經喺香港插旗嘅百代（EMI），另外1977年嘅美國華納唱片（WEA）嚟咗香港插旗，1978年嘅日本新力唱片（CBS Sony）亦嚟咗香港插旗。1991年臺灣歌手羅大佑嘅音樂工廠喺香港發展，之後臺灣嘅滾石唱片亦喺香港插旗。
1998年寶麗金改名環球，之後開咗間分公司叫正東，嗰陣喺正東做嘅黃柏高後來又自立門戶，開咗間金牌（Gold Label），以子母公司形式同 EMI 合作。金牌開創咗一條龍方式經營，即係歌星除咗出唱片，重會拍廣告，拍電影，都由同一間公司包晒。
1999年1月英皇唱片（EEG）成立，亦係一條龍方式經營。呢個時期亦係唱片市場萎縮緊嘅時期，歌星除咗出唱片，主要工作重有拍廣告、拍電影，甚至T勁歌金曲頒獎典禮都特登整個《最受歡迎廣告歌大獎》，拍廣告已經變咗歌星重要收入來源。
2000年之後，亦有好多新唱片公司加入競爭，好似有 Music Nation、BMA、Silly Thing、東亞、人山人海等等。
早期粵語流行曲歌星主要有鄭君綿、鄧寄塵、周聰、陳寶珠、蕭芳芳等等。
1970、80年代早期最賣錢有許冠傑、溫拿樂隊、關正傑、甄妮、鄭少秋、羅文等等。80年代尾係譚詠麟、梅艷芳、張國榮天下。同時期其他歌星重有徐小鳳、林子祥、關正傑、陳慧嫻、陳百強、張學友、林憶蓮、葉蒨文等等。80年代中期開始亦興起樂隊熱潮，好似有Beyond、太極、達明一派等等。
1990年代有四大天王熱潮，即係張學友、劉德華、黎明、郭富城。「四大天王」由1992年正式誕生，同期首席女歌手係葉蒨文、林憶蓮同王菲，90年代中期則加入鄭秀文、彭羚，同時期吹起無厘頭風，代表有軟硬天師。90年代中其他主要歌星有周華健、鄭伊健、周慧敏、許志安、李克勤、關淑怡、李蕙敏、蘇永康、梁漢文等，到90年代後期又有古巨基、陳奕迅、陳慧琳、楊千嬅、梁詠琪。
2000年代主要歌星有陳奕迅、古巨基、李克勤、張敬軒、許志安、謝霆鋒、陳冠希、梁漢文、鄭中基、麥浚龍、黃耀明、容祖兒、陳慧琳、楊千嬅、何韻詩、梁詠琪、謝安琪、薛凱琪、王菀之、吳雨霏、鄭希怡、側田、衛蘭、葉振棠(2000年代復出); 組合有Twins、Shine、E-kids、Cookies、Boy'z、Swing、LMF、HotCha等等; 樂隊Mr.、RubberBand。
2010年代有陳奕迅、張敬軒、許志安、容祖兒、謝安琪，重有好多新人靜靜掘起，如林奕匡、周柏豪、吳業坤、許廷鏗、胡鴻鈞、洪卓立、陳柏宇、鄭俊弘、馮允謙、鄧紫棋、連詩雅、王灝兒、吳若希、泳兒、羅力威、江海迦、李幸倪、林家謙等等，更有多個香港音樂組合及樂隊，包括樂隊Supper Moment、Dear Jane、Kolor、Tonick、Zpecial；組合Super Girls、As One、C AllStar、MIRROR、ERROR等等。
2020年代有香港音樂組合MIRROR、P1X3L、COLLAR、Lolly Talk、STRAYZ、石山街、MC $oHo & KidNey、ERROR；女子樂隊WHIZZ同FIESTER；歌星炎明熹、張天賦、詹天文、張馳豪、雲浩影、陳凱詠、陳毅燊、洪助昇、洪嘉豪、張蔓姿、張蔓莎、吳家忻、魏浚笙、陳宗澤、湯令山、黃妍、陳蕾等等。
粵語流行曲原本只係喺香港同華南地區有影響力，要到1980年代先至衝出香港。由張國榮、梅艷芳、Beyond以至到後期張學友、劉德華，喺中國大陸同臺灣都好有市場。一啲地方重因為粵語流行曲，個個爭住學粵語，講嘢有粵語腔先至係潮流嘅象徵。
粵語流行曲雖然盛極一時，但都唔係人人鍾意，唔鍾意嘅人主要認為廣東歌無創意，早期廣東歌都係改編英文歌或者大戲，一直以來原創都唔受重視，就算喺 80年代粵語流行曲市場高峰期，改編歌都仍然係廣東歌主流，以1985年第8屆十大中文金曲頒獎典禮為例，十隻歌之中五隻都係改日本歌，樂評人周華山就認為廣東歌質素唔掂，直到80年代中樂隊熱潮興起，先開始多返原創歌曲。
另一樣成日俾人話嘅就係唱片公司霸權。由於香港只得兩間電視台同三間電台，所以電台同電視台好容易就因為利益關係，特登去催容唱片公司要求推廣嘅歌，形成音樂類型狹窄，最賣得嘅歌都係喺唱片公司催容之下大熱，而呢啲歌都幾乎係情歌。到卡拉OK熱潮興起，又清一色出晒K歌。後來廣告同音樂掛鈎，歌星又同時拍廣告，造成偶像文化，好多本身無乜歌藝嘅人，會因為靚仔或者靚女而捧成偶像，靠靚樣搵食，歌藝其次。
多數評論認為，咁主要反映香港太細，單靠本地市場難以係廣東歌進步嘅動力。著名音樂人黃柏高亦都認為，市場嘅變化經已令到廣東歌冇可能再突圍[4]。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
